話說果晚，因為屋企有d事要出外住一晚酒店，咁見佢咁平又近咪book左一晚。因為先生未放工，我自己一個去check in同拎房先。其實間酒店好高，好多層數又好多間房，應該好旺場，但唔知點解，由大堂行上房已經好寒。本人自少對靈界有所感覺，但係見唔到（有家人係有陰陽眼），亦自問係大膽之人。
Check in 之後，自己一個上房，記得去到某一層要轉lift，個轉lift大堂又好黑，搭lift上樓期間，去到某層個 lift 門無端端自己開，我都算，就當有人按錯lift。之後到左要去的樓層，一路行，條走廊好黑好暗，跟住行到盡頭，心諗：pk！尾房！
跟住我敲門入房，開燈，冇睇到咩野，只係聞到好up好臭，咁我又覺得唔出奇，因為間酒店出名舊同殘，但依家諗返，可能係靈體的氣味......
之後我梗係開部電視壯壯膽，拎起個遙控，對正部電視按極都按唔著，我都唔勉強按落去，一陣有恐怖野走出來咪嚇死我。我諗住打電話落前台投訴，電話又打唔通。突然之間，廁所出面盞燈係咁閃，我心諗：嘩！拍戲呀？之後發生的幾秒就真係似拍鬼片，我打算行過去搞下個燈掣，行到去，個電視自己開左，仲識係咁轉台。
人都未識反應，頭上盞燈"束"一聲熄左！嚇到我死！我所有電器都冇熄，即刻拎埋個袋走出房，之後起條走廊狂奔出去。一路跑，一路個人就好寒，真係好鬼驚！入lift 之後再轉lift，直至見到d大陸旅客個心先定一定！我梗係即刻同大堂櫃檯講，由於當時驚魂未定講到一舊舊，淨係講d燈、電視自己開關，好得人驚。個經理又出奇地冷靜，咩都冇講
，淨係話幫我換過間房。咁我又費事話有鬼，驚人笑我啦。之後我又自己一個人去過第二間房，呢間係靚d大d，但都好舊好殘，不過就冇左令人心寒的感覺，而之後成晚都冇事。呢件事我都例冇咩同人講過，因為科學d講，可能係酒店舊電器殘。咁當然，我又怕樣衰，驚人笑。但之後又發現原來好多人起呢間酒店都有d經歷，如果大家去過，又遇過，不妨分享一下.......完。
