[短篇愛情故事/鳩寫]火機

簡介
一個同火機有關嘅短篇愛情故事。
自介
癡線佬一個，想睇癡線野可以嚟睇下。
故事簡介
是咁的，我係中五嗰年識左班豬朋狗友，仲有埋寫野鋪癮，自此就無心向學，每日返到學校就係瞓，之後班主任都睇唔過眼，於是就安排左個女仔叫我起身，而我竟然…鍾意左叫我起身個女生。
加更設定
IG每多5個follow加一更
IG: Pan.Dragon.0221
今日中午第一更

一.
今日我個中同開咗間新嘅酒吧，雖然我唔係好飲得，但我都係會去捧場，畢竟都識咗咁多年，去都唔去又好似真係有啲唔比面。

佢間嘢開個位真係有啲偏僻，加埋落雨同我遲咗出門口，我搞到呢咁hea先去到佢嗰到。

我成身濕曬咁行入去，然後企咗喺吧台前面，而吧台裡面有一個個樣有幾分似林明禎嘅靚女，嗰個就係我中同兼呢到老細同Bartender-啊恩。

「嘩，搞咩啊盈姐？」佢拎咗包紙巾出嚟：「抹抹佢先啦。」

「唔該曬。」我接過佢包紙巾。

我抹咗抹身之後，就拎咗枝煙出嚟擺落嘴到。

我伸手入褲袋，然後再拎返出嚟撳制。

我深吸一啖之後呼，但係點解…

無煙出嘅？

啊恩有啲疑惑咁望住我：「你枝煙…未著架喎？」

「Oh Sorry，慣咗手勢。」我忍唔住笑咗出嚟。

我再伸手入去摸多次，但係咩都摸唔到。

仆你個街，一定係急得滯冇帶或者跌咗。

「有冇火機啊？」我問佢。

「我戒咗煙啦，你出去買啦。」

「哦，好啦。」

我轉身準備行返出去搵七仔買火機，然後有人拉住咗我。

我轉身一望就即刻呆咗，拉住我嘅係一個米八高，著住黑色西裝，膚色偏白嘅男仔。

佢個頭係歐美Under cut加All back仲要染埋金毛，對眉濃密而烏黑，雙眼炯炯有神，個鼻樑又直又挺，個嘴紅潤有血色。

嘩，真係好撚靚仔。

佢用手喺我眼前揮咗揮，而我都終於回過神嚟。

「你係咪要火機？」佢問我。

「係啊。」我吞咗啖口水。

佢喺褲袋拎咗個火機出嚟，係一個普通嘅BIC純紫色火機。

「唔該。」我點火。

我點著咗枝煙之後，就遞返個火機比佢。

佢將個火機推返埋我到：「拎住先啦，一間走先還。」

「吓？」

講真，我好少見人借完唔拎返。

因為自己嗰個借咗比人，自己玩鑽木啊？

「你今晚唔會淨係食一枝煙啩？」佢苦笑。

「咁都係。」

講完，我就將個火機袋咗落袋。

Holy fuck copy多咗
下面嗰段係中六個故嘅簡介嚟

二
我同啊恩傾咗陣，好快就食完枝煙。

「條友你識唔識架？」我問佢。

「唔識啊，應該係我啲Friend叫過嚟架，你想上馬？」啊恩奸笑：「你咪直接坐人隔離囉，依家仲有咁多空位，你走去特登坐佢隔離，應該都知咩事啩。」

我探頭出去望咗望，先發現啲枱個佈局同一般嗰啲有啲唔同。

啲枱全部拍埋曬一齊，每一邊都有張長梳化，好似中學開大食會咁。

「嘩，今日做咩咁搞鬼啊？」

「冇呀，因為今日嚟嗰啲好多都係Friend，費事要大家隔咁遠。」佢拎起兩壺酒：「我搞掂啦，你得未啊？」

「掂啦。」

我將煙頭揼咗落煙灰缸，然後就跟住啊恩行咗入去。

我直接坐咗喺個靚仔隔離，但係就冇主動Hi佢。

點解？因為點都要扮吓上菜架嘛大佬！

起痰還起痰，但係做主動就好容易比人食住上架喇。

但係我坐低咁耐，佢都冇理過我。

唔得，要諗啲計導佢先得。

我轉身背住佢，拎咗部電話出嚟。

「幫個手啊大佬。」我Send咗個Whatsapp比啊恩。

「掂啦。」佢覆我。

一覆完，佢就拍咗幾下手，大家即刻望住佢。

「喂大家，玩返個大排檔先啦！」佢望咗我一眼。

我扤咗扤頭：「玩返轉先啦，唔係唔玩啊？」

啊恩拎咗副啤牌出嚟：「玩嘅舉手！」

雖然唔知佢個計劃係點，但係佢從來都冇水過我，所以我對佢有絕對嘅信任。

我率先舉手，而其他人都陸續舉手。

過咗一陣，我隔離個靚仔都係未舉手。

啊恩皺眉：「咁唔得喎，都唔全票通過嘅。」

全枱人都望住我隔離個靚仔，佢最後都因為人群壓力而舉咗手。

「咁就啱喇！」佢洗牌。

佢洗完之後，望咗個牌背一陣就將副牌擺咗喺枱面。

佢望住我：「盈姐係我中同，比個面佢抽先啦！」​​​​​​​

三
「梗係得啦！」我笑住講。

我伸手過去抽咗張牌，反轉張牌嘅同時，我個心情都反轉咗。

仆你個街，二仔嚟嘅！

我用一個絕望嘅眼神望住佢，而佢淨係比咗個「OK」我。

OK條撚啊！

我唔知你有咩計劃，但係我唔飲得呢單嘢你係一定知架喎。

我嘆咗啖氣，然後擺低張牌。

擺低張牌嘅同時，有三個人哼咗杯，其中一個係啊恩。

我睥咗佢一眼，然後佢向我微笑扤頭。

屌你仲笑！打柒你啊嗱！

我反咗個白眼，之後就直接清杯。

無事嘅，好快就有人抽到下張二架喇。

點知，抽淨五張牌都未有下張二，成件事好唔對路，而我都開始唔係好掂。

我個頭開始大幅度鳩揈，但我隔離個靚仔完全零反。

佢成程都冇咩點講嘢，而家我鳩揈到咁都冇反應。

到底係佢有問題？定係我有問題？

我白滑大波又靚女長腿，冇可能係我問題。

「喂，啊恩！」我嗌佢。

「做咩啊？」佢將五張牌攤開。

「我想走。」

「抽埋先啦。」

講完，佢哋就快快手抽曬啲牌。

啊恩睥咗個靚仔一眼，但佢照舊零反，然後啊恩就直接代我飲咗。

關於另外嗰三隻二？三隻都喺底啊！

「搞掂，我走先。」我搖搖下咁企起身。

啊恩衝過嚟扶住我：「我送佢出去先，大家玩住先。」

佢扶住我行咗出去，然後企咗喺門口隔離。

「你搞咩啊？我就死喇！」我無力咁打咗佢手臂一下。

佢扁嘴：「我鬼知佢咁唔Man啫，一啖都唔幫你飲。」

「唉，啊姐我而家係咪冇曬吸引力喇？」

「邊係，你由中學到而家都係咁撚正。」

「咁點解啊？」

「話唔定佢係Gay嘅呢？」

我嘆咗啖氣：「唉，希望係啦。」

呢個時候，個靚仔行咗出嚟。

你終於扯喇？快啲過嚟啦，啊姐等緊你啊。

四.
「小姐你好似…」

佢講到一半就比我打斷咗。

「我知啊，靚女啊嘛，我叫啊盈啊。」我撥咗撥頭髮。

嚟啦！快啲啦！我起撚曬痰啦！下面濕到成個萬宜水庫咁啊！

「嗯…我叫啊聖，你確實幾靚女。」佢微笑住，有啲怕羞咁講。

係啊，咁就啱喇。

見你咁怕羞，但係又咁鬼死靚仔，啊姐我今日決定做一次主動。

我直接拖起佢隻手，然後轉身開始行。

咦，點解行唔郁嘅？

我停低轉身一望，佢就咁企咗喺原地用力拉住我。

「你做咩唔行嘅？」我問佢。

羊肉送到虎口，唔係咁都唔識擘大口食啊嘛？

佢有啲疑惑咁望住我：「你要帶我去邊？」

我開始有少少躁：「做到咁你都仲要問？」

「我想出嚟問你拎返個火機，就係咁多。」佢有啲無奈咁講。

我屌啊！十蚊個火機你都要出嚟特登問我拎返，有冇咁撚小氣啊？

不過唔緊要，還咪還，反正我自己買過個都係幾蚊嘅事，同埋我諗到條橋。

我拎個火機出嚟，喺佢諗全拎返嘅時候…

縮手。

我將個火機塞落個Bra到：「想拎返都得，電話號碼比我啊唔該。」

我就唔信你伸手入嚟拎，一係你就自己買過個。

佢嘆咗啖氣：「你電話比我，我入比你。」

咁咪啱囉，要等價交換架嘛。

我好雀躍咁拎部電話出嚟解鎖，然後就遞咗比佢。

佢撳咗一陣之後就遞返比我：「咁個火機可以比返我未？」

「梗係未得啦。」我隔住件衫撳實個火機。

我點知你個號碼真定假？梗係要打打佢先啦！

我撳制打出去，然後就聽到啊聖身上傳嚟Iphone嘅預設鈴聲。

「夠曬誠實，還比你啦。」我拎返個火機出嚟。

「唔該。」佢接過火機。

「再約啦。」

「嗯。」

講完，佢就轉身行咗返入去。

「你覺唔覺得佢奇奇怪怪？」啊恩問我。

「我覺得。」我猛烈地扤頭。

五.
「你覺得佢邊到怪？」

「一開始又咁大方叫我袋住，走嘅時候又衝出嚟問我拎返，五時花六時變咁。」我繼續講：「仲有啊，十蚊個火機都記得，仲要寧願賣埋自己個電話號碼都要拎返，一定係孤寒種。」

啊恩有啲疑惑咁望住我，好似我講錯咗啲咩咁。

「做咩啊？」我問佢。

「你有冇諗過喺你抄佢牌嘅同時，佢都抄咗你牌，而男仔抄女仔牌通常係難過女仔抄男仔牌架喎。」啊恩托住下巴：「咁計嘅話，唔係佢賣個電話號碼比你，係你賣個電話號碼比佢。」

呢句嘢聽落冇道理，但諗一諗又好似有啲道理。

「你咁講又好似…係喎。」我托住個頭，擺出個諗樣。

明明啲雨水打落屋簷應該會好嘈，但明明我同佢就企喺屋簷下面，竟然咩都聽唔到，靜過太空。

我陷入沉思，而佢就粒聲唔出、認真咁望住我，不時仲會扤下頭，然後…

佢「噗」一聲咁笑出嚟。

「你笑咩啊？」我問佢。

「你係咪傻架？」佢笑到狂咳。

「唔明喎恩姐。」

佢拍咗拍心口順返條氣：「樣衰就話蝕啫，咁人哋靚仔係咩啊？」

「好似又係喎，咁咪即係我賺咗囉？」我恍然大悟。

「擺明啦。」

我舉起兩隻中指：「屌你啦，又撚鳩我！」

不愧係舊相識，次次見面都要撚我一鑊。

「不過我有個唔同嘅睇法。」啊恩拍咗拍我膊頭。

「咩睇法啊？再撚就嬲架喇！」我叉腰。

「你知唔知咩係『以小見大』？」

「直接講啦。」

真係好鬼憎人同我喺到賣關子，有咩咪直接講囉。

「直接講我就唔會架喇，比兩個Key words你啦。」

「講啦，唔好咁啦。」我扁嘴。

「愛同火機。」佢擰轉面：「其他唔講。」

「好囉。」

「自己慢慢參透下啦。」佢轉身行返入去。

「係喇係喇知道喇。」我伸咗伸脷。

唔講咪唔講囉，哼！

故事就咁叫火機都幾特別

唔知叫咩名好

六.
一個星期後。

呢個禮拜忙到爆炸，我直接瞓死咗。

電話響起，我用曬全身嘅力先轉到個身去拎擺喺床頭櫃上面嘅電話。

係啊恩。

「喂，盈姐你嚟唔嚟？」佢問我。

「做咩特登問我？」我打咗個喊路：「唔喇，好攰啊。」

「但係上次個靚仔問我你今日嚟唔嚟喎。」

實係會特登問啦，佢拎完我電話號碼都冇搵過我。

「真定假啊？」

「撚你有錢分咩？」

佢一講完，Whatsapp就彈咗個通知出嚟。

「啊盈，我係啊聖啊，你嚟唔嚟？」

係啊聖Send比我嘅Message。

「喂真係喎。」

「咁你嚟唔嚟啊？我見佢自己坐咗喺到。」

「咁搞笑？」我慢慢坐咗起身：「咁你等我一陣。」

「好啦。」佢Cut線。

收線之後我求其笠咗啲嘢上身就落咗樓搭的士，好快就嚟到啊恩間酒吧門口。

我行入去之後同上次一樣企咗喺吧台前面，諗住食枝煙先入去。

喺我準備點火嘅一刻，啊恩捉住咗我隻手。

「做咩啊？」我不明所以。

「唔好點住，等我一陣。」佢放低手頭上做緊嘅嘢：「啊聖！借個火嚟！」

啊聖行到嚟我身邊，然後拎咗個火機出嚟：「係咪借火？」

個火機係純紫色嘅BIC火機，冇咩特別。

「唔係我借啊，係盈姐。」啊恩指住我。

我接過個火機，點完火就還返比佢，而佢都行返埋自己個位到。

我呼出一啖煙：「話時話，明明我今日有火，做咩要特登借人哋嗰個？」

「你冇發現有咩特別？」啊恩扁嘴，好似有啲失望。

「冇啊，有咩特別？」

「個火機。」

「個火機咪十蚊個嘅純色火機，有咩特別？」

「佢用緊嘅火機，同佢上個禮拜嗰個係一樣架。」

「咁…所以呢？」

我唔係好明咁樣代表啲咩。

「唉，你都唔明嘅。」

「係架喇，你講啲嘢咁深。」

「你食完枝煙就去同佢坐啦，佢等緊你。」

「知啦，今晚食硬佢。」

「睇下點。」

咩料啊你而家？我今晚就食比你睇！

七
啊聖坐咗喺卡位埋邊，我行到嚟枱邊企咗喺到。

枱上面擺住一壺橙色嘅嘢，如無意外應該係橙汁加Vodka。

「你係咪搵我啊？」我問佢。

佢冇講嘢，淨係扤咗扤頭。

屌你老味，含含羞羞好似含住碌鳩咁，講句嘢講唔到，都唔知係咪男人嚟。

好彩你夠靚仔，如果唔係真係會單身成世。

「想我坐低有代價架喎。」我指住壺嘢。

「一杯？」佢問我。

「梗係啦。」

佢斟滿一杯，然後一啖清曬。

飲得咁豪邁，壺嘢應該溝得好淡。

我坐喺佢對面，然後拎起個壺蓋聞咗聞，浸味聞起上嚟同消毒藥水冇分別。

仆你個街，呢壺肯定唔係Vodka溝橙汁咁簡單！

「呢壺咩嚟架？」我問佢。

「生命之水溝Vodka同橙汁。」佢望住我：「係咪好怪？」

自信啲，拎走「係咪」呢兩隻字，係好怪，仲要係好撚怪。

除咗怪之外，仲好撚癲。

不過我好好奇，我同佢上次都冇咩幾句，佢應該對我冇咩Feel。

但係做咩今日又搵我？

「你上次同我都冇咩幾句，做咩今日又搵我嘅？」

「唔得架咩？」

又冇話唔得嘅，只不過落到嚟呢啲地方唔快啲出手通常都蝕底咁解。

「你唔驚比人快過你咩？」

「快過我？冇所謂啦。」

竟然有人抱住咁Free嘅心態，唔似係想嚟搵食。

「即係你唔係嚟搵食架啦，咁你搵緊啲咩先？」

「你問我搵緊啲咩？」佢拎個火機出嚟：「好似我對我個火機咁對我嘅人。」

「你想講咩啊？」

講經還講經，但係我聽唔明啊大佬。

「唔緊要，唔係個個都明。」佢將個火機擺喺枱面：「你要用？」

「都好啫。」

我拎咗枝煙出嚟，然後拎起佢個火機諗住點火。

但係唔知係咪因為冇油定係個壞咗，個火機吒極都吒唔著。

八
「喂，大佬你舊嘢用唔到架喎。」我將佢個火機放返喺枱面。

我拎自己個火機出嚟點煙，而佢就個火機收返落褲袋。

「你唔揼咗佢？」我問佢。

仲收埋佢做咩？都用唔到。

「點解要揼？」佢反問我。

「都用唔到，做咩要留低？」

「我哋身邊有好多嘢都用唔著，咁係咪要全部揼曬佢？」

比佢咁樣一問，我真係唔知點答。

我哋兩個沉默咗一陣，佢終於開口。

「對唔住，No offence嘅。」佢斟酒：「我自罰一杯。」

講完，佢就即刻拎起酒杯。

我諗住阻止佢，但佢唔洗兩秒已經清空咗隻杯。

「其實冇咩喎。」我繼續講：「我反而有啲好奇，想聽多啲。」

我知我咁講佢一定會開始講經，不過既然佢好似有嘢想講就比佢講下啦。

「你有冇諗過，一樣嘢有冇用，係取決於邊個用同點樣用？」

「呢個我聽過啊，但係火機冇油好似真係咩用都冇。」

「咁又唔係嘅，可以入油架嘛。」

「吓，呢啲咁嘅垃圾火機有得入油嘅咩？」

佢拎返個火機出嚟：「梗係有啦。」

佢將個火機底Show比我睇，我見到有個針窿咁嘅嘢，應該就係入油嘅位。

「就係呢個窿？」我問佢。

「無錯。」

「但係唔會好麻煩咩？」

又要買火機油，又要喺個細窿到灌入去，諗起都覺得麻煩，比著係我真係寧願買過個新嘅。

「少少啦，我初頭都覺得好麻煩，不過而家都冇咩嘢。」

「搞咁多先用得返，比多十蛟買個新嘅唔好咩？」

「的確係嘅，但係有時做一樣嘢，最緊要唔係方唔方便，而係因為佢背後嘅意義。」

「你意思係你幫啲垃圾火機入油係有特別意義？」

「你可以咁講。」

「願聞其詳。」

「好長架喎，你唔介意？」

唔出都出咗嚟啦，聽埋先走囉。

「唔介意啊，你講啦。」

九.
「我覺得而家啲人好講求方便，同埋快。」

「呢啲梗係啦，又慢又麻煩點搞。」

「你有冇買過Zippo火機？」

「冇啊，做咩？」

咁鬼麻煩，又要入油，又要換綿，我先唔會咁樣搞鳩自己。

「如果我要你諗下點將火機同愛情扯上關係，你做唔做到？」

乜撚嘢啊？愛情同火機點扯上關係啊？

「得啩。」我禮貌咁覆佢。

「你個火機咩樣架？」

你突然咁問，我真係唔知喎，我喺屋企隨手拎架咋。

「你等我拎出嚟睇下。」

我喺褲袋拎咗個火機出嚟擺喺枱面，係一個BIC嘅純紅色火機。

「嗯，我會記住。」

吓，記住做咩？

「咁我收得返埋未？」

「請。」

我收返埋個火機，然後望住佢：「你今日有冇特別安排架？」

呢個先係重點，因為下場不嬲都重要過上場。

「咩安排？我飲完呢到就返去架喇。」

我屌你啊，真係唔識架喎。

「我唔飲喇，我嚟M啊。」我苦笑。

特登叫我出嚟仲以為咩料，點知淨係想飲酒。

「咁你走先？」

屌你啊，仲要趕我走？

「好啊。」

我直接起身衝出門口，每一步都超用力。

我回頭望，發現一個人都冇。

仆佢個街，佢真係唔追架喎。

做到咁明顯都睇唔出我嬲咗咩？

無事嘅，佢行緊出嚟架喇。

企咗陣終於有人行出嚟，不過唔係啊聖，係啊恩。

「做咩嬲爆爆咁啊？」啊恩問我。

「條撚樣囉！都唔知搞緊乜撚！」我忍唔住鬧佢。

「佢咪溝緊你囉。」

邊有人咁溝女架？

「認真咩？」

「佢用緊佢嘅方式溝你。」

真係多謝曬，我真係唔識欣賞。

「叫佢用返我鍾意嗰啲方式得唔得？」

我都係鍾意啲正常人嘅溝女方式，佢呢啲我搞唔掂。

「信我啦，佢好仔嚟，你最後都會Like佢架。」

真定假啊？咪撚喎。

「好啦好啦，咁我要點做配合佢啊？」

十.
「你依家個火機拎出嚟睇下。」

「做咩你又問啊？」

「拎出嚟先啦。」

「唉，好啦好啦。」

我有啲唔耐煩，但都係拎咗出嚟比佢睇。

佢拎住我個火機，仔細咁檢視。

「普普通通一個十蚊雞嘅火機仔啫，洗唔洗睇咁耐啊？」

我意思係，一個爛鬼火機真係有必要睇咁耐咩？

過咗一陣，佢終於將個火機遞返比我。

「你拎返先。」

我接過個火機：「睇完啦嘛，仲有冇嘢要提醒我？」

「或者你可以試下思考下應該點樣對待愛情。」

「咁深奧嘅？」

不過都行到呢步，我返到去諗下啦。

「唔深架，我相信你會諗得明。」

咁都唔深？我屌你啦！

「知道喇，我走先喇！」

講完，我轉身就走。

「喂！」佢叫住我。

「做咩啊又？」我有啲唔耐煩。

「你都唔細架喇，係時候修心養性。」佢用長輩說教嘅語氣對我講。

搞乜鳩啊？你提早更年期呀啊恩？

「嗯，知道喇。」我好似對老豆老母咁敷衍咗佢。

講完，我就搭上咗咁啱好喺我身後停低嘅紅Van。

上車之後，唔知係因為我太攰，定係我真係想思考。

我拎個火機出嚟，將佢貼喺個車窗上面。

火機同深夜冇人嘅街道重疊，不時被路燈散射出嚟嘅泛黃燈光映照，係一個素麗嘅畫面。

痴鳩線，我係咪傻撚咗？

其實…唔係啊。

雖然呢個畫面嘅組成好簡單、好樸素，但係都幾靚啊。

其實我身邊有好多嘢都好靚，只不過我冇去留意、冇去珍惜姐，例如我屋企爛咗嗰條絕版假鳩。

簡單、樸素，但要珍惜同留意嘅嘢，即係…

愛情。

唔通呢個就係佢哋想我諗嘅嘢？

​​​​​​​愛情其實一啲都唔複雜，相反地簡單到仆街，純粹睇你有冇心啫。

我即刻用手機Mark低，以防我個死人金魚腦唔記得。

十一.
第二日。

今日我放假，瞓到晏晝先起身。

我緩緩咁爬去床邊，拎起擺喺床頭櫃上面嘅電話。

我打開一睇，通知欄空空如也。

睇嚟今日，我都係要喺屋頹住過。

我喺櫃裡面拎咗張懶人枱擺喺床上面，然後將電腦枱部Notebook拎咗過嚟。

懶人生活，正式開始。

唔知過咗幾耐，基本上我有追緊嘅都已經睇曬最新一集，我進入一個唔知做咩好嘅狀態。

我拎住部電話無目的地亂咁碌，睇到琴日寫低嘅備忘。

「愛情其實一啲都唔複雜，相反地簡單到仆街，純粹睇你有冇心啫。」

「到底仲有冇嘢可以補充呢？」我喺到自言自語。

我沉思咗一陣，然後就出現咗一個新嘅諗法。

我做咩要喺到諗呢？上網搵咪得囉。

雖然我唔想我部電話存在啲弱智嘢，但係講到呢啲情感嘢，最多呢啲情感金句嘅地方一定係抖陰。

我知道抖陰啲情感金句有九成都係戇撚柒鳩，但係幾廿萬句嘢，總有一句係正常有用啩？

我抱住一丁點希望，Download咗呢個所有家長都聞風喪膽嘅抖音。

搞咗一輪之後，我終於入到去睇嘢。

我不停碌、不停睇，而我個腦都開始不停融化緊，越睇越頭暈。

好彩喺呢個危急關頭，我終於碌到個好似有啲道理嘅金句。

「愛情唔係冇新鮮感就分手，而係冇新鮮感都愛對方，同埋努力咁去搵新鮮感，因為新鮮感唔係同一個新嘅人去做啲舊嘅嘢，而係同一個舊嘅人去搵啲新嘅嘢嚟做。」

「幾有意思。」

講完，我就Cap低咗句嘢，然後收埋電話，拎返嗰個紅色火機出嚟。​​​​​​​

「愛情同…火機？」我喺到自言自語：「我諗我明喇。」

最後硬吹到同火機有關

最近真係不在狀態，明明有好題材但係唔識寫。
休息期，亂咁嚟

十二
一個禮拜後。

我再一次嚟到啊恩間吧，亦都再一次企喺吧台前面食煙，又一次問啊聖借火，而佢個火…

再一次係嗰個純紫色嘅BIC火機。

「其實你有冇食煙架？個火機用咁耐嘅？」我問佢。

「我有，不過少。」佢答我。

「咁如果我而家邀請你陪我食一枝呢？」我喺煙盒拎咗枝煙出嚟遞向佢。

「Sure。」佢接手我枝煙，然後擺落個嘴到。

我先幫佢點煙，然後再幫自己點，最後將個火機還返比佢。

「我哋今日不如坐吧台？」我問佢。

「都得。」

講完，我哋兩個就坐咗上吧台前面嘅高腳櫈。

「上次…」佢想講嘢，但比我打斷咗。

我將嗰個純紅色嘅BIC火機拎出嚟擺喺枱面：「我知你想講咩。」

「請講。」

「你對待個火機嘅態度就係你對待愛情嘅態度。」

「無錯。」

「而火機呢樣嘢同愛情一樣好簡單，唔會令你去珍惜同留意，但當你失去咗嘅時候，你又會可惜，然後想搵返佢，但又搵唔到，最後只可以買過個。」

「仲有呢？」佢微笑住咁講。

「火機嘅油就好似愛情嘅新鮮感一樣，燒曬係可以諗辦法再入油，唔一定要揼咗佢。」

「所以呢？」

「啊恩，要杯Angel’s Kiss。」我含情脈脈咁望住佢：「咁你呢？」

佢笑咗笑：「我比較大膽啲，Honey Moon會好啲。」

「你老味，兩個唔好增加我工作量得唔得？」啊恩各送咗一隻中指比我兩個。

「咁冇計喇，唯有直接啲。」我咬咗咬嘴唇。

然後，一嘢錫落佢到。

完

新作再見
《沙頭角與長洲的距離》
開咗第一章喇

ｏｋａｙ啦，短編叫唔錯。