廣東牌過水問題

已經上咗：
五萬 六萬 七萬、七萬 八萬 九萬

現有手牌：
一萬 一萬 一萬 二萬 四萬 五萬 六萬

叫糊：
二萬(清一色)
三萬(清一色平糊)

同一巡入面，下家打二萬我冇食清一色
對家打三萬可唔可以食清一色平糊？

根據維基百科嘅講法：
「對家/下家打打牌不胡，對家/上家再打出同一水路的牌不可胡，需要到自己再摸牌後才可解除過水，否則當詐糊處理。例子：自己叫一、四、七萬，下家打出四萬，自己不胡，對家/上家打出一萬、七萬不可胡。但如果自己叫七萬食清一色對對糊，叫六萬食清一色，下家打六萬不食，對家打七萬在同一圈下也可以食。」

維基百科個例子係清一色對對糊同埋清一色嘅分別，牌型直頭係唔同咗，所以食得

但如果我以上呢個情況都係食清一色，純粹係多咗平糊，咁又食唔食得？食得嘅話係咪即係總之多啲番數嘅牌就可以喺同一巡內食？

我覺得可以 話哂都唔同牌型 多左一番

我覺得簡單D就係唔可以揀人食
所以如果你叫緊幾多飛都好, 如果都係食清一色, 第一個打左, 你冇食糊, 其他2個人打, 你都冇得食
如果下家打左比你食清一色, 你冇食, 對家打比你食清一色平糊, 我覺得係食得既, 咁多左番數嘛
但係如果下家打左清一色平糊, 你冇食, 對家打清一色比你, 理論上你應該都唔食得, 如果唔係又變左你揀人食糊

同意，同埋睇下打幾大 如果7番已經封頂 要多番都冇用咁就唔應該食

點解唔可以, 都唔係同一隻牌

多一番可以...

我認為同一輪同一隻牌唔可以食
但同一輪唔同牌係可以食

如果三番起糊
下家打一隻牌 我得兩番唔食得 但對家打另一隻牌 而我夠三番
咁我係咪應該食得呢

咁一定得啦

由細到大都係「跟打無得食」

呢個情況如果擺喺絕章又點計？

假設我已經碰咗三坎
一萬 一萬 一萬、二萬 二萬 二萬、三萬 三萬 三萬
手牌係
五萬 五萬 五萬 六萬
食四萬/七萬係清一色
食六萬係清一色對對糊
枱面已見兩隻六萬
下家打絕章六萬我傻仔冇食到
到對家摸咗牌我先見到六萬已經絕咗章
然後對家再打四萬/七萬
咁我又食唔食得？

牌型同埋番數都唔同咗 不過係食細咗
絕咗章嘅話係咪就唔當我係揀人食？

已經碰出:
一萬 一萬 一萬 , 二萬 二萬 二萬, 三萬 三萬 三萬

現有手牌:
六萬 七萬 七萬 七萬

叫糊:
五萬(清一色), 八萬(清一色), 六萬(清一色對對糊)

wiki過水既第三點, 重點係同一水路的牌不可胡。
如果我下家打出八萬, 我冇食。
到對家摸牌, 加槓(對家抽到五萬, 放入已碰出既五萬並補牌)。
咁既情況下, 食五萬比食八萬多一番, 但係同一水路的牌。

我覺我係呢個分歧點上, 應該將規則認知為"同一水路的牌不可胡, 除非番種有別"。

係咪即係唔過水食糊要乎個兩個條件：

1. 食唔同嘅牌
2. 令到牌型(番數)有變

雖然五萬八萬係同牌路 但因為搶明槓加咗番同埋唔係食同一隻牌 所以唔過水都可以食？

我都有個疑惑，假設我做緊坎坎糊叫一、二萬對碰嘅，枱面已見一、二萬各一隻，即係我等緊自摸絕章一/二萬

如果對家打一萬我唔食，上家打二萬我又食唔食得呢？食咗會唔會又出現同番數但揀人食嘅問題？

你個例子咪清變清對
咁清變清平就當然要視同仁

番數牌型都唔同，係食大啲你吹？

仲有唔關番數封頂事，我十番起胡鍾意做幾多百番都唔關你事，牌型轉咗番數唔同就可以食

唔食得，咁就係揀人食

我呢個加槓既例子黎講, 的確係符合以下兩個條件就可以唔過水食糊。
1. 食唔同嘅牌
2. 令到牌型(番數)有變

本來過水規則係避免有針對玩家既情況而出現。
wiki既例子係番數會變大(清一色-->清平)且非同一隻或同一水路牌, 所以唔過水都食得。
以我既例子係有額外番種且非同一隻牌, 但係係同一水路既牌。
但係會引出新既問題。

咁倒轉講, 番數變細都可以唔過水?
下家打六萬, 我唔食佢清對。
對家打八萬, 我唔食清一色。
上家加槓五萬, 我食佢清一色搶槓。

就番數變細都可以唔過水既前題下, 可以再加detail去第二個條件。
2. 令到牌型(番數)有變大

可以，番數唔同，可以搏多番

唔係同一隻就無過水問題

食得
唔係同一隻就食得

搶槓雖然有番，但牌型一樣，所以唔可以食

1. 唔食同一隻牌
2. 令到牌型(番數)有變大

情況1
下家打六萬, 我唔食清對。
對家打八萬, 我唔食清一色。
上家加槓五萬, 我食清一色搶槓。
詐糊, 唔符合條件2。

情況2
下家打八萬, 我唔食清一色。
對家加槓五萬, 我唔食清一色搶槓。
上家打六萬, 我食清對。
唔洗過水可以食出, 符合條件1, 2。

情況3
上家打八萬, 我唔食清一色。
對家加槓五萬, 我食清一色搶槓。
唔洗過水可以食出, 符合條件1, 2。

wiki最底註釋7有寫:
根據不同自訂規例，搶槓當自摸，開槓者包。使用無截糊的準則時，如有兩家以上同時搶槓，當齊齊自摸，開槓者需要包輸所有食糊玩家

過水到自己摸牌後, 自摸都可以食。
咁搶槓計自摸, 應該都唔洗過水都可以食。
前題係番數有變大。

已經碰出:
一萬 一萬 一萬 , 二萬 二萬 二萬, 三萬 三萬 三萬

現有手牌:
六萬 七萬 七萬 七萬

叫糊:
五萬(清一色), 八萬(清一色), 六萬(清一色對對糊)
1. 唔食同一隻牌
2. 令到牌型(番數)有變大

情況4
下家加槓五萬, 我唔食清一色搶槓。
對家加槓八萬, 我食清一色搶槓。
詐糊, 唔符合條件2。

搶槓係當自摸, 唔係真既自摸。
因為有D打法係搶槓當出銃(比64), 有搶槓係自摸(比96)

講真 都好少聽廣東牌話有過水呢樣野
你呢個情況 係計你有冇牌品
正常出邊都唔會比你咁做 咁樣叫簡人黎食 冇品既做法
除非你係自摸 就唔算

冇話得唔得既 但你咁做 一定比人屌
唔同人有唔同既打法 有d會直情當你詐糊

同一隻牌就唔得
唔同牌就食細啲都仲得