有無人可以分享下照顧老狗心得？

我隻狗狗啱啱14歲
12歲之前都係超級活躍又乖 又無乜大病痛嘅狗狗
12歲個時發現佢有乳線癌 係初期
醫生話割咗就無事
但做完嗰次手術之後 狗狗就開始有老化嘅感覺
訓多咗教 出完一日街會好攰 反應慢咗 無以前咁聽指令etc
上年年中佢整親隻腳 之後一直都好唔返晒
行路有時會拮下拮下咁 但都算行到路同照常散到步
但都feel到佢更加容易攰
同時我個人變到好神經質 有時半夜會起身睇下佢有無咩問題 仲有無呼吸⋯⋯
今日初一帶咗佢去親戚度拜年 成個下晝都好地地
返到屋企小睡一陣之後 打算叫佢起身食飯
佢無啦啦尖叫 再掂佢一下又尖叫咗一下
放佢落地行又好似懵懵地咁 企咗喺度唔識反應
過咗幾分鐘後又正常返 又好活潑咁喺度行嚟行去

然後啱啱訓教 又無啦啦尖叫一次醒咗 （嗰時屋企人有發出頗大嘅聲音， 可能嘈醒咗佢）
之後又無事咁訓返

我google 咗無數個可能 睇落最似係發惡夢⋯⋯
當然我唔係醫生 但今年年頭先做完general body check 佢就乜指數都好正常
所以唔想尖叫兩次就去睇醫生住

想問下有無人有照顧老狗嘅心得可以分享下？
呢一年幾以嚟 我變到好神經質
狗狗有少少嘢我就會勁緊張
同完全唔放心第二個人去睇住佢(even屋企人）
但其實佢無乜實質嘅病同精神食慾尚算好好
我驚我咁神經質會搞到無嘢變有嘢

PS. 知道too long 但打打吓變到咁長
Say 個sor 先

始終做過手術，落過麻醉，對狗狗都係會元氣大傷。人都係一樣，尤其係佢已經老齡。
同埋都要慢慢接受佢開始老化，未來只會愈來愈多毛病，我地無得期望佢變返以前咁，只可以減慢老化速度。

只能夠接受 由養果一刻你就預左會有呢一日 珍惜同佢相處既最後時間啦

明呀 但無諗過老化得咁快😭
其實養佢個時都有心理準備（領養返嚟 養嗰時都5歲）只不過當真係要面對個刻都係好無助同心痛
而家諗緊畀唔畀滴雞精佢食
淨係想佢精神好啲

明嘅 我每日都係咁安慰自己
但都抑制唔住自己太過緊張同擔心
真係未識好好咁調整自己嘅心態

不過啱啱都睇咗一篇台灣嘅文章
話記錄低我哋之間開心、感恩、同對唔住嘅時刻
咁就會更加珍惜同 唔洗到分別嘅時候 措手不及咁

道理我都懂
但真係對面對嘅時候
係無論做咗幾多心理準備都係會心痛同無助

尖叫可以好多種原因，發惡夢係其中一種。但都有可能係因為痛或者唔舒服，例如有內傷/整親手腳，前者其實估唔到，後者有機會係年紀大而髖關節退化，自己整到自己又可以叫，起唔到身又可以叫，建議可以食supplement減慢老化速度

另外都有可能係聽力/視力衰退，佢喺感知唔到你喺附近嘅情況下突然被觸摸都可能會嚇到叫 (視力問題方面白內障好常見，不過狗狗年紀大都未必適合做手術) 。可以嘗試唔好喺後面攬佢，喺前面俾佢聞到/sense到你，咁佢會有安全感啲

亦有可能係因為失智，特徵係會日夜顛倒、半夜喺度叫、認唔到人/路、冇咩反應、隨地大小便、原地冇目的地轉圈等等。呢種情況基本上都冇咩做到，要貼身mon住

雖然唔知係咩狗，但14歲in general都已經係好大年紀，要調整一吓自己心態，其實佢每活多一日都係bonus，唯一可以做嘅就係盡量陪多啲攬多啲，俾多啲佢鍾意嘅嘢食

好多謝你咁詳細覆我呀

咁我都詳細啲覆睇下有無多啲睇法

我隻狗狗係poodle 嚟
有白內障 但唔係超級嚴重 隻眼仲睇到野嘅
有關節問題 （就係上文講隻腳會拮下拮下 之前睇醫生照過x ray 無骨折，之後打針同食消炎藥有用，所以都應該係關節問題）
本身都有食開眼同關節嘅supplement
你話惡化咗唔出奇嘅 但今晚仲同佢散步都好正常
所以唔知點解會尖叫
失智症又應該唔係 因為佢之後人哋叫佢個名佢都有反應
同埋佢都認得去廁所位置

我都知14歲其實真係老狗嚟架啦
但因為佢之前真係好精靈所以見到佢一時間退化真係未接受到同好心痛
講緊佢今日仲喺屋企跳嚟跳去 跳上梳發（你知架啦 係捉佢唔住）
所以我事前做咗幾多心理準備都好 當要去面對都係未慣呢件事

但睇咗大家嘅comment 我都明白除咗珍惜同對佢好啲
都無乜野可以做😢

暫時聽你咁講就唔太似失智，不過失智係慢慢嘅，最好都食吓supplement希望唔好發生/或者發生都唔好太嚴重
反而要開始注意吓唔好俾佢跳咁多，年紀大易整親，上上落落抱多啲好啲
同埋手腳老化，由本身跳上跳落好輕鬆變到跳唔到佢自己都會唔開心
食嘢方面就佢鍾意食咩就適量地俾多啲囉，都年紀大而家唔食等幾時

老實講如果佢係失智 變到on99咁就算幸福啦

最緊要行得走得訓得食得