早前理大早喺放榜前公布唔俾過夜Ocamp，保守嘅校風令好多DSE學生卻步。冇諗到喺JUPAS出咗offer之後，港大先傳出校方唔俾搞過夜ocamp嘅消息。
據 @undergrad.hkusu
學苑報道，港大校方早於6月15號通告學生組織話，傳染病工作小組（Task Force on Infectious Diseases）決定禁止除舍堂宿生會以外嘅過夜迎新營（Ocamp），原因係要減低病毒傳播風險。據了解，校方決定事前未有和學生組織商討。即使有院會代表表示引用「公共衛生專家」意見據理力爭，或要求出席傳染病工作小組會議，都俾遭校方拒絕。
宿生會本身就住喺宿舍，固然就無法禁止，但既然都係同一班學生一齊玩，又點解會增加病毒風險呢？同學就話，校方認為舍堂以外嘅迎新營會有校外人士參與，傳播風險較高。學生代表話對校方嘅解釋都甚為不解。
熟悉大學文化嘅「浸大山神」認為，無咗ocamp，無疑係對大學文化嘅一大損害。因為疫情，有啲大學已經兩年冇得搞實體嘅ocamp，而家仲要唔俾過夜，「咁嘅ocamp根本係名存實亡！」佢認為大學高層或者以有色眼鏡看待迎新活動，但過夜活動對於年青人建立團體精神同對學系嘅歸屬感好重要。
#迎新營 #OCAMP #大學生 #大學活動 #香港大學 #HKU #房GAME
source: https://gongjyuhok.hk/articles/11937
