今日想介紹嘅書係 本土研究社出版嘅新書《棕須一變》
顧名思義，本書就係講香港嘅「棕地」問題
相信大家睇新聞都成日聽到「棕地」呢個名詞（呢個概念家喻戶曉，本土研究社都頗有功勞）
但係究竟定義爲何，同香港嘅土地房屋問題，乃至城市規劃、工業發展又有乜嘢關係呢
本書都有觸及所謂棕地，就係講緊新界鄉郊地帶破壞咗或者平整咗嘅臨時作業用地，民間統計2021嘅時候面積將近2000公頃，其中近7成位於元朗；近20年嚟面積不斷增加，有唔少都係未經批准更改土地用途嘅農地以及綠化帶，好多時候都係「先斬後奏」製造既定事實，有理無理倒咗啲泥頭垃圾落啲農地度先，反正拖拖下政府就會批准。
https://liber-research.com/northern_metropolis_brownfield/
呢段時間入面，啲地可以租出去做做貨櫃場、回收場、停車場，油水相當豐厚。
但係棕地問題其實唔係近來先出現。
我嘗試將本書嘅內容按返歷史時序鋪排，方便理解
首先，少少歷史背景
1898年，英國喺北京簽訂《中英北京條約》（《展拓香港界址專條》），向中國政府租借新界（包括九龍北部至深圳河及235個島嶼）。租借期由1898年7月1日開始，為期99年。由於新界係租借返黎，並非如港島和九龍半島般被割讓，不宜將居民大量遷徙，而且好多新界居民仍然反對英國統治。所以英國決定，新界居民只須提供他們嘅土地擁有權證明，就能得到該土地嘅業權。
為咗登記資料以方便進行土地管理，港英政府喺1899年去到1902期間，對新界做咗大型土地測量。
結果將土地分咗做唔同區（District），區入面又分成唔同地段（lot）。一般嚟講一個區係由一個家族擁有，租契係成個「區」而唔係逐個「地段」持有人噉畀，所以呢啲契約就叫「集體」官契。新界大約有7-8成私人土地，都係以集體官契批出。
重點嚟嘞
呢啲官契都有字句，形容下塊地係點樣
例如「這塊形容爲租用作農地/花園的地...」(“hereby expressed to be demised as agricultural or garden ground”)
問題係呢啲描述，究竟有冇約束力㗎呢？係咪代表噠地租咗出去之後，就要keep住原先描述嘅用途不變呢
港英政府一直覺得係有約束力，並且以此爲基礎，管理新界嘅土地；喺80年代之前，法庭亦都認同呢種理解
不過呢個法律含糊位，就埋下日後轉折嘅伏筆
二戰後，香港人口增長，土地需求增加。加上中國參與韓戰，畀英美實施禁運，香港要發展本地工業。當時市區工廠租金又貴，新界農地地主就將啲農地改做住屋或者起山寨廠
由檔案可見，當時港英政府內部亦都有唔少討論，指呢啲山寨廠無序發展，有各種安全隱患，繼而有所謂「指定工場區」嘅構思，類似蚊型嘅工業區，主要係畀啲需要大量儲存空間、但係無乜污水廢氣排放嘅小型工業租用
但係後來呢條橋因爲成本上唔太吸引，就畀政府內部ban咗（本土研究社就發掘返呢段歷史，覺得值得時下嘅棕地規劃做參考。）
當然，棕地問題要發展好似而家咁嚴重，仲牽涉到鄉誼局同港英政府之間嘅司法角力，乃至現行土地法規制定同執行嘅大量漏洞
例如仲記唔記得上面提到嘅集體官契？
個法律模糊位要發功啦
戰後鄉議局一直不滿港英政府嘅土地管制，尤其是要取消同放寬 集體官契對土地使用嘅限制
1977年嘅時候，鄉議局甚至向英國政府告御狀，交咗封聯署信，其中關鍵位係提出咗個法律理據，指出集體官契對土地用途嘅描述，就真係只係描述，無約束力，即係份契當年話噠地上面有個爛茅廁，唔同噠地就真係只可以放個茅廁喺度咩（呢個就係著名嘅「Broken Latrine」例子）
後來有個法庭案件，就係牽涉前任鄉議局主席劉皇發「發叔」嘅「生發案」
詳情可以自己睇
https://www.hklii.hk/cgi-bin/sinodisp/eng/hk/cases/hkca/1983/308.html
簡單啲講，法庭推翻咗過往嘅先例，今鋪佢地話集體官契對土地用途嘅描述無約束力
噉之後呢個漏洞就持續至今
當然港英政府有諗方法應對，例如1985年修改《城市規劃條例》，將條例覆蓋範圍延伸去鄉郊地方
不過漏洞依然存在，其中一個就係規劃執法權嘅缺陷
現行嘅法定圖則，有「發展審批地區圖」（簡稱「審批圖」），以及「分區計劃大綱圖」（簡稱「大綱圖」）
對於私人棕地嚟講，該用地要畀「審批圖」覆蓋，規劃署先可以執法針對違規發展
問題係
喺1991年就有「大綱圖」覆蓋嘅新市鎮邊緣嘅綠化帶，又或者1991年之後先有「大綱圖」嘅離島
佢地往往都無「審批圖」
即係話無王管，泥頭任你倒漂移境界
規劃署呢啲時候通常會射波畀其他部門：呢噠地唔係我跟開
射射下，唔少綠地就噉變咗棕地
但係你以爲有助「審批圖」就可以執法咩？唔係啵
《城市規劃條例》係無追溯力嘅
意思係如果噠地喺「審批圖」刊憲之前，已經畀人倒泥頭破壞咗，噉嗰啲就叫「現有用途」，有豁免㗎
當然法律寫明唔可以對土地用途有實質改變
例如話噠農地倒咗泥頭啫，無話可以繼續倒啵，更加無話可以變停車場、回收場啵
噉呢個時候就係政府最擅長嘅嘢嘞
就當你真係捉到正
噉法律上，政府係可以要求「恢復原狀」嘅
問題係啲泥頭倒咗落去，破壞咗就好難翻轉頭
呢個亦都係製造既定事實嘅一種伎倆
而且只要你將噠地「恢復原狀」（唔使認真做㗎，做下樣得㗎啦）
噉按照法例政府就唔使告你
就算你真係畀人告
放心
根據案例，刑罰甚輕；相對於你租噠地畀人泊車放垃圾放貨櫃嘅租金，簡直九牛一毛
所以大家明點解香港咁撚多棕地
噉當然，棕地多嘅問題喺邊呢
環保、自然景觀固然係其一
更加貼身嘅問題係
棕地作業自不然有車出出入入，但係啲馬路又窄，與人爭路就危險
然後啲垃圾堆埋一齊，過去都成日有火災；啲有毒垃圾燃燒放出嚟嘅廢氣，吸得多真係可以提早落去見發叔
，都仲未計啲污水就噉排出條河嗰度又吹佢唔漲
最抵死嘅係
搞爛完堆農地，成大噠連貫黐埋嘅平整土地喺度
然後政府會同你講
「無地起樓啵，不如我哋填海/ 開發郊野公園啊，明日大嶼正啊
」多撚謝晒
睇到呢度，你可能問：
「講咗咁多，錦鯉有乜高見
」噉呢個post作爲書介
我嘅答案當然係
。
。
。
去買書自己睇啦
更多研究，盡在：
https://liber-research.com/report-archives-2/#
）