事源係半年前倒，小弟身邊有個同學嘅朋友約我一齊食飯，佢好熱情咁介紹一個課程畀我地，聲稱幫助人成功、開發自我潛能，實際內容其實我都唔知道，佢就只係透露入邊有好多體驗式遊戲。本來我reject咗，但我朋友好有興趣又好想我陪佢參加，介紹人又話唔介意出埋錢畀我哋 （原因睇到後面就會知道點解），最後我參加咗，可以話係陪我朋友，順便睇下佢哋搞乜，但係我真係估唔到原來所謂嘅人生課程就係精神傳銷（即係當學員係水魚再幫佢地搵更多水魚）。
課程內容如下：
導師名稱：林希樺 Elsa Lim
（呢條臭西我本身都唔知佢乜水，第一日見佢就不停吹噓自己，又話自己上過tvb，保險公司做過導師，又話好多人敬仰佢...）
公司名稱：無
（後來去告佢哋嘅時候都唔願透露公司名，好可能違法經營）
課程名稱：ELA、EMT
（課程名隨時都可以改，聽聞都改過幾次，最緊要認清佢地嘅手法）
時間：
ELA（連續三個工作日夜晚、兩個全日）
EMT（三個月，每月安排一個週末上堂）
學費：HKD13800
（仲要話係優惠價...）
地址：新蒲崗大有街34號新科技廣場8樓20室
（間黑店係位於新蒲崗嘅工廠大廈，場地三百呎倒，封閉空間(冇窗)，空氣混濁，仲要因為疫情戴住口罩，十幾個學員逼埋一個咁細嘅空間，非常壓迫）
而家就開始講呢件事情嘅經過...
第一次去個度，姓林個條臭西係咁吹到個課程有幾把炮，話上晒課程之後「畢業」就可以做「義工教練」（好聽叫做免費幫佢地拉客，難聽啲講衰過做奴隸，簡直助紂為虐。但真係有啲on9仔想做，覺得係一種榮譽，覺得自己高等啲，有優越感，因為現實中係失敗者，呢度攞到存在感。最大問題係呢班人完全冇專業認可，搞到人有精神問題都可以隨時拍拍囉柚走咗去，仲覺得自己做緊一件正義嘅事）
之後條臭西仲話參加呢個課程係有一個口頭上嘅保密協議，要學員必須遵守規則，包括唔准向外透露課程內容，包括家人、朋友、同事，否則就唔准繼續參與，而且唔會退返錢畀我哋（原因唔使多講啦，逢親叫你唔好同人講都唔方好嘢）
所謂嘅激發潛能就係一連串洗腦活動，令我諗起以前保良局訓練營個啲變態野，首先踩到學員一文不值，再同我哋洗腦要對團隊忠誠、負責任、信任、貢獻等，看似好正面係咪？其實涉及好多自我否定（有人因為咁樣患上精神病而自殺都有），目的都係為咗令到學員信任佢地，從而控制學員嘅行為。
有一個好惡毒嘅催眠，成個過程45分鐘，係咁嘅，條臭西叫我哋合埋眼坐喺地下，昏暗燈光配上強大音效，佢就開始催眠，引導我哋回憶自己過去生活上遇到嘅傷害、痛苦，令到成個氣氛充滿悲傷、怨恨，有學員情緒失控（首先，催眠呢樣野，喺未經當時人同意下進行，已經係好唔道德嘅行為，仲要動機係為咗操控學員）跟住就播放溫馨嘅音樂，叫大家圍埋一齊擁抱、跳舞，氣氛由頭先悲傷瞬間變成感動同溫暖（即係一啖砂糖一啖屎，突如其來嘅情感變化係好容易令學員產生情感依賴，令到學員覺得呢度好溫暖，其實係假象）
之後有一個更加惡毒嘅催眠，發生係之後一日，呢個遊戲叫做「沉船」，同樣要求學員合埋眼坐喺地下，昏暗燈光之下，引導學員想像，喺一個豪華遊輪上面開party，突然撞到一座山就快要沉，而救生艇只係坐到3個人。然後要學員逐一用雪條棍投票邊個可以上船，如果唔投票比對方，就要大叫：「你唔值得我投你一票，你去死啦」，然後對方就要大叫：「我死啦」，啲導師同教練好似喪心病狂一樣：「點解佢唔投你票呀？你反省下自己」「喂！得兩個人投你票咋！你有無諗過點解呀？垃圾！」（呢個情節係要嚟摧毀學員嘅自尊，運用情緒綁架嘅心理手段，踩完你再同你講我地都係為咗幫你，目的唔使多講大家都知佢地咩料喇）
連續一星期轟炸式洗腦，大家都處於極度疲憊之中，人喺疲憊狀態下難以正常思考，好容易冇經思考就接收晒佢地嘅信息，仲要唔准學員用手機，同外面世界斷絕咗。有啲學員已經俾佢地洗咗腦，變得激動、亢奮，思維單一，接受唔到任何對呢個課程嘅批評，咁當然都有啲人係清醒離開咗。
我多次同條臭西理論，佢都冇正面回應問題，串柒柒咁：「你有咁多不滿可以離開」，又叫我唔好阻住大家，但又唔肯退返錢。真係好嬲，呃錢都不特止，仲要搞到其他學員好似撞邪咁。我想揭發佢地，所以暫時都未離開。
之後佢哋進一步嘅策略就係利用我哋幫佢哋拉客，佢地嘅術語稱之為「3C」同埋「er」（enrolment）， 最嘔心嘅係佢地包裝到成件事好偉大，將你啲親朋戚友比喻為被遺棄嘅海星，拉佢地上課程就等於拯救生命一樣。當學員搵到水魚，就好似英雄咁俾佢地捧到上天，搵唔到嘅話？踩到你一文不值，再呃呃氹氹，搵人同你比（呀邊個而家都成功幫到佢朋友喇），俾壓力你（團隊需要你呀...我睇好你㗎，你做唔掂團隊會好失望）
跟住佢哋班含家鏟用kakaotalk呢個app開咗一個群組，要學員每日於下午12點前，上傳自己手寫嘅行程表（佢地叫target call），同埋夜晚12點前，上傳自己手寫嘅result call，即對當日表現嘅反思。仲要學員隔日喺特定時間打電話比教練，匯報每日嘅行程（目的係監視學員，打聽學員身邊嘅人脈，從而慫恿學員去撈更多水魚）
咁事情發展梗係唔會畀佢咁順利啦，兩三星期後都冇乜進展，教練就不斷斥責我地不負責任、一事無成......條臭西於是就搞咗個侮辱人格嘅活動，佢聲稱可以建立感情喎（暈...懷疑佢有精神病）。另外兩條臭西（一條叫Annie、一條叫Annisa）要學員企出去畀其他學員侮辱人格，如鬧得唔夠大聲，就認為你對buddy唔真誠（btw 唔明點解識咗幾日就buddy前buddy後，呢啲叫真誠？）
跟住個條叫Annie嘅臭西唔知係咪精神病發作，定係學人做導師做到衝昏頭腦，竟然爆粗又鬧人垃圾：「屌你老母！咁簡單都做唔到...」，當時我忍唔住，質詢佢嘅教學方式，佢回應：「你估我想鬧你地㗎？你地做得好就唔使要導師啦！你做導師吖不如？知唔知我為咗你地好先鬧你咋？」吓？！我真係唔知呀，乜原來而家啲人生導師係咁㗎？我好驚訝！
佢廢到質問返我地：「咁點呀？你地團隊完㗎啦？解散㗎啦？」「搞唔掂呀，唔識教你地...」跟住又呼呼喝喝，又侮辱我地，令到學員情緒高漲，場面好混亂，跟住有兩個學員起爭執，起勢想打人
唔明點解一個課程搞到學生咁暴力仲有人覺得冇問題。而家啲導師淨係識得橋埋雙手坐喺度大嗌，滿口歪理，恃住自己有權力，就用群眾壓力去迫人服從，奴性幾重嘅人先會認同佢哋
（前排最左：Annie，青山走犯學人做導師，遺害下一代）
當日最後一個環節，就係要每個學員做到3C先可離開（即拉親朋戚友上課程），仲要求每個學員企出去宣告下星期做幾多個3C。我同幾位學員都拒絕宣告，而佢地嘅指責都係千篇一律：「你唔負責任」、「你唔關心朋友」、「你唔放你朋友在眼內」等操縱人心嘅說話，我表示：「鍛煉嘅方式有很多種，點解一定要做3C？」，每次當我嘗試挑戰佢地，佢地都係以封閉嘅態度回應：「請你遵守遊戲規則，百分百服從，信任我地團隊，否則就請你離開」，呢啲人做導師只會生產更多奴才...
之後我都冇再虐待自己，係嗰啲地方智商都會俾佢地拉低埋。之後我都從個度嘅人口中得知唔少動向。
其中有一個危險活動，叫做「模仿盲人」，二人一組，一個戴眼罩蒙眼走出街，另一個扮啞唔講野，負責帶路，要學員由工廈出發搭升降機落去大街蒙眼走去荷里活廣場，途經幾條馬路，仲話好安全，佢聲稱係為咗加強buddy之間嘅信任喎，仲話確保安全係你地學員嘅責任嚟（吓？！導師嘅責任就係叫人負責任？好無恥，如果過程中有意外，肯定佢地一分錢都唔會賠，淨係識射個波比學員！連人命都唔重視嘅人做導師係有幾恐怖...）成個過程佢地三條死臭西就留喺工廈入面un un腳。
後期我聽聞佢地每個禮拜都玩一堆分組比賽嘅遊戲，on9到小學雞都唔會玩個隻（facebook開post鬥多like、做掌上壓...），令我驚訝嘅係啲懲罰，竟然懲罰學員食蟲，同埋幫教練洗腳（嘔血...）
呢件事睇到啲人有幾偽善幾刻薄，原來呢個世界有啲人生導師可以咁仆街，用洗腦催眠令到學員失去理性思考，然後扮演神嘅角色假裝拯救你。我見到畀人洗腦嘅人都係迷失咗自己，唔知自己做緊乜，盲目咁服從佢哋，實在好可悲，利用人心嘅脆弱賺錢，係最卑劣嘅行徑！
喺呢度我只係講述我呢個經歷同埋發表自己意見，實在太憤怒。最主要都係想多啲人了解，引以為鑑，唔想再有人落入呢啲陷阱，浪費金錢浪費時間，仲要俾人情緒綁架。所以我真係希望有多啲人關注呢啲課程嘅問題，唔好畀佢哋遺禍人間。
推
