其實夾band 唔好玩

序
相信有好多人覺得夾band好型，媾死女。
就算無女，玩音樂都俾人感覺好藝術家。
事實上，喺由中三到出嚟社會工作，
大概十一年夾band生涯入面，
並無媾死女，亦無變成藝術家；
只有充滿住人事爭執同無奈；
就連最基本好玩都稱唔上。。。

「哇，你夾band 咁勁㗎？夾咩㗎你？」
呢句嘢喺我同M 呢個結他手夾band期間
係最常聽到嘅一句說話。
每次我同人講親自己有夾band，
多數都會聽到對方咁反問；
每一次我聽到呢條問題我都好驚，
唔係條問題有幾咁難答，
而係我真係唔識答。
有開夾band，玩樂器嘅人可能會心諗：
屌你咩，自己玩咩genre都唔知？
如果世上有一種genre叫做
「人哋未玩過嘅音樂」
我諗呢個就係我同M夾呢隊band玩嘅genre。

第一章
「我真係想執返佢老豆條屍上黎教下佢個仔咁撚唔識做人！」
我用接近X Japan嘅Toshi咁高音嘅聲
對住電話咆哮，
而講緊嘅「佢」就係同我識咗11年嘅M。
或者住厚德邨嘅巴打睇到呢句會講句：
「死者為大喎兄弟。」
的確，我承認呢句嘢對一個老豆剛走咗無耐嘅人都好不近人情，
但呢句嘢亦係將我咁多年喺隊band
受過嘅委結一次過宣洩晒出去。

M呢個結他手係我喺中三時，
上網認識嘅結他手。

當時嘅我仲係on99未成為一個登仔，
Facebook亦未興起群組呢個功能，
用嘅forum係hkband呢個俾廣大band友
交流認識同買賣樂器。
當時嘅我仲係好迷hard rock嘅細路仔，
聽嘅仲係Guns N’ Roses、Bon Jovi呢類
老牌嘅band。

由於家境清貧，我係接近從來無學過樂器，
唯一接觸樂器機會係中一學校搞啲
類似工聯會嘅結他班。
我仲要乜柒都唔識，揀咗古典結他嚟學，
但我當時其實係想學民謠結他。。。
最後亦都因為唔係自己想學嘅嘢，
加上老母日俄夜俄，放棄咗上堂。

直到到中二果年，有位同學介紹我聽
Bon Jovi嘅It’s my life，
我又重燃咗對音樂嘅愛。
睇住Bon Jovi 嘅MV
Richie 咬住talk box條喉喺度wah wah，
我就喺度諗：
山西老師，我想夾band呀！

而當時我都用咗幾年儲返嚟嘅利是錢，
喺yahoo拍賣度買咗枝二手結他，
而今次再唔係古典結他，係民謠結他呀！
但屋企一向無多餘錢俾我去上堂學嘢，
我都係上YouTube自學，
直到目前為止，我都只係諗彈下chord，
同埋通利神曲Sweet Child O’ Mine呢intro。

喺唔識玩任何樂器情況下，
唯一可做嘅post就只有vocal 呢個位。
當時我好想體驗夾band感覺，
就開咗個hkband 嘅ac
出一個招band 夾嘅post。

喺未認識M之前
我膽粗粗同過一隊全員超過二十歲嘅band
喺先達大廈度試咗一次夾band。
結果當然係收皮啦，
我都仲好記得自己係完全上唔到啲音。
不過一次嘅失敗係唔會令我放棄嘅。

之後隔咗一排我check個pm inbox，
就打開咗我認識M嘅契機。
「我哋主要玩Mr. Big，
GNR都有玩過一首，
你有興趣試吓？」
就係咁，我哋就交換咗當時未執笠嘅MSN，
開展我哋嘅夾band旅程。

留名

第二章
「屌你果陣唱到走晒音咁，
諗起都唔知點解會同你夾咁耐。」
M笑住咁同無再做vocal，
轉咗做bassist嘅我講返以前嘅事。

諗返轉頭當時完全唔識唱歌，
唱歌都唔叫做好聽嘅我，
走去做vocal 係件極度唔知醜嘅事；
不過細個淨係一心想夾band，邊會諗咁多。

如是者，我同咗M就喺先達度夾第一次。
仲好記得當時我唔係唱歌，而係嗌歌。
如果有聽GN’R或Mr. Big嘅人都知，
佢哋嘅歌係幾咁高音。
而身為一個已經變緊老牛聲中三生，
唱呢啲咁高音嘅歌係同玩自己聲帶無異。

M當年係揸枝藍色PRS，
當年乜都唔識嘅我
以為係Gibson嘅Les Paul。
雙眼發光，心諗：
哇屌正呀！
聽到佢彈無drop tuning 版嘅Sweet Child，
我馬上Axl Rose上身，跳晒蛇舞咁唱。
而第一次見面後，我哋雙方都無彈對方鐘，
就係咁朝住cover hard rock band嘅方向，
一齊走咗一段時間。

仲好記得有一次去夾band搭地鐵，
佢打電話俾我問我喺邊，
我話：「搭緊地鐵呀屌你，就到Mk啦！」
放低電話，大家先發現原來對方企喺隔離。
果種緣份同眼盲程度係令我印象深刻。

另外有一次夾band我因為太high，
又喺度拎住枝mic stand郁左郁右咁，
唔小心一下打左落M枝珍而重之嘅PRS度。
當時我嚇到尿都標埋，
因為佢同我講過佢好鍾意呢枝電結，
好錫住枝嘢嚟用。
我走咗出房冷靜咗一陣，
再走返一房同佢講
「對唔住，我無心整花你枝嘢⋯」
果下就好似負荊請罪嘅感覺，
點知M話：
「唔緊要啦，繼續一齊夾好啲，
枝嘢花咗有咩所謂。」
我攬咗佢一下，因為真係覺得好內疚，
同時都好感動佢對我咁講。
我哋之間嘅bonding慢慢咁加深。

轉眼間，我哋喺先達練下夾下又一年，
仲一齊出咗一場社區會堂嘅show仔；
出嚟嘅效果當然係柒到飛起，
但對於當時嘅我嚟講，
係咁大個仔第一次上台表演，
果種感覺就好似打L4D2啪腎上腺素咁。
我亦都搵到夾band 嘅一個目的，
就係要表演。

因為M緣故，
我認識咗分別都係結他手嘅K1，
仲有打鼓嘅W。
佢哋兩個都係M中學認識嘅人，
時間都轉到我中五中六嘅階段。

去到中五，
我開始聽hard rock以外嘅band，
Arctic Monkeys、AC/DC、Beatles、
Pink Floyd⋯
越聽得多越覺得夾band嘅世界好大。
有一次上YouTube 聽歌，
聽下聽下，聽到一隊本地indie band，
佢哋就係觸執毛。

留名.

Chochukmo

LM

啲文筆都幾差