一條網上片段中見到梁焯滿出席一個活動時嘅情況，留長頭髮嘅梁焯滿有啲似四哥謝賢，佢坐車直到大會現場紅地氈前，十足十荷里活明星參加頒獎禮！重點係現場人士嘅反應，大家用國語大叫梁焯滿，又大叫佢喺《古惑仔3之隻手遮天》嘅角色名「肥屍」，超級多fans！原來現場嘅活動由佢做「生招牌」，梁焯滿沿紅地氈行到大大個印住佢個樣嘅布景板，並且喺上面簽名，好似好架勢咁！
唔少人睇到片都覺得好𢲷頭，認為內地同香港好似兩個平行時空，網民留言：「所以唔可以怪佢哋咁愛國，係香港佢X都無得食」、「喺香港都未試過咁風光」、「好似另一個平行時空咁，只要過到自己個關，就會好似生活喺女兒國咁幸福」、「喺香港只係大茄，喺呢度變咗影帝咁。」
梁焯滿係1989年香港小姐季軍梁佩瑚嘅弟弟，2000年他在三級片《獸性新人類》中與性感女星譚筠怡有大膽演出，之後他有份參演《蜜桃成熟時3D》及《鴨王2》等，大多飾演「猥瑣佬」角色。
近年梁焯滿轉戰內地發展，曾經營娛樂公司生意，亦有開汽車美容公司，同時亦有繼續拍劇及微電影。2017年梁焯滿宣布開拍網劇《江湖之社團風暴》，除了自編自導之外，更擔正做男主角，而女主角就係佢當時女友、芭蕾舞老師兼演員何敏瑩（Jessica）。
