今日講下其中一個應有嘅溝女心態，呢樣野好多人都會忽視。
雖然大家入黎係想獲得溝女知識，但係我今日講嘅野好違反直覺，就係想大家諗下溝女以外嘅野。
我地可以將人嘅心理狀態，想像成為一張枱，而一張枱有幾穩固，就取決於有幾多隻腳去支撐。當一張枱只有一隻腳，嗰隻腳就會成為佢唯一嘅支架，當隻腳爛左嘅時候，枱就會不勝負荷；當一張枱有二隻腳，如果其中一隻腳爛左，都仲有另一隻腳，但係都好唔穩固。因此，一張枱有愈多支架，就代表愈穩固。
同樣道理，人嘅精神支柱都係一樣，有愈多當然愈好，不過現實係我地嘅時間同資源有限，都無可能維持好多嘅支柱，所以喺支柱數量方面，要有一個適當嘅平衡。
點解無啦啦講起精神支柱呢？因為有一啲人學習把妹嘅時候，會將呢樣野變成自己人生唯一目標，滿腦子都係諗住溝女，結果咁樣反而做得唔好。首先，溝女成功與否，涉及好多因素，包括我地無法控制嘅因素，如果一時失敗，又無其他支柱去支撐，好容易會意興闌珊。其次係當你覺得女人好重要，你就會患得患失，節奏會被女人控制到，我地要搞清楚want同need嘅分別。
因此，我比大家嘅建議係，溝女之前，先豐富自己嘅生活，尋找生命之中，女人以外嘅快樂泉源，或者好好增值自己。
一個真男人可以做嘅野包括：
1. 發展事業、研究唔同嘅搵錢方法
2. 做運動，鍛練身體
3. 學習不同類型嘅技能，例如樂器、外語、調酒、沖咖啡等等。
4. 廣交不同界別、不同類型嘅朋友，豐富自己嘅見聞
5. 不同類型嘅享受，例如尋找美食、睇電影、睇小說
6. 學習各類型的知識，睇書或睇片都得，鍛鍊邏輯思維
關於最後一點，邏輯思維對學習把妹嘅重要性，會於另一篇章再探討。
）
