台灣真皮移植&UP雷射搞凹凸洞分享

香港好似比較少人做呢個手術，咁岩前排整左就想分享下。所謂真皮移植就係切自己皮膚既真皮層黎補面上既凹凸洞。真皮可以來自於屁股、耳後或其他，而我既醫生選擇用肚臍裏面既皮膚。

UP雷射

2019-2020年頭去過台北美上美做過兩次UP+磨皮，手術連藥膏、精華同人工皮大約要TWD 26000，準確數字已經唔記得左Sor…

我塊面既凹凸洞基本上都喺兩頰， 類型比較多冰鑿型 部分係車廂同滾動型。因爲凹凸洞比較深同密集，所以視覺效果非常嚴重 起碼社交距離下都可以清楚見到。有睇過美上美啲片應該都知個醫師打得好重手，我做完當日就算塊面痴住人工皮但血都不斷流 塊皮完全包唔住（甚至喺返酒店途中漏到我件衫同口罩都係，非常狼狽）好，言歸正傳。療程對冰鑿型有用，我指既有用係將冰鑿型磨成車廂型，凹凸洞依然喺度，只不過個口磨大咗，視覺效果無之前咁深 甚至平咗。總括而言，我推薦UP，但唔一定要去美上美做。加多句，UP打得勁復原期亦會長，要預接近兩個月塊面紅過馬嬲屎忽。

真皮移植

呢幾年無得出國就比咗段時間我思考究竟好唔好做UP第三次，因爲都想試下其他治療方法。機緣巧合入咗facebook個台灣凹凸洞group，入面啲台灣人都吹奏緊真皮移植，我做咗一年research就決定台灣開關後就火速做。

負責醫生算有名氣，台灣人多數要喺面診後等3個月至半年不等先可以做到手術。唔知道係我好彩定診所體諒外國人，姑娘特別安排我面診&手術同一日。真皮移植價錢因做既粒數而異，我自己手術加埋所有雜費total 約 TWD 38,000。

手術當日先見醫生問下問題，之後姑娘會幫手搽麻醉藥膏。等多陣就會帶你入手術室同醫生圈下要補邊啲凹凸洞，確定好曬就開始手術。首先醫生喺肚臍拎肉，基本上打咗支麻醉針就開始剪下切下（當然~過程無咩感覺 因爲都打咗麻醉）之後面既手術分三個steps：打麻醉針、皮下剝離同補凹凸洞。詳細點做我就唔多解釋，網上都有資料，最重要係手術過程我睇唔到（哈哈）

手術需時兩個鐘，出到黎塊面又腫又紅。護士交代一輪再幫傷口們痴膠布後就可以走，宜家做完手術已經一個禮拜，我都已經翻返香港。感覺塊面啲洞平咗（但要三個月後先settle），肚臍傷口有時扯住扯住痛。我希望今次補既肉可以留得翻曬喺度，有得揀我真係唔想再經歷多次。

計劃

若效果好的話，未來我想試下TCA cross處理一下毛孔同少部分手術遺留既凹凸洞，想問下有無人試過可以分享下？

Murmur

希望經過呢堆療程後我再唔需要怕餐廳或者鋪頭啲死亡光綫、唔再需要怕化妝都遮唔住既窿，更唔需要怕除口罩同人面對面交流。

幾時貼前後相

睇下幾個月後效果如果
差的話就del post

終於有人分享。
嚟緊都諗住去台灣做
我本身在新加坡做凹凸洞療程，做咗幾次，但改善有限，想試吓其他方法
我做過subcision + filler + Co2
大多係滾動同車廂

想問吓您台灣係點book? 我搵咗啲資料，打算去台南林政X同吳唯X

噢~我去左高雄吳醫生度做
吳醫生好好人又好溫柔
book的話就直接line聯絡就ok 你去佢個website正常就會見到

想知本身勁成點，令你有勇氣做咁多野，好佩服你
相信你啲皮膚會變得靚好多
Tca比起你做過嘅呢啲療程都係好小事，你係諗住出去搵人整定係自己整？

異體真皮唔好嗎? 點解用自體真皮?

可以變番無乜毛孔嘅皮膚？

肚既位置拎咗幾多？而家啲疤幾長到？

多謝你
Before After 相我之後再補翻
TCA 我怕自己手殘會點錯位
為免出意外 我都係揾醫生搞~
你之前做過TCA？

我早排都掙扎緊異體定自體好
但發現網上好多人反映異體好大機會被人體吸收
加上異體一啲都唔平... 我既case仲要異體+補脂配合治療
為左唔想曬錢曬血汗就揀做自體~

幾乎不可能
好返七至八成我已經好開心

大概0.6cm
因爲喺肚臍裏面 所以就算留疤都唔多覺眼~

希望唔好係失敗經歷

你喺邊度做co2呀？

lm

樓豬係做完up效果太細先做真皮？

有冇話兩者價錢相差幾多 見到人哋隆鼻都用異體真皮代替埋線

次序就先UP後真皮
好彩負責真皮嗰嗰醫生話做過UP對真皮移植有幫助
umm 唔可以話UP效果細
只可以話第一次UP進步30分 但第二次UP進步17分
所以想試下其他治療方法

up係每個月做1次定2個月
做一次紅2個月都幾煩 點出街

異體大概一粒TWD 2000-2500
我嗰間自體就一粒TWD 1600
但講緊一個凹凸洞有可能需要好幾粒
for your reference~ facebook group啲台灣人分享喺某間出名做異體既診所做異體+補脂大概需要TWD 10,000-14,000

因爲我喺台灣做UP 而且本身住喺香港
所以無可能做得咁頻繁
我之前嗰兩次UP相隔半年
正常好似隔三月做一次

又好似唔太貴喎 但唔駛開自己刀我覺得可以一試