先旨聲明,本人絕對沒有收取匯豐銀行任何利益,以下亦並非專業的金融及銀行類資訊,以下內容僅供參考,如造成任何損失,本人恕不負責。
好,戴撚完個頭盔喇,即刻入正題
前言
首先,匯豐銀行開立海外帳戶有兩種方法,第一種就係真人面談,第二種就係網上申請。
顧名思義真人面談即係你要去到匯豐銀行中環總行開立戶口,而網上申請你就只需要攤喺屋企慢慢撳部電腦就可以申請到。
當中兩者最大嘅分別就係網上申請處理時間會少七個工作天而且可以節省到去真人開戶要畀嘅八百至一千六百蚊手續費,所以今次我哋會以網上開戶為主。
Step 1 選擇你想要嘅戶口類型
Click入去以下網址:https://www.hsbc.ca/new-to-canada/applying-from-outside-of-canada/compare-accounts/
然後揀選你所需要嘅戶口類型,再撳下面嘅Apply online now。
一般嚟講都會揀返Advance,因為Premier需要你長期擺十萬蚊加紙喺戶口入面,否則就會扣你$34.95 Monthly fee,而相反Advance只需擺低五千蚊加紙就可以waive monthly fee。咁當然都唔係話冇人會開Premier,不過大家自己睇餸食飯喇。