4）關寶慧
「鬼后」關寶慧由10幾歲開始見鬼！多年嚟有豐富「經驗」嘅佢，估唔到喺片場被一對「鬼拖鞋」嚇到魂魄唔齊！日前關寶慧接受《蘋果》訪問，親述步步驚心嘅恐怖經歷！年半前關寶慧拍戲做傭人角色，出動私伙拖鞋拍攝：「我屋企有對拖鞋，好啱呢個角色。我着咗對拖鞋一日，拍完後畀劇組保管，第二日開工，一邊化妝一邊着鞋，但左腳叉咗三、四次都塞唔到入去！我覺得好奇怪，係咪拍戲顛倒日夜個人水腫呢？一望，我隻腳完全冇腫過，再望清楚，我着37號鞋，叉唔入隻左腳拖鞋，無論長度同闊窄都縮細咗！」
有豐富「經驗」嘅關寶慧，當時覺得有問題，相信同古靈精怪嘢有關：「於是問服裝，呢對係我嘅拖鞋？有冇攞錯人哋嗰對畀我？會唔會擺喺曬嘅地方，令呢對膠鞋縮細咗？服裝話冇！於是我第一時間唸經，有生以嚟我識嘅經文都唸，但其實我係驚到不得了，因為我從來以嚟，冇見過實物喺我面前變細，而又解釋唔到，好記得仲問其他演員，見唔見我拖鞋變細35號？演員同導演傳對拖鞋睇，傳完之後冇聲！」
因為臨時買唔番拖鞋，關寶慧局住着拍咗一日：「好記得因為左腳細咗夾硬塞入去，着到左腳痺，拍到夜晚11點已經唔安落，唔想再着住佢，我打電話畀師傅問點解？師傅話：『搵到代替品盡快丟咗去，我會幫你做啲嘢。』我唔想畀『佢』聽到我講緊『佢』，咁我就唔再講，第二日朝早再問師傅乜事，佢話有隻嘢匿喺我拖鞋8年！」
呢對拖鞋係09年關寶慧喺海南島拍劇時買：「原來我將佢帶返香港，佢匿咗喺度，師傅話佢覺得係時候要出嚟，其實喺香港，我擺埋佢喺櫃度好少着，師傅話佢一路都想出嚟，直至o依家見到天日，佢想走出嚟！」其實當年關寶慧買咗呢對拖鞋兩三日，都有怪事發生：「當時住五星級酒店，瞓完覺一起身，手掌有粒同蚊癩差唔多大物體，好痕，由街買藥粉到吊鹽水，冇好過，仲要每日變大，最後穿咗變五毛子大嘅窿，不斷標啲水出嚟，但冇血，劇組見到都開始驚，我請咗兩日假返香港醫，皮膚醫生問我乜嘢嚟？佢話解釋唔到，幫我打消炎針同藥膏，好在開始好番。」
