同個一齊左十一年既女朋友分左手

希望有相類似巴絲睇完 可以互相鼓勵下
繼續開展自己人生既下一頁

最近聖誕節發生左件對我黎講人生好大既事
就係同我一齊左十年既女朋友
因為佢覺得大家價值觀唔同覺得唔適合同我分手
但大家一直到而加都係相愛緊既
但佢堅持要係呢個時候分手 佢覺得咁樣對大家係最好選擇 無論我講乜做乜 佢都係堅決要離開
都確定左係唔關任何第3者事

我地係讀書果陣識 一直拍拖去到中學/大學
到而加大家出黎做野都係長期熱戀期
雖然我地唔係果種攬頭攬頸錫錫既情侶
我地連出街都好小會拖手 只係平排一齊行
但係大家係會feel到好愛對方
我地好鍾意大家 好岩玩岩傾
我就係果類圍住女朋友轉 無乜朋友無乜同事既人
日日見佢日日同佢出去玩食野做運動跑步
係直到今個聖誕節 突然之間就發生件咁既事
我係完全預計唔到
我一直當佢係結婚對象 佢係比較鍾意出去玩既女仔
鍾意自由鍾意識朋友圈子 雖然同我叫做完全相反
但大家一直以黎都係有互相遷就包容 十分開心

我一直好自豪有個咁樣既女朋友
雖然佢係會成日口講嫌我煩長氣 又唔會成日好似個女仔咁關心我 氹我 但呢d都唔緊要
佢又唔算係太港女
唔特別追名牌 唔會管住我
情人節生日唔會要求要咩名貴野
食d咩高級餐廳 同佢食餐佢鍾意食既野佢就會好開心
我地係會互相取笑 好似朋友咁既情侶
我同佢既生活就係簡單而又開心咁過左十一年

佢根本係我命根 而加同拎我條命係無分別
我所有精神時間心血都擺晒係佢度
我會幫佢洗衫浪衫摺衫著衫著褲
生活有咩問題我會幫佢解決 比意見佢分擔
佢返工我會車佢 佢放工我會車佢
有時佢返一d自己唔鍾意既工
我會一早渣架7人車去佢屋企車佢返公司附近
同佢食早餐 希望佢會返得開心d有動力d
雖然可能大家會話咁樣做多左
但愛一個人有時就係咁盲目做多餘既野 想佢開心舒服
但係而加連呢d車佢接送既野佢都唔再比我做
要劃清返個界線
一諗到曾經既習慣 咁普通既舉動 而加都變左奢侈
我想做都無得我做 就眼淚不停流
即使我地一齊就咁耐
我每日都會盡我能力去impress佢 氹佢開心氹佢玩
佢做咩我都會支持佢 幫佢

一齊左咁耐 根本已經成為我個人既一部分
佢改變左我好多 教左我好多野
最緊單講 我連食壽司都係因為佢介紹我先開始食
而加去邊都係佢既身影 因為我地去過實在太多地方
去港島 又係同佢行街返工去過
去九龍 又係同佢周圍玩過
就算食米線食M記又係同佢食
又係諗起佢 而加自己一個食野
都會一路食一路望住對面個位係度喊 我知好weak
曾幾何時 成日想發達 住大屋買貴錶貴車
去到而加呢一日 我竟然無晒呢d慾望
直情係覺得你送比我 我都唔會開心

好啦以後無人再同我周圍去 周圍hea
曾經諗過既求婚計劃 都唔再需要了
曾經諗過既一齊移民生活 都唔洗諗了
我唔知點解佢可以咁狠心 我呢句說話唔係怪佢
我而加每日既願望就係可以返去之前既日子
返黎我身邊


可能大家會話時間沖淡一切 你遲d就無事架啦
我唔會 我呢世都會記住你 我愛你愛埋你既缺點
而加我唯有盡量放低
但有時我都會渣車去返d我地去過既地方
懷念下一齊行呢個地方既時候
唉有時我仲會渣車兜入去佢個屋苑度 兜個圈出返閘咁
好似之前送佢出入咁 我知好傻
但都叫做個心舒服左小小

希望有類似經歷巴絲睇到 會知道有人同你身同感受
大家一齊捱過 又或者有巴絲拍拖係短過10年
希望你地會覺得 人地10年都要咁捱過 自己都一樣得
祝大家有情人終成眷屬 生活愉快順利