Candy在片中分了7個標題逐一回應，其中第5個就是「處心積慮3月17日的照片在4月1日發出」，所講的就是在愚人節當日發相鬧爆鍾培生父子。Candy指自己其實忘了當日是愚人節，她說：「我做咗10幾年公眾人物，都無話公開咁樣講人哋唔啱或者講人哋唔好，其實嗰日就真係失咗啲理智啦，因為唔開心喊得幾犀利嘅。咁但係咪鬧人渣？我就無一個咁凝重咁harsh嘅字眼，即係喺我哋人常會話中意思就係衰人多少少。但係始終對佢哋唔好，對我又唔好啦，特別去到我呢個年紀，應該更加成熟去處理，都係我嘅錯啦，最大嘅錯都係我啦。因為其實我應該揀得好啲，即係揀人做朋友要揀得好啲，同埋我真係放低咗戒心，搞到自己幾傷心同嘥咗幾多時間，咁呢個都係我嘅錯嚟嘅。」
Candy解釋當日會截了那張圖是因為她從未見過鍾培生這麼高，她見到覺得幾好笑，於是便截圖了。她又談到與鍾培生的關係說：「嗰陣相處都ok，雖然有啲嘢我係忍緊，但係就未話喊咁樣嘅。但係後尾就太唔開心，都喊得幾犀利咁，就咁樣發生咗件事。其實嗰陣係有人主動嚟搵我，就話鍾意咗我好多年，終於想識我喇。一開始其實都覺得唔啱㗎喇，因為大家嘅諗法同性格都好唔同，就希望慢慢轉化變咗做一個細佬咁樣啦。咁但係唔係即刻可以轉化到，同埋唔係咁容易轉化囉。」
Candy又表示：「喺呢段關係中100%係由人哋主動提出，由人哋主導。我都知香港係個比較實際嘅城市，有時候個意識形態都會覺得有錢嘅男人就係筍盤，但係我就會着重彼此嘅性格同想法係咪合適同合拍，因為日日都要對住嘅時候，你同佢講嘢溝通都唔係咁好，咁就真係無必要去發展。其實當時就一直保持住一份理智嘅，但係後尾到4月1號就失咗理智咁樣。」Candy又講到有指鍾培生對她「提供經濟援助過百萬，每次20幾萬」，又有報道指她「宣佈自力更生從頭工作」，對此，Candy表示：「我想講，佢未出世我已經做緊嘢。」
Candy自言她13歲便開始靠自己打工賺錢：「我一路都慣咗靠自己，無話渴望人哋去幫太多。其實講真我自己性格本身係好怕人哋成日都講錢嘅，即係下下都講錢嗰啲人我係好驚㗎。今次係幾可惜啦，好似出到嚟嘅感覺係我貪人哋錢呀，我下下同人哋講錢呀，其實就真係唔係囉。」強調並沒有貪對方錢。
