[求救] 對油漆同滲水有經驗巴打麻煩入一入黎

舊樓 40 年樓齡, 裝修左 8 年, 冷氣機頂中間個位第 1 年已經有指甲咁大裂痕, 一直冇理. 慢慢就向左右打橫裂出去.
幅牆後面係冷氣機石屎簷蓬, 宜家敲落去空心, 面漆成幅撲起晒, D 白華係條裂痕跌出黎, 敲果陣會跌好多, 但係打風落雨從來冇滲水冇水印.
搵人睇過兩次, 外牆冇事, 第一次話係簷蓬頂入水, 第二次又話簷蓬頂冇爛冇裂, 估係簷蓬底同窗頂入水, 不過解釋唔到點解成幅牆面漆撲晒. 簷蓬底同窗頂舊年油左滴加寶, 不過情況冇改善, 總之就係冇濕冇水印, 唔理幾乾燥既日子都有白華跌出黎. 相連牆身全部正常, 只係得石屎簷蓬後面個位有事. 個師傅話睇樣一定係入水, 唔一定有濕先係.
想請教大家仲可以點搞, 唔想搭棚成個簷蓬做過. 如果冇濕係咪入水都可以唔理, 其實唔介意跌白華, 係怕真係滲水有一日會瀑布咁湧入黎.

真係唔係外牆滲水？有冇試過打針？

真係滲水唔係咁

因為外牆見唔到有任何問題, 所以兩次都估係石屎簷蓬

我都估滲水應該一個個泡泡咁凸起, 唔係成幅牆離左, 但係師傅又好堅持條裂痕係水氣, 巴打有咩高見建議下

留名 我都有類似問題

巴打你幅牆面漆有冇撲起, 有冇白華, 牆身有冇濕? 你又點樣搞過, 交流下

睇唔到你有白華
就咁睇相唔似白華壁癌問題
你睇吓會唔會係個簷蓬結構性問題/鋼筋生銹谷爆石矢仲好

唔該晒巴打, 影多張比你幫幫眼
白華每日都有跌, 敲牆果陣跌得仲勁, 我估成幅面漆後面都係. 其實近睇係條裂痕就見到
我都有懷疑過石屎, 但係一直都係面漆一塊塊甩, 甩完就見到白華, 我見甩完果 D 位石屎好完整

我岩岩揭起塊面漆篤過, 面漆同石屎之間有層野, 浮起會郁既, 我唔知呢層叫乜, 感覺似潮濕過, 再後面石屎就平實既, 冇爆

剷開啲油漆再影張相

呢個似,40年樓近冷氣機窗邊,鋼根生銹爆開,都常見,唔一定見明顯滲水,微細裂縫石屎密度唔夠,濕氣重溫差大,長期落嚟就生銹

巴打多謝你有心幫我, 不過今日搞唔到, 下面有電腦同音響, 又有養寵物, 要搵日困住佢同搬開晒 D 野先敢剷
介唔介意我問多句, 如果有白華, 就算冇濕同水印, 九成都係滲左水?

因為我之前見爆石屎會成舊跌, 不過宜家淨係跌面漆, 後面石屎實既, 好抵死

爆過,重做過底做得好唔好,幾年再鬆唔奇,本身石屎鋼根老化,已變鬆散易入水汽

如果冇見泡起既水印，我係咪可以認為出面已經冇入水，我自己剷返入面幅牆就得？

唔可以確定,滲水都有大細之分,微細滲未必見水印,你要知就要外牆試射水,工程大

我晏少少再覆你
或者你可以去我個post搵我

有機會係冷氣吹到咁

因為搭棚射水大工程, 所以想睇下係咪滲水先搞
上星期幾場黃雨都唔見有濕, 可能等下次大風再睇情況決定
無論如何多謝你意見先

原來巴打係師傅
冇問題我再等你覆, 唔該晒

我估機會微, 呢部冷氣好少開, 而且風口向下

根據你的描述，這個情況似乎是建築結構中的問題，導致牆面出現裂痕和牆面漆剝落。雖然你已經找過師傅檢查過簷蓬和窗戶頂部，但仍然沒有找到明確的原因。以下是一些建議，可以幫助你處理這個問題：

1. 尋求專業意見：考慮找專業的建築師或工程師進行詳細的檢查和評估，尋找潛在的問題和解決方案。他們可以進一步檢查建築結構和水密性，並提供有關修復的建議。

2. 檢查屋頂和簷蓬：除了窗戶頂部，仔細檢查整個屋頂和簷蓬的狀況，尋找可能的漏水點。確保屋頂和簷蓬的防水層完好無損，並修復任何損壞的區域。

3. 檢查外牆和排水系統：檢查外牆是否有裂縫或破損，並確保排水系統暢通。排水系統問題可能導致水從牆壁滲入。

4. 考慮局部修復：如果你確定問題僅限於簷蓬後面的特定區域，可以考慮局部修復，而不需要整個棚蓬重建。這需要仔細的評估和適當的修復方法。

5. 定期維護：無論是修復還是局部修復，確保定期進行維護，包括檢查並修復任何損壞或裂縫，以防止問題進一步擴大。

最重要的是解決潛在的水漏問題，以防止任何未來的水損。如果你仍然對問題的原因感到困惑，建議尋求專業的建築咨詢，他們可以提供更具體的建議和解決方案。

冇濕同水印代表佢冇滲到出來
但唔代表鋼筋冇事
另外就算冇滲入鋼筋
有時天氣溫差太大都會令鋼筋附近有倒汗水
日子有功就會生銹
之後就會谷爆

明白, 即係外牆或者簷蓬好大機會係入緊水, 咁我搵日再諗辦法搞搞出邊
我岩岩再睇過, 石屎見唔到有裂, 不過成幅面漆浮起, D 粉係面漆同石屎中間果層生出黎, 唔知呢個位係咪叫白華, 又唔知點解滲得咁均勻