(Sorry嬲到無影相 要openrice cap圖比大家睇)
話說今日晏晝想食餐好啲 見到海港城新開嘅花圖 Voynich好似幾靚咁 所以就去飲茶 入到去間餐廳都係得幾枱客
我自己因為宗教原因開始素食大半年 一路都好小心 朋友唔係食素 所以係有叫一個有肉嘅點心 但其他嘢我都有問清楚唔係素食
今餐分別叫咗
叉燒餐包(朋友食)
牛肝菌包腸粉
姬松茸鮮竹卷
咕嚕素肉
可能因為佢新開 侍應都好似唔係好熟 間餐廳都無比我地睇番我地叫左乜
雖然我見佢哋都好似新手，但都係諗住食餐飯姐，唔使咁敏感啦 但係我而家就好後悔
我本身都想嗌一個油雞縱菌炒伊麵(唔記得全名係乜)咁我都有同一直serve我嘅男侍應講我食素 想問個餸係用”油雞菌”定係有雞同菌類？嗰男侍應都好正常 同我講個汁係有肉，所以無叫
然後我見你一個點心都收我78蚊 普洱茶都收我一壺$70 裝修又好睇 又係集團式經營 咁我都冇諗過啲侍應可以會出啲咁大鑊嘅事
當佢上咗個腸粉嘅時候 我見到係腸粉皮包住全部萵筍(樣係op cap果碟) 同埋一粒好細粒啡色嘅嘢 咁我都不以為意食咗一嚿 食完之後我覺得口感非常之怪異 好似有浸肉味 所以我都即刻冇食到 然後到我朋友食咗一舊嘅時候 都覺得好奇怪，所以我哋即刻叫咗另一位侍應過嚟問 ，double confirm呢個係唔係牛肝菌腸
嗰個女孩子都好盡責 去搵返當時響吧枱做緊嘢嘅男侍應問 我枱上嗰碟係唔係牛肝菌 我見住個男侍應向我枱嘅方向，望一下之後同個女仔點一點頭 於是個女仔就行返過嚟同我確認呢個係牛肝菌腸粉
我見有咁多人幫我confirm咗，所以都放低戒心，食多一舊 但係嗰種怪異嘅感覺實在太奇怪
所以我最後都係問多次個男待應，究竟呢個係咩腸粉？
呢個時候就係我最震驚嘅時候 嗰個男侍應好firm咁同我講 呢個係鵝肝腸粉 我真係呆咗唔識反應 為咗一啲原因，由我本身好鍾意食肉，忍咗大半年食素 然後你而家同我講 我食緊嘅唔單只係肉 仲要係鵝肝？ 我真係嬲到爆喊出嚟 即係鵝肝同牛肝菌都爭好遠啫 點解你可以咁不負責任 出錯嘢都不特止 仲要我問多次你嘅時候你照confirm我係牛肝菌 然後等我第三次追問既時候先再輕飄飄講一句係呀鵝肝嚟㗎 我大半年嘅心血就係咁樣破咗戒冇咗
退一萬步講 如果有人食物敏感 講咗佢唔食得嘅野 你照serve不特止 人哋問你係唔係果個食材嘅時候你咁求其回應 係真係會食死人
呢個時候，應該都驚動到其他食客 (真係唔好意思) 之後有個大粒啲嘅經理都出嚟道歉 話佢會有機會親自serve我 問我有咩要幫手 我都係喊完之後就衝咗去廁所扣喉嘔返所有嘢出嚟
我只係想講，其實你點賠俾我都冇用，我亦都唔係貪你嗰一餐，只係希望你哋可以吸取教訓，唔好再咁樣對啲食客 因為你哋一時大意 真係有機會搞到人冇命 麻煩俾多啲培訓 唔好再懵吓懵吓 最少都要對自己上既菜負責任
至於我只好去誦經 求上天原諒我啦 唉
#花圖 #大伏
