關於喺機電署嘅三年工作，我大約會分為三個部分去講，分別喺面試，工作內容同埋返學，另外都會講少少其他行頭。首先係面試，機電署喺2021年開始轉咗新制度，將舊制三年同四年制換成新制二年制同三年制，所以我會著重講新制。我嗰陣報嘅話就係一月到二月嘅時候，機電署都會用技術員訓練計劃（前稱學徒訓練計劃）去招募「見習技術員」，總共有六個行頭，電氣、機械、汽車、空氣調節、電子同屋宇裝備，只要你中學畢業，就算冇5條2都可以去報名。
如果之後符合佢地要求，機電署會打電話通知你過去面試，會叫你帶面試所需資料，包括中學成績表，好似中四，中五，中六嘅成績表都要，如果有繼續讀書嘅話，FD，HD同埋Degree嘅成績表同埋畢業證書都要帶埋，跟著身份證，住址證明都要啦，全部都要有正副本，好似仲有其他要帶，但唔係好記得。
如果你同時見見習一級技術員(簡稱TT1)同埋見習二級技術員(簡稱TT2)，你會IN兩日，不過IN嘅內容其實係差唔多。我嗰陣IN嘅時間係四月尾到五月中，面試地點係機電署總部4樓，係一個會議室，面試嗰日會喺會議室出面有個工作人員撿查你帶嘅資料有冇漏，有漏之後要補交。另外佢會俾張紙仔你叫你揀6個行頭嘅先後次序，代表你想入邊個行頭多啲。之後佢地準備好就叫你入會議室，有兩個阿SIR負責面試，有一個秘書負責做記錄，仲有支cam會錄影成個面試。面試內容通常都係點解入嚟機電署、自我簡介、對你揀嗰行有咩認識等等，如果係讀過嗰行嘅HD會問你更深入嘅問題，唔識答唔緊要，千奇唔好亂答，啲阿SIR最主要會睇下你對行業有幾了解。另外有兩個必定環節就係讀一段英文同埋分電線顏色，主要睇下你有冇色盲或者色弱。我大約面咗20分鐘，之後返去等消息。
大約七月尾嘅時候，機電署打電話通知我話同時符合機電署冷氣同電子TT1三年制嘅要求，叫我二選一，但係我嗰陣仲未想入機電署，所以我就Reject咗。到我第二日打電話返去機電署話想報返嘅時候，已經得返電子可以揀，但係因為咁樣，我先知道電子同其他五個行頭嘅不同之處。呢個我會係工作嘅時侯再講，之後係8月簽約，9月返工。
之後就係返工，九月頭5日就係帶你認識機電署，包括帶你參觀機電署，介紹負責你嘅阿sir，通常係督察訓練組(IT)同埋助理督察訓練組(AIT)，點樣請假，有咩福利，攞工衣，ITMS點用，總之頭5日都係俾你熟習下機電署架構。
關於ITMS，由你入職嗰日開始，每日都要寫你當日學過啲咩，類似寫日記，不過都係一句起，兩句止。另外仲有一個每月報告，總結返嗰一個月做過啲咩，都係有reference可以抄。由12月開始個阿sir每個月都會見一次面，問下你學到啲咩，返得開唔開心，有咩不滿可以同佢講，不過做唔做又係另一樣野。每半年就有一次大嘅Monthly Interview，會有個總技術主任（CTO）嚟主持會議，有安全官講解安全，大約係咁。
跟著就係為期三個月嘅Basic Training，俾你熟習下工具嘅運用，分別有冷氣，鉗工，車鑼床，燒焊，電氣，電子，而呢3個月嘅返工地點係不定，不過車鑼床一定係九龍灣yc，燒焊就一定係葵涌yc，其他就係機電署sac或者九龍灣yc。課程時間除咗鉗工係18日之外，其餘課程都係九日。冷氣就係講解基本原理，中央冷氣，窗口機，分體機，打喇叭嘴，用黃氣燒銅喉;鉗工係教你基本工具應用，劃線、鋸切、鏨削、銼削、鑽孔和鉸孔、攻螺紋與套螺紋都有;車鑼床就係用車床同鑼床整零件;燒焊就教你風煤，電焊同埋鎢氣燒焊;電氣就係教電基本原理，拉線，屈鐵喉膠喉，簪線，pcb;電子都教基本原理，焊板，寫programme，課程內容大致係咁多。
除咗鉗工係18日之外，其餘課程都係9日。另外，機電署會有一日綠卡課程包考牌，有一日E & M GO，類似開學日，仲有半日身體檢查，係去私人診所檢查，全部都會喺Basic Training嘅時間表入邊。之後仲有兩日Team Building，即係歷奇活動，聽講係入職之前上，但係我哋嗰年係12月尾上。
完咗三個月Basic Training大約係12月中，就會開始每個人落組實習。新制就係一年一個大組，所以三年制會去三個大組，由於有一啲電子儀器得醫院先有，所以有一年必定係去醫院。每個大組嘅時間表係11.5個月，9個月，一年。機電署會根據你住嘅地方盡量派你去近你屋企嘅組，不過有可能會因為嗰個組冇位而派為你去其他地方，變咗住新界嘅人可能要出九龍或者港島返工，不過呢啲可以同阿sir斟酌，始終學徒係返8放6，返太遠係冇好處。但一定要喺落組之前講，唔好落組之後講，如果唔係佢唔會幫你轉。
最後就係講返學，如果你之前冇喺ive讀過電氣、機械、汽車、電子同屋宇裝備HD或職專文憑，入到嚟就要讀返，TT1係讀HD，TT2係讀職專證書。全部都係Part-time Day，一日全日上堂加一至兩日夜校。
TT1電氣: 電機工程高級文憑 EG314401
上課地點: IVE（黃克競）
TT1冷氣/屋宇裝備: 屋宇裝備工程學高級文憑 EG314702
上課地點: IVE（摩理臣山）
TT1機械/汽車: 機械工程學高級文憑 EG314701
上課地點: IVE（青衣）
TT1電子: 電腦及電子工程高級文憑 EG314403
上課地點: IVE（沙田）
TT2電氣: 職專證書（電機工程） FS312971
上課地點: 青年學院（九龍灣）
TT2冷氣/屋宇裝備: 唔知道需唔需要讀書
TT2機械: 職專證書（機械工程） FS312971
上課地點: 青年學院（葵涌）
TT2電子: 職專證書（電子及電腦工程） FS312981
上課地點: 青年學院（九龍灣）
TT2汽車:
之後就講下職學計劃，只有讀書嘅人先會有，你當係一個獎金，第一年係每個月2000，第二年係每個月2500，第三年係每個月3000，完咗職學計劃之後仲有獎金萬幾蚊，總數100500。另外，機電署會全額資助你讀書，嗰度啲學費都有幾萬蚊。換言之，有讀書嘅TT1人工係高過冇讀書嘅TT1。仲有如果你有啲科抄咗，機電署係唔會幫你出錢，補考或者重讀嘅錢係要自己俾。
最後我會講下點解唔好入TT2，如果你有HD或以上學歷就更加唔應該入TT2，無論你係商科又好，定係其他文科都好，因為讀HD嘅最低要求只需要5條2，其實每一屆都有中學畢業揸著5條2或者FD升上嚟，你有HD、ASSO或者Degree，學習能力理應好過佢哋，如果機電署唔收你TT1或者只係俾TT2 Offer俾你，寧願等下一年再報過。因為一入職人工已經低過TT1，而且如果你之後要繼續發展，你都係要讀返過HD，換言之你要讀3年職專再加3年HD夜校，總數6年時間先可以再升職。尤其係中學畢業都入到TT1，有HD，Degree更加唔應該入TT2。如果你入咗TT2發覺中咗伏，係可以辭職，但係機電署會有一段時間唔會再請返你做學師，呢個係我聽負責我哋嘅阿SIR講，所以唔好做啲反智行為。
