193笠撚晒水：「但係我真係唔係針對曾先生，因為佢係一個長輩」

朝香果林 2022-11-21 20:43:57

ERROR新綜藝《ERROR自爆96小時》近日播出，日前一集就拍攝193出海玩潛水。上水後，193就打開感性mode，重提上年4月令佢爆紅嘅153事件。事緣當時曾志偉指ViuTV得4點收視，而且節目題材偏門，只能同J2台比。嗰陣193錄影口罩小姐節目，錄完後做記者圍訪，被問到呢件事時就反擊，指TVB觀眾老嘢：「收視得幾百部電視機，我地唔會理。」亦暗嘲J2有個四十幾歲嘅主持做《後生仔》。193嘅回應當時引起極大迴響，更令193 followers數目狂升。當時花姐就指會勸193作為公眾人物要有禮貌，更表示會打俾志偉解釋。

沉澱一年幾後，原來「153之亂」為193帶嚟好多反思。佢喺節目中指呢件事令佢人生同事業上唔同晒，並解釋點解佢當時咁有勇氣直線抽擊：「當時我係好輕挑，好無禮咁講出嚟，係因為我睇完我嗰兩位口罩小姐綵排之後，我有啲嬲，佢地表現得好差，一睇完佢地綵排就要出去做訪問，嗰下其實我有少少衝動，5分鐘前我仲嬲緊個表演者。」

193解釋佢嘅回應唔係針對曾志偉，佢只係針對嗰番說話去維護ViuTV嘅台前幕後：「我唔係真係針對住曾生，我係我台嘅藝人，我覺得我台拍嘅綜藝好好睇，大家都好努力，所以我想維護我個台，所以我先講呢番說話，你唔可以話我地係小眾囉，你唔可以用你嘅觀點去話我地個台唔好，我想維護返呢班好努力嘅人，所以我先咁樣講。」佢指ViuTV幕後好努力做節目，唔訓覺去剪片：「我唔明佢地一日返廿幾個鐘工，有啲同事帶睡袋喺公司camping，所以我就覺得我地有咁多咁努力做創新節目嘅人，點解你要咁樣批評我地個台呢？」

193更邊講邊喊，承認當時自己衝口而出，並指自己好尊重曾志偉，大讚佢對香港娛樂圈嘅貢獻：「我都知自己講錯咗，但係我真係唔係針對曾先生，因為佢係一個長輩，唔好理佢外間對佢嘅批評係點樣，我細個睇佢嘅時候，佢係真係帶動到香港娛樂圈，帶動到氣氛，令到人睇電視，令到人開心，所以每一個人我都尊重。」佢指事件係因為傳媒炒作，令大家覺得佢矛頭指向曾志偉：「我到而家都無澄清，因為覺得澄清咗都無用，傳媒只會更加炒作。」

朝香果林 2022-11-21 20:44:21

試下句野係TVB藝員講VIUTV 睇下連登仔會雙重標準成點