「一肚都係血，內臟要拎晒出嚟洗。」
差點要切腳終身駁尿袋
陳子聰：Josie喺呢種情況下咁照顧我，我好感動。
何超儀早前透露老公陳子聰大動脈撕裂，一度命危，慶幸最終康復。她近日接受Do姐鄭裕玲的《The Do Show》專訪，詳談陳子聰當時的病況。而陳子聰更是患病後，首度開腔。
何超儀表示願意受訪，全因想藉老公陳子聰的病例，提醒大家注意健康。她指2016年時，老公肝硬化，同期又患直腸炎，「成日喺醫院吊鹽水，又唔食得嘢，瘦到好似骷髏骨頭。開過個肚，後來好返喇，好靚仔、好健康，佢都覺得自己都幾好喎。」
本來陳子聰聽醫生吩咐，嘗試戒煙、食素、不飲含咖啡因的飲品，「醫生話中國茶都唔好飲。」慢慢他覺得自己身體好了，又開始放鬆，回復昔日煙駁煙、大吃大喝的生活。
去年10月，陳子聰回澳洲探親，當時他不知人生將面臨巨變。由於當時父母不清楚他的健康情況，讓他天天吃喝。
「佢媽咪話我知佢已經入咗醫院時，仲話佢食咗好多嘢，帶佢去食點心，食咗好多蝦餃，咁我知咩事喇，因我唔畀佢食㗎！佢好乖，佢爹哋媽咪好老喇，叫佢幫手搬個籠、搬床褥，唔夠一星期，佢晚晚8點已經瞓喺自己間房張床，同我FaceTime都冇晒力。佢話好似整傷盆骨，活動範圍係喺間房。」何超儀憶述。
何超儀指從面色知道老公身體不妥當，「一個人唔妥呢，塊面就有好多隻顏色、好怪，一忽黑、一忽瘀咁，都未諗到係好大件事。」
【醫生話入面爛晒】
在澳洲的最後一日，陳子聰本要送人到急症室，途中他肚痛，最後未泊好車已經暈倒。「全身check晒，跟住6個鐘頭後話畀佢聽，佢肚臍以下嘅大動脈爆咗。佢一肚都係血呀，佢一『開肚』，啲血流到一地都係，首先攞晒啲內臟出嚟洗，係成副架生要拎出嚟洗，仲攞鉗夾起小動脈，即刻切咗壞咗嗰部份。醫生話：『入面爛晒！』」
陳子聰最後換了含矽膠的人工動脈，同發現有直腸炎，又要即刻處理。在搶救過程中，陳子聰的尿道受損，腎臟亦因而出狀況。何超儀形容陳子聰身上插滿喉，有如拖板。「做完手術個肚好多風，佢個肚脹到好似有咗9個月。我見到佢時，傷口未縫埋，係用類似保鮮紙嘅嘢包住，因為要4日放返好啲嘢。我問醫生：『你嘅計劃係點？』佢話：『我乜都做晒啦，而家我哋嘅計劃係一齊祈禱。』」
陳子聰昏迷許久，當時他駁了尿喉，排出來的卻是黑血。每天要輸十多包血，醫生指他差不多用光血庫的儲備。他的腳慢慢變紫色，同時十分冰冷，差點要切腿。由於怕暖包會燙傷昏迷的陳子聰，何超儀每日為老公暖腳。他更要洗腎，最終昏迷了一個多月才醒來，他看到開過刀的肚子便激動落淚。
「因為尿道已經冇咗，佢冇辦法去小便，最初放尿有啲黑血，醫生好擔心佢好多毒素喺體內排唔到出來，幫佢做咗個造口排便，醫生話呢個造口應該係永久性，又開咗個永久導尿管，幫佢不斷洗腎，醫生話佢可能呢世都要洗腎。」何超儀說。
【何超儀跟自己說不要哭】
當時何超儀很大壓力，「我在醫院控制自己，唔可以失控，匿喺房有喊。」但一哭，她就立刻跟自己說不要哭，一會得了感冒，便不能探望老公。
至12月，陳子聰接受物理治療後，慢慢康復，並透過瑪麗醫院找來教授幫忙，最後讓陳子聰坐醫療專機返港。
何超儀表示，有醫護告訴他，很多人都是背尿袋過一世，如果不要風險，背尿袋及造口過一世。但她希望老公可以做回活動自如的人，可以自己大小便，自己行路，做回正常人，不想他終身駁尿袋。何超儀找來全球最好的醫生幫忙，陳子聰會在美國重建尿道。醫院表示，要先放兩個支架進入身體，讓他休息10個月，傷口完全康復再做手術，屆時便可做好尿道。
節目尾聲時，陳子聰接受Do姐電話訪問，他說：「我而好番啲，多謝關心。而每星期做4次物理治療，做返我本分再去做手術。」
有沒有說話跟超儀講？他說：「喺呢種情況下咁照顧我，我好感動，佢日日睇住我，同醫生討論如何醫治我，去幫我康復，因為整件事唔簡單。我經歷呢次之後更加珍惜人生，好感謝身邊嘅人，生命好重要，有乜嘢唔開心嘅事，你可以去應付，如果你經歷呢種情况，你會知道生命好緊要，所以啲人新年祝你身體健康係好緊要。」
最後Do姐同超儀緊緊擁抱，Do姐說：「我冇乜嘢可以幫到你，我只能畀你一個擁抱，你經歷咁多，呢次一定成功，子聰一定沒事。」
何超儀則指老公好厲害，謙稱自己只是啦啦隊。娶妻如此，夫復何求。
好貴
