{警世文] 我在旺角Koc Pet 買貓後24小時內，貓貓中了貓瘟

粉紅色腦 2023-04-19 22:24:46

{警世文] 我在旺角Koc Pet 買貓後24小時內，貓貓中了貓瘟
我於4月初喺旺角弼街寵物店 Koc Pet（通菜街及界限街都有分店）買咗一隻貓貓，三個月大，抱咗番屋企未夠24小時就肚屙，帶去獸醫睇，發現中咗貓瘟FPV。
先講銷售手法：
喺俾錢前及俾錢後店員都冇同我講過合約上嘅條款，我喺俾錢時更係唔知有張紙要簽，係俾完錢後店員揚咗揚張紙話拎貓嗰日要簽。
貓瘟事件：
當日我喺寵物店俾錢時，店員話過一兩日帶貓貓打第二針，所以我冇即刻抱隻貓走。過咗兩日我去拎貓貓，弼街分店未到閂鋪時間就落咗半閘，我去通菜街分店問，店員表示奇怪點會落閘叫我喺通菜街分店等，佢自己過去拎，我等咗10-15分鐘，佢終於番嚟，但唔俾我開個貓袋檢查貓貓，聲稱貓貓會唔適應。
帶咗貓貓番屋企24小時內出現肚屙情況，亦唔肯食嘢，我即時contact寵物店，寵物店表示貓貓啲便便有蟲卵，叫我幫貓貓杜蟲，唔好俾嘢佢食。我覺得好奇怪，因為我睇唔到有蟲卵同埋貓貓睇落真係好唔舒服，所以帶咗貓貓睇獸醫，發現貓貓有貓瘟。因為我冇養其他寵物，所以一定唔係我令到貓貓有病，我記起當時寵物店係將我隻貓同其他貓困喺同一個籠入面，所以凌晨3點半就通知佢哋貓貓有FPV。當晚寵物店即時回覆我WhatsApp，仲打電話俾我叫我俾佢哋幫貓貓打針，想上我屋企，我當時好驚，有咩可能我同咗佢哋講貓貓喺醫院而佢哋話要上我屋企，之後佢哋話可以安排貓義工送藥去醫院。半個鐘後，我喺醫院門口見到兩個俾我感覺唔友善嘅男人，對談當中得知佢哋並唔係貓義工，而係寵物店負責人，因為佢哋同我講啱啱喺寵物店到執緊嘢。佢哋俾咗個袋我，入面裝住3支針筒（注意：係針筒）加一罐啤酒，啤酒係用嚟冰住啲針，我問極啲藥係咩嚟，佢哋支吾以對，我見佢開咗張相串啲英文字母出嚟，我話不如直接俾我睇啦，佢哋唔肯俾我睇。
我到而家諗番起都覺得好恐怖，究竟佢哋想對我隻貓做啲咩？乜喺香港，寵物店嘅人就可以為動物注射針藥㗎咩？點解半個鐘就有「藥」呢？當時我唔敢凌晨時分同兩個男人硬碰硬，我都仲未有開始追究。我同佢哋講我接隻貓番屋企24個鐘內就有事，好明顯唔係我嘅責任。當時寵物店負責人同我講「一定唔關你事啦」，佢同我講可能通咗關好多人去寵物店，惹咗俾隻貓；亦都可能佢哋帶隻貓去打針，喺獸醫診所惹到病。
之後我一直追問佢哋打算點負責我隻貓件事，同埋點樣處理店鋪其他貓貓，寵物店嘅態度就截然相反，佢哋嘅態度令我感到心寒。咩叫做「點解照顧隻貓」？我冇再覆佢哋，因為「無惻隱之心，非人也」。
到現今貓貓留醫第十日，我唔會因為醫藥費昂貴而放棄佢，雖然我同貓貓相處得唔耐，但我係當佢係自己嘅小朋友，係一條生命，並唔係貨品你可以冷漠地去退換處理。我決定要成為貓貓主人嘅當刻起，我就要為佢嘅生命負責。而寵物店嘅行為同態度正正就係話俾我知佢哋唔尊重貓貓嘅生命，我哋永遠都唔知喺閂鋪後啲貓貓係點樣俾人對待，而嗰啲針究竟係咩嚟，點解咁驚俾我知？我每當諗起都覺得好內疚，我唔知可以點幫店鋪其他貓貓。希望大家可以以我嘅經歷為鑒，領養代替購買，唔係話驚你哋唔識照顧/唔負責任，而係因為香港嘅寵物店唔當寵物嘅生命係一回事，另外香港冇一個政府部門/法例可以規管到寵物店，如果你唔想經歷我嘅事情：每日望住貓貓辛苦嘅樣/寢食不安/無助；如果你唔想你嘅寵物經歷我貓貓嘅遭遇，請領養代替購買。因為冇執法機構可以規管寵物店，只可以由我哋市民自發，拒絕無良商人，保護動物權益。
到現時，我貓貓情況仍然未好，我望住佢而家連meow meow叫嘅力都冇，好心痛。有日我探貓貓時講「媽媽會為你討回公道，你要加油好番，好唔好」，貓貓會meow 番我，就係呢一點我一定要公開我今次事件！！！
由於已知有其他人發生了同樣事件，請各位已於Koc 購買貓貓嘅人迅速帶貓貓做檢查。

粉紅色腦 2023-04-19 22:27:31