【愛情】【少甜】Tinder識嘅十個人

一序一

我叫cindy，今年24歲都未出過pool，見住朋友一個接一個咁有男女朋友，但自己連咩係拍拖都唔知，我就覺得自己好廢，就快同依個社會脫節咁。

所以！我決定down交友app嚟玩。

㩒到入去個app store，一打交友app，就有幾十個彈出嚟，碌都碌唔晒。你聽過嘅有，你無聽過嘅都有，咁我就全部都down晒佢哋算！搞完一大輪之後，終於開晒咁多個account，求其match下咗啲人就瞓着咗，連樣都無睇。

點知一嚟就嚟咗個痴線佬......

一、

「It's a match!」
我瞓瞓下醒咗，對眼都未擘得大就見到依個通知彈出嚟。

「瞓咗未啊？」佢send咗好多個訊息俾我。
「你張相喺邊度影㗎？幾靚喎嗰度。」
「我叫david啊，叫你candy ok?」
(我全部交友app都係用假名)

我當下完全唔知點應佢，佢問咁多句問題，我都唔知應該要應佢邊句，一睇就知係啲死毒撚扮晒yo啦，我覆都唔想覆佢。不過因為好奇，而且又係第一個match到嘅，我最後都㩒咗入去睇下佢咩料。

點知一㩒到入去，完全顛覆我頭先嘅諗法。
睇佢個profile，身高180，鍾意打籃球、行山，完全唔係毒撚，甚至係我幾鍾意嘅陽光type嚟，而且個樣......嗯......幾靚仔。

我諗咁靚仔嘅應該都唔會痴線得去邊啩？於是我就用lunch time嗰段時間覆下佢。

「Hi，尋晚好早就瞓咗喇。」
「堅尼地城海傍嚟㗎，我好鍾意去嗰度睇海。」
「haha，叫我cindy得喇。」

當我覆晒佢啲問題之後，真係鬆咗一口氣。我諗交友app就好似見工啲interview咁，一直要喺問答中間周旋。不過我又無理由因為咁就唔玩交友app嘅，始終我份人咁內向，而且又無途徑可以識到新嘅人，可能過多排玩慣咗就會覺得無乜野啦，我諗。

正當我想離開個app嗰陣，「叮」一聲留低咗我喺度。

佢秒覆咗我。

Lm

「係呢，你今個星期得唔得閒啊？」
「我想出去影相，想揾你做我model。」

奇怪喇，點解佢咁鍾意影相但又唔打埋個"photographer "或者係個"📸"嘅emoji喺profile嘅？

不過我當下都無諗咁多，話晒都係第一次有人揾我做model影相，所以心情難免有啲亢奮。可能女仔始終離唔開人哋對自己嘅評價，好嘅壞嘅都係。我就慢慢、慢慢咁跌落david嘅陷阱度。

「同埋我都覺得你幾靚。」
「係唔係有啲唐突啊？如果你怕尷尬就算啦。」

「屌，佢一嚟就想欲擒故縱你啊？」喺我身後嘅mandy突然開口。

「下？你一路都偷睇緊㗎？」我問mandy。

「我見你企咗喺樓梯口咁耐吖嘛，就想八下你做緊咩。計我話吖，依啲男人肯定有啲企圖，三唔識七就想約人出嚟，一定係心懷不軌。」mandy帶有少少不屑嘅語氣講。

「嗯......」我開始煩惱。

吖係啊，mandy係我同事嚟，雖然已經近廿尾，但佢唔單止唔顯老，有種成熟穩重嘅淑女感覺，而且仲要有一副玲瓏浮突嘅身材，所以成日都聽到啲男同事偷偷地討論佢。

男同事A：「mandy尋日個story你哋有無睇？」
（仲要倒裝埋佢個story)
男同事B：「有啊有啊，我睇到哇哇聲，心諗佢件裇衫仔想引死邊個啊？」
男同事C托咗托粗黑框眼鏡，語氣嚴肅又莊重咁講：「我like咗，仲要cap埋。」

就好似咁。

所以我諗mandy睇男人嘅眼光係幾準嘅。不過.....單單以幾句說話就妄下定奪又好似有啲不近人情？我都係聽下算。

「喂唔講喇，我就快完lunchtime。」mandy已經揚塵而去。

望住david句「想揾你做我model」，我有啲莫名嘅意亂情迷。

如果我係男人嘅話，我諗我一定係其他人眼中嘅情場毒撚。

可能我仲未跨得過依道心理關口，但係又想瞭解佢多啲，於是我就咁樣覆咗佢：

「不如傾多幾日先？我哋都未係幾熟(笑喊)。」然後我就熄咗mon。lunchtime 就快完，又係時候做返黎生，之後我就一路都無用過手機。

直至......

「叮、叮叮。」

手機係咁收到通知。我諗應該又係我班中同係度扮工傾偈，所以我都無理到，繼續埋頭苦幹。

「叮、叮叮。」

手機嘅叮叮聲一路都唔停，好似我唔攞起部手機就唔會完咁。

我㩒開個mon，就見到全部都係tinder嘅通知。

「點解啊？」
「你唔覺得我靚仔咩？」
「喂做咩唔理我啊？」
「屌點解依度啲女個撚個都吊高嚟賣。」
「你咁撚柒，我揾你做model都益咗你啦。」
「傾傾傾，傾你老母咩，個個喺度都係揾sp㗎啦。」
「on9。」

全部都係david send嘅message。

我呆咗喺度，一時之間唔知點應對。
攞住手機嘅雙手一直喺度震。

「sorry，我唔係咁嘅意思。」

我當下真係覺得好無助，剩係識得道歉。我唔明點解玩個tinder都可以俾人鬧到咁。

其實係唔係玩tinder嘅男仔都係咁嘅呢？隨便喺tinder度match一啲人，隨便介入佢哋嘅人生，再順藤摸瓜，介入所有match嘅感情，想方設法揾入口進入你嘅一切，你嘅肉體。

聽班有玩開tinder嘅中同講，玩得tinder就要放低好多嘢，原來最難放低嘅係奢望。

我低估咗玩tinder嘅男仔。

david傳來一則新訊息

「sorry，我語氣重咗。」
「其實我都係想見下你真人，但又唔識點約你，我諗我唔係幾識同女仔相處。」
「咁你仲想唔想出嚟見個面？」

既然佢都道歉咗，我又無謂壞到個氣氛咁僵。

「一係食餐飯先？」我問。

「好啊。」佢秒回。

佢online住咁等我，都算佢幾有誠意，而且都係食餐飯姐，我諗應該無乜所謂啩？

「我嚟接你放工？」佢問。

「好，咁我哋尖沙咀等？」我始終唔太想俾人知公司地址。

「7點ok?」

「ok.」

咁樣鬧完仲約到出黎

原有有人睇
其實俾你想像中多㗎 好多人會好在意點解會無端端有人討厭自己 想知道原因

咁精彩都冇人睇 不如樓主打俾我 分享埋佢啦好嗎