焗豬扒飯係港式西餐入面佔咗個好重要嘅地位
將西餐嘅豬扒配埋中餐嘅炒飯
再以番茄醬汁混合兩者而產生出極致嘅美味
今次我食咗成個禮拜焗豬
幾乎痾屎都有焗豬味
試咗幾間觀塘工業區冰室嘅焗豬
幫大家評一評分
金記鮮茄濃汁焗厚切豬扒飯
（$76）
醬汁上同平時個啲唔同
帶少少鼓油香氣
食落幾惹味
雖然有芝士係面，但只係得一塊仔
食咗個啖之後都係無咩芝士味
豬扒非常大塊，而且係真厚切
幾乎覆蓋哂成盒飯
厚度夠，肉質鬆化，有先炸過所以多層油香
但近骨位有少少豬騷味
飯是炒底，口感普通，唔夠乾身，唔係好食到炒過嘅香氣
黃金鮮茄焗豬扒飯
（午市$68，下午茶$46）
醬汁嘅茄味係六間中最出
茄膏味稍重咗少少
有大量芝士係面
幾乎每一啖都可以拉到絲
鍾意芝士嘅朋友呢間嘅焗豬會好岩你
豬扒係六間中唯一一間未經過油炸/過油手法嘅
連煎香都無，要扣扣分
口感都算柔軟，醃嘅底味都夠香
但肉質太瘦，我覺得似豬柳多過似豬扒
加上無油炸過，成個香氣口感層次比較輸蝕
飯都係唯一一間無炒底，而且飯粒過軟，痴埋一夠，唔太掂
咁呢間我係食佢下午茶版嘅
但我諗下午茶同午市最多都係份量上有分別
料理手法應該係相同
龍城焗鮮茄豬扒飯
（$61）
醬汁係偏純茄香，味道較淡
豬扒口感有邊鬆化有邊較彈牙，醃得入味
雖然蛋液係炒飯入面上色唔均勻
但香氣同乾身度都夠
有驚喜位係側邊有焗到少少飯焦出嚟
成個口感層次更好
608冰室招牌茄蓉焗菠蘿豬扒飯
（$54）
醬汁係最差嘅一間
睇落好鮮色，但完全食唔到茄香
味道亦唔夠酸，加上佢哋落咗大量青椒係面
搞到食落似青椒汁焗豬，好唔掂
豬扒過油過得太耐，肉質已經炸到偏硬
炒飯係唯一唔錯嘅點
炒得夠香，夠乾身，粒粒分身，但有少少偏油
新記芝士鮮茄焗豬扒飯
（$61）
份量係咁多間入面最少
應該只係得2/3個金記咁多
醬汁較重豉油同肉汁味
茄味同酸味就無乜
豬扒係咁多間之中醃得最香
但亦都係被鬆肉粉鬆得最勁
幾乎已經食唔出豬扒應有嘅口感
呢點要扣少少分
炒飯乾身夠香，唔會過油，好食
紅茶招牌鮮茄焗豬扒飯
（$65）
紅茶呢間餐廳係觀塘幾乎日日都排長龍
但我返咗觀塘咁耐真係一次都未食過
第一係我好憎排隊
第二係我唔明一間冰室有咩值得排隊
講吓味道先
醬汁茄香幾濃
而且自然嘅酸味相當誘人
豬扒夠香夠軟淋
非常鐘意佢入面有帶少少微弱嘅黑椒香
炒飯比較差啲
香氣不足，口感都過軟
你話佢味道係唔錯
但係咪值得排隊去食
我就不了
豬扒：紅茶>金記>龍城>新記>608>黃金
飯底：龍城>新記>紅茶>608>金記>黃金
醬汁：黃金>紅茶>金記>新記>龍城>608
整體嚟講，金記雖然係最貴
但份量都係好足
相反608係最平，味道亦都係差其他少少
紅茶水準比較平均，唔怪得日日咁多人排
