《死屍死時四十四》安得廣廈千萬間（轉有劇透長文）

原貼全文
https://reurl.cc/GeY5Vx

《死》係一套黑色幽默喜劇，而往往呢類型嘅作品都係充滿住好多象徵符號又或者作品嘅情節慢慢思考都係耐人尋味嘅。只不過我估唔到上次何爵天導演嘅《正義迴廊》(The Sparing Partner)喺描寫主角張顯宗一角嘅時候竟然可以有用德國哲學家弗里德里希·尼采(Friedrich Nietzsche，1844 – 1900)同尼采嘅著作《悲劇的誕生》(The Birth of Tragedy，1872)詮釋嘅空間，而今次《死》又係咁耐人尋味同埋咁有詮釋空間。大家或者會對業主們有唔同嘅解讀或者唔同嘅情節有唔同嘅聯想。

不過，夏冬留意嘅係呢次「命案」嘅主角，死屍先生(施先生，由張滿源飾演)。想知可以點解讀？睇落去就知架啦。

以下內容，劇透重重，由 #夏冬視覺 出發!影評，或者可以咁呢～

–

空轉

一如我短文入面都提及過，點解我會咁欣賞《死》？即使過往有唔少嘅作品都係黑色幽默喜劇例如2019年邱禮濤執導嘅《家和萬事驚》(A Home with a View) 又或者2022年陳果執導嘅《鬼同你住》(Coffin Homes)，都係諷刺緊喺香港買樓呢回事。即使題材唔新鮮，但就係《死》咁夠薑第一幕就指住香港買樓呢樣嘢嚟諷刺，直指呢個件事係「荒謬」。

透過分析開幕呢一段戲，再配合故事後面嘅元素，你就會感受到呢套戲係幾咁完整。



故事嘅一開頭就係主角杜志銘(由黃又南飾演)喺塞車嘅途中一路聽住收節目而展開嘅。塞車，呢一個場景為套戲設定咗背景同氣氛。表現緊嗰一種嘅棘住棘住、膠着、停滯嘅狀態令人躁底同唔耐煩。某程度上就係香港而家好多人生活嘅寫照，停滯、浮燥、矛盾嘅社會氛圍，為成套戲定咗基調。

離開塞車現場，緊接住嘅就係一段描寫佢生活嘅戲。返到屋企諗住可以同老婆鍾小瀅(由余香凝飾演)溫存吓纏綿吓都要等屋企所有人離開晒先至可以做到呢件事，但又會因為自己個女早咗返嚟而打斷。兩夫妻私密嘅對話，原來成家人都會聽到。去到飯枱一家人一齊食飯嘅時候，望住佢俾外母蘇文鳳(由毛舜筠飾演)一句一句咁質佢但還口嘅機會都冇，我哋先知原來佢係一個寄人籬下嘅女婿。返到房都仲會因為樓上嘅聲音怕自己個女俾人嘈醒，就連等咗咁耐行房嘅機會都冇埋仲要自己出後樓梯解決呢件事。

你係觀眾都睇到佢嘅生活係有幾咁壓抑有幾咁唔自由。呢一段嘅生活片段，你就可以睇到一層樓係香港人嘅生活入邊係自由嘅基石。因為，當你擁有一層樓嘅時候你就擁有屬於自己嘅生活空間，你有得選擇你嘅工作你更可以選擇人同人之間嘅關係。但喺供樓嘅過程為咗儲到首期，或者供緊嘅時侯唔好斷供，你就失去左自由。呢就係諷刺。

杜志銘收聽緊嘅節目嘅嗰句就直接點出「荒謬」係呢一套戲嘅主題。

「香港人買香港樓，我哋都知係荒謬，地產商都知係荒謬，地產商都知我哋知係荒謬，我哋都知地產商都知我哋知係荒謬。」



唐代詩人杜甫《茅屋為秋風所破歌》中寫道:「安得廣廈千萬間，大庇天下寒士盡歡顏。風雨不動安如山！」講出一個人流離失所嘅痛苦亦講出一個人對有個安身之所嘅渴求。時至今日2023年嘅香港，我估大家都會同意(除非你係炒家啦，有幾層樓收緊租)香港樓價昂貴，貴到你要最少用十年光陰節衣縮食又或者要問親人賒借先可以俾到首期。即使你有首期，之後你要確保你往後廿年甚至三十年嘅人生之中，你仲可以供到樓。如果唔係就會俾銀行收返到時，斷供你就會連本都冇埋。喺你供樓嘅過程，你又要確保自己唔會失業、唔會大病又或者樓市唔會大跌，仲有其他你估唔到需要你用一大筆錢嘅意外。

就咁聽落就知件事有幾難做而且要冒幾大嘅風險，但一個咁難做到甚至乎風險咁大嘅投資，點解咁多人都仲係要前仆後繼爭先恐後咁用一世人最寶貴嘅青春去做呢？我哋可以喺後來嘅對白搵到答案。

「桑德蘭有一個馬拉松，最後得一個參賽者成功跑完。點解？因為跑第二個嗰個人跑錯咗囉，一個跑錯之後所有都跟住跑錯。…點解我要買樓？怕加租，怕俾人笑，怕俾人睇唔起。」

馬拉松係一個好貼切嘅比喻，因為喺香港置業都係一個好漫長嘅過程。呢一段對白就講出咗喺「荒謬」背後嘅一種情緒「恐懼」。單單第一段戲就已經成功咁為呢套戲定調，而呢啲概念喺往後用唔同嘅情節同象徵去發展更加荒誕搞笑嘅情節。呢單「命案」嘅主角死屍先生就成為咗「恐懼」同「荒謬」呢兩個概念嘅象徵。



單單佢嘅出現就已經令人聯想起現代文學主義作家法蘭茲·卡夫卡(Franz Kafka，1883-1924)嘅作品。

卡夫卡式入伙日

當杜誌銘喺後樓梯食煙之際，佢一出防煙門，發現屋企門前有一個死唔眼閉嘅裸男伏屍。

成件事毫無理由亦解釋唔到，但就係因為呢條屍體，臨海峯十四樓嘅四戶業主同死屍先生都陷入咗所謂嘅「卡夫卡式」(Kafkaesque)嘅小說情節之中。《死》入面死屍先生出現嘅時候就令我諗起卡夫卡作品之中比較為人熟知嘅短篇小說《變形記》(The Metamorphosis，1915)第一句嘅開頭。

「當格里高·薩姆莎(Gregor Samsa)從煩躁不安的夢中醒來時，發現他在床上變成了一個巨大的甲蟲。」

佢哋都係用一個無法被解釋嘅情景展開往後嘅故事。卡夫卡嘅故事被後世無數嘅文人又或者哲學流派用唔同方向去解讀，但萬變不離其宗嘅就係大家都會同意佢筆下嘅主角都係痛苦而且佢哋面對嘅處境係無法被解釋，就正如《變》入面嘅格里高，喺成個故事入面都冇解釋到點解變咗一隻甲蟲。又或者其他卡夫卡嘅作品，即使去到最後有一個勉強嘅解釋都好，成件事都係極度諷刺。

各位觀眾到最後都知，原來呢位死屍先生係十五樓A嘅業主。佢死慳死抵終於儲到首期搞掂埋裝修，未成家立室而且仲正值壯年。男人四十一枝花，四十四歲人有層樓揸手仲要單身，理應係人生贏家鑽石王老五大把世界。但就係因為一個喺十四樓外牆無人理會嘅蜂巢，一個人人選擇性忽視嘅問題，入住嘅第一日就俾胡蜂拮到進入假死狀態，仲要差啲俾人活埋。成個事件係咪好冇道理？非常之荒誕呢？



再諗深一層《變》事入面嘅主角同死屍先生一樣都變成一個冇辦法同他人溝通嘅狀態。好似格里高變成左一隻甲蟲，佢身邊嘅人起初對佢係恐懼，但久而久之就變成憎惡同憤怒。死屍先生就仲擁有意識，但佢都唔可以同十四樓嘅業主傾半句偈，眾人一開始見到佢都係驚嘅，但諷刺嘅就係呢一種恐懼好快就被另一種恐懼所凌駕，之後就冇再為呢位男士嘅死感到悲傷或者同情。

除咗開頭驚完一下之後，十四樓A嘅各位好快就開始已經討論緊呢一條死屍，會對佢哋層樓嘅樓價有啲乜影響，因為真正嘅「恐懼」係層樓嘅嘅價值暴跌，之後佢哋斷供見財化水。導演就用咗佢喺《正義迴廊》類似舞台劇嘅表現手法去表達眾人心中對樓價跌嘅恐懼。故此，死屍先生亦都象徵住恐懼。但呢一份恐懼，同我哋平時嘅恐懼有少少唔同，人產生恐懼係一種生理嘅反應旨在保存我哋嘅性命，咁理解之下，人類理應最怕嘅係死亡。

不過，喺香港地你窮就其實係社會性死亡(Social Death)，意指社會上被孤立、忽視甚至睇唔起。其中一幕就係描寫緊如果斷供之後佢哋瞓天橋底露宿街頭嘅惡夢，對於呢班業主失去一切喺街頭苟且偷生，係生不如死慘撚過死。佢哋對貧窮嘅恐懼，更加勝過害怕非法處理屍體被判刑。「坐艇慘撚過坐監」。於是乎眾人對死屍先生嘅感覺就夾雜着恐懼同憤怒。正如上面提到卡夫卡小說，往往故事荒誕背後嘅解釋係極為諷刺。正如死屍先生攞佢人生最寶貴嘅青春去逃避「怕加租，怕俾人笑，怕俾人睇唔起。」當佢真係可以供到樓，乜都未享受到就搞成咁，咁你話係咪諷刺？簡單啲嚟講就係萬事一場空，係咪好卡夫卡呢？



但死屍先生嘅象徵就唔止係咁，心水清嘅島民讀到「荒謬」(Absurd)又點可以唔提及法國哲學家阿爾貝·卡繆(Albert Camus，1913-1960)呢？

香港西西弗斯

卡繆著名嘅作品《西西弗斯的神話》(Myth Of Sisyphus，1942)就係借西西弗斯呢個希臘神話去講呢個「荒謬」嘅概念。話說西西弗斯被奧林匹克山上嘅眾神所懲罰，要佢永生永世都要搬舊石上山，但最後舊石點都係會碌返落山腳而佢又要重新再搬過舊石，永永遠遠而且非常有意識咁做呢種徒勞無功嘅苦差。

卡繆筆下嘅荒謬，同卡夫卡小說主角嘅遭遇一樣，都係一種人類無法被解釋嘅生存狀況，而最可悲嘅係你清醒，但冇辦法反抗。佢書入邊係咁寫嘅

卡繆筆下嘅荒謬，同卡夫卡小說主角嘅遭遇一樣，都係一種人類無法被解釋嘅生存狀況，而最可悲嘅係你清醒，但冇辦法反抗。佢書入邊係咁寫嘅

唔通呢一件事咁多年都冇人反思過，冇人覺得件事唔可行咩？當然唔係啦。不過，就係當現實好似電影開頭講跑馬拉松跑第二個嗰位，當一班人一齊跑錯嘅時候，後來嘅人都焗住咁跑囉。點解咁大風險都仲係要買樓？因為租係會不斷上升㗎嘛，但點解租會不斷上升啊因為供不應求囉。正如一個社會，如果個個都係自住而唔會炒或者囤貨係唔會有香港咁畸形架。喺呢一個地方，有啲人可以擁有十幾層樓，但有人只可以住一世籠屋。咁你話呢一樣嘢係咪荒謬呢？



死屍先生打上去一個講買樓嘅財經節目走去講一段咁樣嘅說話，呢個好明顯就係西西弗斯行落山嘅時候嘅反思啦，係死屍先生作為一個香港小市民嘅吶喊同對現實嘅控訴。而最有趣嘅係導演係安排死屍先生講呢段說話嘅時候係攬住舊嘢喺身，呢個就同書入邊西西弗斯嘅形象不謀而合。

讀到呢度嘅各位，應該會感受到何導係點樣緊扣「荒謬」呢一個主題，不過喺我眼中「荒謬」只係一個表象。正如上面講嘅一樣，「荒謬」所引至嘅情緒係「恐懼」，但「恐懼」嘅本質係「無力感」，就正因為冇辦法解決先會有恐懼。《死》入面嘅角色都係被「恐懼」所支配繼而驅使去行動，但恐懼嘅背後講緊嘅就係眾人都覺得面對住「荒謬」本身係無力，所以先會有後面嘅故事。

吶喊

一百年前，有個筆名叫魯迅(1881-1936)嘅人，佢有一段嘢，相信大家都好耳熟能詳，大家都會明白到你係永遠叫唔醒扮瞓嘅人。

「假如一間鐵屋子，是絕無窗戶而萬難破毀的，裡面有許多熟睡的人們，不久都要悶死了，然而是從昏睡入死滅，並不感到就死的悲哀。現在你大嚷起來，驚起了較為清醒的幾個人，使這不幸的少數者來受無可挽救的臨終的苦楚，你倒以為對得起他們麼？」

其實大家都會明白到，故事入邊任何一個角色都清楚自己係身處嘅荒謬之中，佢哋亦都明白自己係幾咁唔自由，但可以點呢？咁當你冇能力反抗嘅時候，最方便最簡單方法係咩？



否認囉。當問題大到無辦法再否認嘅時候，就將件事轉嫁俾其他人囉，總之件事唔喺我嘅範圍入邊就唔關我事，事不關己己不勞心，我唔係受害嗰個就冇問題架啦，有問題都已經成為其他人嘅問題。十四樓外牆嘅蜂巢係成件事嘅起因，但點解會有個大過藍球嘅蜂巢呢？李寶安(由李尚正飾演飾)指出呢個問題嘅時候，又有冇十四樓嘅人理佢呀？咁到底成晚嘅麻煩同困境又係咪單純不幸呢？喺共業之中，仲有無辜嗎？

巧言令色再令本身「荒謬」變得合理。或者大家會笑大舅卡夫(由楊偉倫飾演)整嘅隱形戰衣同膠紙覺得佢嘅發明就好似太陽能電筒一樣，但其實佢嗰套色彩斑斕嘅戰衣仲有另一層更加好笑嘅意味。戰衣本身嘅作用就係逃避人面識別而家一街都係監視鏡頭嘅監察，但偏偏張就一個的士佬(由鄭中基飾演)嘅一句講中咗問題嘅核心，「着到成隻彩雀咁嘅樣想人唔認得都難啦。」呢個係好笑嘅第一層，但其實佢對應住嘅係每一個十四樓嘅業主面對「荒謬」嘅時候用唔同嘅花言巧語去扭曲荒謬又或者問題嘅本質。



大家都睇當死屍出現喺十四A嘅時候，佢哋一家第一件事就將佢推去其他單位度，之後再到十四B嘅業主兩位銀髮族Boron同Betty(由劉江同黃文慧飾演)再到其他唔同嘅業主。當成層十四樓嘅業主都發現件事唔可以再轉嫁俾其他同層嘅人，咁佢哋就諗到「福達十三跳」呢個公屋，佢哋除咗冇理會亦唔想理會嗰度居民嘅感受之外，仲將佢美其名「死過人嘅公屋會變特快公屋，我哋仲幫幫緊人加速上樓。善有善報」。呢個就正正係《死》入面最辛辣最赤裸嘅諷刺，認知到荒謬但第一件事唔係直面佢，而係無所不用其極咁去扭曲件事嘅本質顛倒黑白，再用一套色彩斑斕嘅外衣指鹿為馬，去包裹就快發臭嘅荒謬。可謂，金玉其外，敗絮其中。

虛妄

講起華而不實一味靠吹嘅象徵，呢一樣最明顯嘅例子就係佢哋身處嘅居所：臨海峯。大家有印象嘅話，其實橦樓喺沙田，你最多得條城門河，好聽啲叫做河但實則係一條渠。咁哪來嘅海呢？呢個係最表面嘅諷刺，你再諗深一層正當十四樓業主齊集嘅時候，佢哋就哼起當年買樓嘅宣傳廣告歌曲，下一個鏡頭就見到佢身穿法國十六世紀嘅貴族服飾，開始講起法文。呢一段又係導演更有玩味嘅諷刺。



或者，大家真係以為當年嘅貴族係真係唔洗做，但唔好意思佢哋係有唔少對國王係要效忠同有好多義務，所謂貴族精神係對上盡忠對下負責。但喺臨海峯嘅宣傳入面，只係提及到貴族享樂嘅部份。更加諷刺嘅係，就算佢哋化身法國貴族身光頸靚華冠麗服，但一講到食嘢都仲係講緊食譚仔米粉。眾所周知譚仔呢啲係平民嘅食物，身為貴族都仲係食緊呢啲，而蘇文鳳都仲會同杜誌銘計飯錢，咁佢哋邊忽有錢邊忽貴族？

讀到呢度忍唔住想駁我嘅朋友，你哋應該係諗緊「買得起樓都窮？夏冬你玩嘢呀？」就咁嘅，呢度討論緊嘅唔係總資產，係佢哋手上可以隨便調動嘅流動資產，換言之閑錢。手上閑錢嘅多寡係會決定到你平日嘅生活水平，而當你諗通呢個問題嘅時候，你就會明白到導演諷刺緊嘅係乜嘢。

事實上用法國貴族去做一個形象，除咗係借用緊香港嘅地產宣傳文化之外，其實亦都代表緊買到樓嘅，你真係去咗香港社會嘅「貴族」，因為「貴族」存在嘅必須有平民喺佢哋之下，咁啫係話「貴族」高人一等嘅形象。事實上，你可以喺香港買到樓就證明有一定嘅財富，係一個資本主義嘅社會之下，大家都係自由但有錢嘅人更加自由。但呢一個係一個高明又現實嘅諷刺，因為佢哋看似一個社會上嘅貴族，但實際上佢哋同冇樓嘅平民係差不多，甚至比住公屋更唔自由，因為佢哋都冇閑錢喺手。

咁講法，其實供樓除咗表現到社會地位提升又或者財富之外，置業本身係同「自由」呢個概念掛勾。但其實呢個亦都係一個諷刺。



自由

「自由」呢個概念一直都思想家們爭論不休嘅主題，唔同嘅哲學家又或者意識形態都有唔同嘅定義。接下嚟我沿用嘅就係卡爾·馬克思(Karl Marx，1818-1883)所理解嘅「自由」。英國馬克思主義研究者泰瑞·伊格頓(Terry Eagleton，1943 – 現在)就係咁講解馬克思點理解「自由」呢一個概念嘅。

「不具慾望、無法從事複雜勞動或進行細緻溝通的動物，往往只是在重複自身的行為。自然界的循環決定了他們的生活因而無法為自己形塑敘事，那即是馬克思所謂的「自由」。然而，就他(馬克思)看來，反諷之處在於，儘管這樣的自決是人類的本質，但歷史上絕大多數的人們卻始終無法行駛這樣的自決權。他們不被允許成為完全的人類，相反地乏味的階級社會大體上決定了他們的生活。」

簡單啲嚟講，馬克思認為人之所以自由，係因為相對於動物，人理應可以唔受自然嘅影響又或者環境嘅影響，可以自由根據自己嘅欲望或者意向去決定自己嘅事。喺呢度嘅自由，就係講緊可以跟隨自己心中所渴求而去行事。咁你就睇到故事入面追逐緊嘅「自由」，係咩一回事同埋件事幾諷刺。因為，只要你解決咗你嘅住屋問題而呢樣係香港人最貴嘅生活成本，生活上你就有好多嘢可以選擇。如果你係杜誌銘而你又有本事供完層樓，你仲須要受外母氣咩？你仲須要煩惱夫妻恩愛會俾人撞破咩？

一切都看似好美好，但其實不論你供緊嘅過程甚或你供完都好，你都失去咗自由。供嘅過程，你唔可以失業，你嘅人工有一大部分去咗供樓，變相你手上嘅閑錢少咗，你可以享受生活嘅錢又少咗，咁你已經等於失去自由。但其實供完都係唔自由嘅，日後嘅維修費用又或者佢本身嘅價值，死後你都總會有人繼承層樓呢筆遺產，佢點都係會煩住佢嘅擁有者，只係如果你過咗身，層樓煩嘅唔係你啫。而象徵住置業所產生嘅問題，代表人物就係十四C嘅張家，仲有十四B嘅業主Boron同Betty。



張家兩父子點解會反目，都係因為張就根本冇時間返屋企同屋企人相處，往往都要揸特更的士又或者夜更的士，因為佢唔單止要睇住架車仲要賺錢供樓。簡單啲嚟講就係雖然佢中咗六合彩俾得起首期，但供嘅過程都係要日夜顛倒，仲要令到自己失去同阿仔(由呂爵安飾演)相處嘅機會，更加因為呢層樓令佢同老婆(由莊韻澄飾演)之間有隔閡最後離婚，呢個就係失去自由仲要失去埋家庭，極為可悲嘅例子。我係好同情張就，佢做咁多都係為頭家，結果家不成家，呢個又係一個諷刺。

但眾業主中《死》最為諷刺嘅就係兩位銀髮族，因為兩位都年事已高更加冇提過有後，換言之兩位係最唔怕嘅。但兩位都係將斷供聯想成「貧窮」再引伸至「社會性死亡」，到生命最後一段路都係被層樓所束縛住，呢啲唔係諷刺係咩呢？

因此，置業看似帶來自由，實則奪去你嘅自由。又因為身處喺香港呢個資本主義社會，房地產業更係香港社會嘅經濟引擎，故此樓價係唔可以跌亦跌唔起。結果，好多人都明知呢件事係唔合理甚至係荒謬，又因為要喺呢度生活就必須要面對呢個貼身問題，但不論買定賣都有份推高緊樓價，所以大家都無可避免地身處喺呢場已經行錯路到達唔到終點嘅馬拉松之中，成件事既荒謬亦彌漫住無力感。

當然，呢一套係一套喜劇，而導演喺諷刺嘅背後，除咗想點出問題令大家笑之餘可以反思吓，但最重要係為大家打打氣緩解吓大家嘅壓力，喺疲於奔命為口奔馳嘅生活之中有兩粒鐘係可以開懷大笑吓。

苦中作樂

「這個清醒洞悉折磨著他，卻也同時是他的勝利。只要蔑視命運，就沒有任何命運是不能被克服的。」

卡繆認為人生本無意義，要喺呢個世界尋求意義，本身係荒謬嘅。不過，面對荒謬最重要就係洞悉到荒謬進而蔑視佢。諸神懲罰西西弗斯唔係永生永世咁身體上去勞役佢，而係用嗰種永恆但逃遁無門嘅絕望去懲罰佢。因此，先會有《西西弗斯的神話》最著名嘅卷尾句「因此我們必須想像，西西弗斯是幸福的」。或者借卡繆嘅說話講應該係「因此我們必須想像，西西弗斯是笑着的。」而呢一套喜劇，夠薑指住呢個「荒謬」嚟笑都係一種藐視。

卡繆俾出嘅答案就係不抱希望亦不絕望咁去「反抗」，用藐視嘅態度活著去否定諸神加諸喺身嘅懲罰，直視生命中嘅荒謬。呢樣嘢就解釋點解死屍先生一直係死唔眼閉，亦都解釋到點解結局影住死屍先生出土嗰刻係影住佢嘅眼。喺結局嘅獨白中有一句好有趣，「唔係呀，你哋先未瞓醒」就係表現緊佢一直都好清醒，唔清醒嘅係眾人。

誠然，卡繆嘅答案或者太過阿Q精神，又或者真係太崇高、太理想、太難做到，呢樣夏冬都認同嘅，少不免都係有種廉價心靈雞湯嘅味道。不過，結尾當眾人喺死屍先生嘅墓地隔離盡吐自己嘅苦水生活背後嘅辛酸，但最後蘇文鳳嘅「我覺得我哋好好彩，因為我哋仲喺埋一齊仲識攰仲識嬲，或者咁先最重要」就講出我更加相信嘅一套，面對生命嘅荒謬最重要係唔好麻目更加要連結身邊嘅人，一齊面對難題。

其實縱觀成套戲，大家之所以團結從來都唔係因為大家諒解對方，相反嘅係只係因為有更大嘅問題喺外面，將內部嘅紛爭暫時壓抑住，令到大家嘅利益一致。但只要外部危機一解決，又會返返去對立嘅狀態。點解會咁今日大家其實都冇理解大家，最可惜嘅一樣嘢就係大家生活壓力都好大，都冇咁樣嘅空間同餘地去互相理解。有時你唔係想對人態度好差，但問題係工時長人工低又唔夠人手，做起嘢上嚟態度又點會好?你嘅老闆唔係想刻薄你架，但租金高（亦即係高地價所引致嘅後果）佢營運成本上升，一係就將貨就價儀貨品或者服務質素，再唔係佢就加價，但，一係就刻薄你。變相，佢唔刻薄你就做唔到生意佢嘅心血就冇架啦。以上種種仲有無數嘅例子，呢啲矛盾同對立，就係人同人之間最大嘅隔閡。

唯一可以化解呢啲隔閡同埋矛盾就係同理心以達致和解，不過現實中要求呢樣嘢係更加「老土」或者顯得講嗰條友更荒謬同離地。有時現實比作品更荒謬，到底係講嗰條友荒謬定現實呢?大家可以自己諗諗。



死屍先生嘅墳墓，就好似一個雀巢一樣，隨着大家嘅和解，佢亦都由死屍狀態開始重生。《莊子．大宗師》有云：「泉涸，魚相與處於陸，相呴以濕，相濡以沫，不如相忘於江湖。」相忘於江湖得到絕對嘅自由，就真係太高太離地，倒不如相濡以沫互相扶持重建返人同人之間嘅關係令人際之間充滿返往昔嘅人情味。十四樓嘅各位經過一晚咁可怕嘅危機先領悟到呢個道理，但現實中嘅各位唔需要。

尼采講過「盲目的樂觀，只會使人感覺膚淺；過度的悲觀，則會使人走向毀滅。唯有悲觀後的樂觀，才是精神上的強者！片名叫《死屍死時四十四》亦係借咗近年新興起嘅宗教新紀元(New Age)其中一樣天使數字4444，喻意見到嘅人都係被天使們所深愛着，天使會為見到嘅人提供協助。我相信其實每個人都可以成為身邊人嘅天使，即使唔係唔係實質咁解決一個問題，但大家都可以互相扶持，有一個傾訴嘅對象，等大家去面對呢個荒謬嘅時代嗰陣唔會咁孤獨，咁先係齊上齊落而唔係唔上唔落。

推

推埋《命案》

用文學角度睇戲真係幾正

仲要估唔到可以咁對比

睇哂
解釋咗一啲睇唔明嘅位
但都係有啲深 哲學嘅嘢好難明