1. 金順蘭州拉麵(屯門)
香港元祖蘭州牛肉麵舖，開咗接近廿年，老細老婆蘭州人，廿年前返蘭州探親向老婆屋企附近嘅蘭州牛肉麵舖拜師。味道方面，唔算最正宗，為符合香港人口味做咗好多調整，譬如辣子係自己𢳂、芫荽得一殼仔、加咗椰菜；另外仲有好多「港式」配搭，例如牛丸魚蛋等等。湯底強調冇加味精，口味比較清。雖然辣子係自家製，但個人認為味道上唔太夾個湯底。不過老細前幾年因為拉麵拉得多，隻手勞損到好難再拉，所以呢家依家用上海麵代替。雖然用上海麵代替，但佢啲貨入得好，雖然冇咗拉麵嗰陣口感，但麵質依然非常彈牙。推薦煎餃麵，餃子係自家包，係我食過最好食嘅煎餃。記得餐飲要黃蓮薏米豆腐花，都係自家製。
評分：3/5分
2. 亞谷特蘭州牛肉麵(天后)
湯底鹹到口乾、麵未撚煮熟、仲要賣成$70，一個字：垃。永不推薦。
評分：0/5分
3. 在蘭州(深水埗)
係香港最正宗嘅蘭州牛肉麵。正宗嘅蘭州牛肉麵講求「一清二白三紅四綠五黃」，即係湯要清、白蘿蔔爽口、辣子紅而不辣、灑上蒜苗芫荽、麵條筋道且黃亮，呢間舖頭樣樣到做到。佢哋大辣只不過係三哥二小辣程度左右。記得問佢拎醋，食嘅時候一路食一路飲湯，食完麵碗湯剩一半嘅時候加埋啲陳醋落去再飲晒啲湯，簡直係人間享受。順帶一提佢啲豆漿係自己用機磨，甜度比市面上豆漿低好多之餘唔似維他奶有陣酸味殘留喺個口度，值得推薦下。唯一美中不足係只有牛腩同牛腱兩個部位供應，啲牛腩偏冧，所以食落爭少少口感。同埋記得加肉($10)
評分：4.5/5分
會試在蘭州
