（利申，我真係唔熟呢個病，我會接觸到呢個病名，都係因為識咗呢個朋友，如果我講嘅嘢有得罪，真係原諒我，我只係個人好唔明佢父母嘅做法。）
最近，呢個朋友好似病發咁，有被害妄想，而且其實經過我查證之後，佢話迫害佢嗰個人其實係查無此人，但佢已經將件事當咗係事實，一直話佢呢個前任同佢分手咗一年，仲一直騷擾佢，然後對佢做咗好多嘢，但係其實我唔明白…佢可以將佢呢啲妄想出嚟嘅嘢，可以完到謊（？ 然後最近就一直見到佢喺IG上面不斷po story講自己嘅被迫害過程，真係越睇越令人心寒嗰種，我知道我唔應該用「癲」呢個字去形容佢，但係我真係諗唔到其他形容詞，佢真係….越嚟越癲。
然後，就係我平時其實IG好鍾意睇嘢嘅時候，分享一啲我覺得有趣嘅嘢，佢就不斷咁樣回覆我，但其實佢講嘅嘢，我完全都睇唔明，佢好似睇到啲我睇唔到嘅嘢，又或者咁講，係佢嘅眼中我回覆佢嘅訊息，並唔係我真實回覆佢嘅對話，我好想幫佢，但係我好驚，佢令我越嚟越恐懼，有時我嗰啲story完全唔關事嘅，佢都會對號入座咁樣，以為我講緊佢，而且佢好似纏上我咁。你哋話我自私都好啦，我想幫佢，但我唔想係被糾纏嘅呢一種狀態，因為其實我都唔係心理醫生，或者係精神科醫生，喺呢一段日子裏面，其實我嘅心理壓力好大，我只係想諗個方法令佢嗱嗱聲睇醫生
另外，其實我之前已經覺得佢有啲病發，但係因為佢本身嘅性格都好敏感多疑，所以我之前一直唔肯定，但係佢同我講過一件事，佢話佢可以同人哋心靈感應，可以聽到人哋嘅聲音，其實嗰陣時聽到呢件事，我已經覺得好徬徨，一直唔知點樣可以提佢去提早見醫生、去覆診，但係除咗呢件事之外，佢之前嘅行為舉止其實都好正常，除咗性格上面有啲變化之外。
而且，其實佢屋企人係有佢IG ，我唔知道係佢Hide咗屋企人，定係佢屋企人睇到覺得冇問題，其實我有諗過開個細IG去DM佢屋企人
我真係唔想為呢件事負上太大嘅責任，因為其實真係唔關我事，朋友還朋友，畢竟佢已經係有幻覺，又覺得俾人迫害緊嘅前提下，我擔心我實名搵佢屋企人講呢啲事，佢又以為我係迫害者，一陣發生咗啲乜嘢事，我真係唔知道怪佢定怪自己。唉，不如大家俾啲建議我，我可以點樣處理呢件事。因為我諗佢應該會持續咁一直同我講嗰啲….奇怪嘅說話。
遠水救唔到近火
