荷里活動作大片《John Wick 4》將於3月23日正式上映，於劇中飾演盲人刺客Caine嘅甄子丹日前接受外媒訪問時大爆，指該角色起初充滿亞洲人刻板印象，同導演反映後先變到而家咁時髦。
甄子丹日前接受《GQ》雜誌訪問表示，荷里活對亞洲人存在刻板印象，亞裔演員總係會被塑造成睿智武士、嚴厲將軍或者係單調嘅反派。並以《星球大戰外傳：俠盜一號》為例子，表示當年所扮演嘅Chirrut Îmwe就係一位刻板嘅典型大師、不苟言笑，所以佢向劇組提議將角色「整盲」，同時賦予幽默感。
然而甄子丹拍攝《John Wick 4》時亦遇上類似情況，佢所飾演嘅盲人刺客起初並唔係叫Caine，而係「Shang（尚）」或「Chang（張）」，令佢不禁質疑：「點解要叫尚或者張？點解唔可以有一個正常啲嘅名？然後戲服又係中山領（Mandarin Collar）？點解一切都咁冇特色？」甄子丹認為《John Wick》入面每個人都應該有型又時髦，點解得佢唔可以有型時髦呢？於是向導演Chad Stahelski提議修改角色名字及造型，並加入對偶像李小龍致敬嘅元素。
話雖如此，但甄子丹強調自己並非批評《John Wick 4》，只係道出荷里活有呢個現象，工作期間亦備受尊重，好享受整個拍攝過程。今後接拍電影時將會更加謹慎，考慮該角色會否太過普通、是否尊重中國文化等等。
