姜濤為了準備下月首次個人演唱會，日前宣布暫別全部社交媒體，不過他今日仍然百忙中抽空到商台，接受鄭裕玲 （Do姐）主持《口水多過浪花》的直播訪問。
甫開始Do即事先關心姜濤的身心健康狀況，重提腳傷，姜濤指因右腳膝蓋十字韌帶早在入行前已斷裂，但若要做手術駁回，則要全面休息6至9個月，以目前情況來根本沒有可能，現在惟有跳舞或運動過後，右、左膝蓋也要接受「衝擊波」以舒緩膝蓋情況。
至於心情，姜濤直說：「依家真係好信命理風水，今年我犯太歲好應，又受傷又是非，是非真係5年嚟最多。」Do姐也有追問早前姜濤跟合作多年的髮型師Lydia傳緋聞，他表示：「佢係入行以嚟幫自己嘅工作人員，我同大家都係咁相處，人哋生得靚啲高啲就咁講，影響到人哋生活同工作，我真係好內疚。我以前係覺得冇嘢，所以喺公眾場合咪咩都照做，但依家咁令我注意多啲，真係冇私生活可言，人工包埋。」再問現在開心嗎？姜濤直言：「ok，一般，我唔會呃大家，但會照住開心方向去行，保持正能量畀fans。」
提到下月首次舉行4場個人演唱會，姜濤表示籌備進度順利，他又率先透露成功請到一位「高人」出手幫忙排舞。說到此時，Do姐突然「爆響口」指姜濤今日穿得極為單薄，上身只穿一件黑色恤衫，姜濤即笑說：「唔想每次嚟都着到好隆重，屋企出嚟就係咁，我同服裝師拗咗好耐，我想大家focus喺訪問內容，而唔係我今日着咗咩衫。」姜濤繼續爆料；指服裝師原本想他穿打底衫外再加褸，Do姐聞言即力讚姜濤今日的造型：「今日你好姜濤，ok喎！」
Do姐又指姜濤經常被批評的便是其體重及身形，是否他的長期煩惱？他坦言的確是，奈何自己「肥底」，連飲水也會肥，以往不開心及面對壓力又會狂食發洩，但姜濤指現在心情欠佳連食也沒有興趣。面對排山倒海的批評，媽咪有否擔心？姜濤謂：「佢叫我好同唔好嘅評語都要接受，而我通常唔開心都唔會同屋企人講，但媽咪依家玩social media都已經好叻。」
節目中Do姐不忘不停開解姜濤，叮囑他要懂得分辨善意及惡意批評，絕對不要「輸」給惡意的攻擊。問到想在大家心中是一個怎樣的人？姜濤直言：「善良嘅人，下年我嘅歌會以『放低』為主題，喺娛樂圈要學識放低一啲嘢同心態，好似比較心態，人內心始終都有黑暗面，例如外界成日話MIRROR上、下弦，自己一定唔會跟兄弟比較。」
訪問尾聲，Do姐問到若真的拍拖會否承認？姜濤表示：「睇另一半嘅意願，我又覺得唔使太遮掩，自己真係冇乜所謂，但會尊重另一半。」
班姜嬸又要好嬲好嬲
