1.香港保險回佣係非法，用禮物去代替回佣亦違規，但其他行業例如地產代理、按揭代理回佣又合法架喎，真係唔知點解。
2.近期有間保險經紀公司推出中介人佣金100%回贈，聲稱自願醫保嘅保費高達5折，兼且鼓勵人每年轉醫保（見圖）。有花生友就去保監局投訴非法回佣，「未知該公司會否觸犯法例，以失實陳述誘使客人投保？」
3.呢個明顯就係投訴一則。保監局電郵回覆時就先講例牌嘢，話根據指引25長期業務嘅保險產品回佣係受限制嘅。
4.戲玉嚟喇。就呢件事保監局建議「投訴人可先與相關保險公司或持牌保險經紀公司聯絡、作出查詢、提出投訴，等佢哋有機會及早處理。」情況等於你見到個賊偷嘢，警察就同你講，你可以先同個賊聯絡、查詢、投訴，佢哋識及早處理架喇。
5.保監局仲話：「保險公司及持牌保險經紀公司，要制定有效嘅投訴處理政策及程序，以適當地處理投訴。」大佬，呢啲你同投訴人講做咩啫。
6.然後保監局就話：「倘若你對保險公司或持牌保險經紀公司處理投訴的方法感不滿，或有關投訴涉及持牌保險中介人涉嫌違反《條例》的規定，可向我們反映。」個電郵咪就係同你反映有人違規，你又叫返我同你反映。
7.其實保險回佣喺世界好多地方都係犯法，主要避免誘使客人因為回佣而揀咗隻唔啱嘅保險，亦可以避免割價戰令保險公司或經紀公司資不抵債。
8.新加坡本身一直都容許保險回佣，不過2010年時一間經紀公司進行割喉式回佣，首年保費全免，結果導致好多客首年過後就退保，令到保險公司AXA安盛向經紀公司索償700萬坡元，當年新加坡金管局（MAS）都出過聲話經紀公司Unduly influence客戶嘅財務決定。
9.美國全國法例亦禁止保險回佣，惟獨California同Florida就合法，當中Florida高等法院就話客人嘅合法權益喺禁回佣法下未得到彰顯，所以係准許回佣嘅， 當然監管機構就睇得緊，兼且要公平對待所有客人。
10.本總裁覺得一定程度容許保險回佣可以增加市場競爭，但依家法例唔准咁玩，就應該要嚴厲執法嘅。不過當見到明顯違例嘅宣傳品，保監局都傳波嘅時候，就唔怪得好多人成日媽媽聲。
保監局真係除咗識收levy咩都唔理
其實間broker 都幾良心，佢每年都同你回晒，佢淨係食公司個一水真係夠交租同養ro同back office咩