廣東話故事三部曲最後一部!寫下濕鳩故!雖然同一個世界觀,但無睇頭兩部都可以睇得明!
今次唔懸疑,唔燒腦,唔玩負皮,樓豬知錯了,大家請俾多啲正皮,睇到邊都正皮吓
唔貪心,5個正皮開更!
(一)見工
人事部陳小姐看著我份履歷表,面色都黑了,托一托老花眼鏡,又jap了一聲。
大佬,我來見工,又唔係嚟睇人面色!
「徵晨好,喺你個名?」陳小姐終於出聲。
「喺啊!我爸爸係江蘇人,姓徵,佢想我精精神神,所以叫我做徵晨好,唔好誤會係精神問題意思。」
「啊……咁你住喺恭屋邨,大夏樓?新屋邨嚟?公屋嚟㗎?」
「喺……陳小姐!恭屋邨我主要用嚟收信,我想補多個地址,我宜家多數住呢邊,叫做鍾濤中途宿舍,鍾濤喺一間慈善機構嘅創辦人……我……寫俾你!」
陳小姐望住我寫的鍾濤中途宿舍地址,一臉皺眉,問道:「中途宿舍?」
「……喺啊,係比精神病人士暫住嘅地方,呃……我有食藥㗎,精神好穩定,你哋公司唔會介意㗎可?」
「啊……咁梗喺唔介意!公司好inclusive,呢個policy嚟!咁我問多一樣嘢,你上一份工公司叫做寶安保安公司?」
「喺啊,佢真喺叫寶安㗎!唔信你可以揭吓後面張工作證明!」
「哦……我想問你點解做咗三日離職啫!放心講!如果理由合理,唔會影響你面試結果!」
「我嗰陣呢!喺功業工業大廈返工,嗰度出入啲人,真喺好癡線㗎,佢哋……唉……我唔想越描越黑,真喺唔喺我個病問題……」
「唔,了解嘅!即喺工作地點唔適合自己,好正常嘅!」陳小姐夾硬禮貌一笑,我知今次見工凍過水了!她又問:「只係呢!咁啱間工廠大廈叫做工業工業大廈,我有無聽錯?」
我心灰,倒忍不住講真心話了:「陳小姐,其實我真喺無講大話,我寫喺紙上面嘅,我口講嘅,都喺真㗎,唔洗特登複述一次。」
陳小姐也俾我辣著了,她把我的履歷丟在檯面,不客氣問道:「其實你覺唔覺得你俾啲資料好癡線!你咁樣玩玩吓我哋好難繼續面試落去!」
她坦白了心中想法,我反而不嬲,反正都見唔成工!
「我都覺得好癡線!點解啲嘢會咁啱食字,我都唔知點解!但陳小姐你唔信用手機查吓!真喺有恭屋邨,真喺有寶安公司!真喺有功業大廈!」
陳小姐瞄我一眼,立即碌起她自己手機,我不覺得她真心想證明真假,只是想找出我錯的證明來向我對質。
不過沒多久,她的面色就逐漸凝重起來,然後她拿起我的履歷表舉在手機旁邊,逐粒逐粒字對。
最後她咳了一聲,說道:「一陣我會印份合約俾你簽,聽日可以開始返工。」
吓?到頭來得咗?
其實今天我見這間公司,具體是做甚麼的我也不太清楚,但公司名叫做愛判外判公司,不知陳小姐又有沒有覺得自己公司名好癡線?