一、
「It's a match!」
我瞓瞓下醒咗,對眼都未擘得大就見到依個通知彈出嚟。
「瞓咗未啊?」佢send咗好多個訊息俾我。
「你張相喺邊度影㗎?幾靚喎嗰度。」
「我叫david啊,叫你candy ok?」
(我全部交友app都係用假名)
我當下完全唔知點應佢,佢問咁多句問題,我都唔知應該要應佢邊句,一睇就知係啲死毒撚扮晒yo啦,我覆都唔想覆佢。不過因為好奇,而且又係第一個match到嘅,我最後都㩒咗入去睇下佢咩料。
點知一㩒到入去,完全顛覆我頭先嘅諗法。
睇佢個profile,身高180,鍾意打籃球、行山,完全唔係毒撚,甚至係我幾鍾意嘅陽光type嚟,而且個樣......嗯......幾靚仔。
我諗咁靚仔嘅應該都唔會痴線得去邊啩?於是我就用lunch time嗰段時間覆下佢。
「Hi,尋晚好早就瞓咗喇。」
「堅尼地城海傍嚟㗎,我好鍾意去嗰度睇海。」
「haha,叫我cindy得喇。」
當我覆晒佢啲問題之後,真係鬆咗一口氣。我諗交友app就好似見工啲interview咁,一直要喺問答中間周旋。不過我又無理由因為咁就唔玩交友app嘅,始終我份人咁內向,而且又無途徑可以識到新嘅人,可能過多排玩慣咗就會覺得無乜野啦,我諗。
正當我想離開個app嗰陣,「叮」一聲留低咗我喺度。
佢秒覆咗我。