《聲夢傳奇2》第8集紅隊藍隊對決中，因為藍隊落敗，所以要淘汰隊內其中一位參賽者，藍隊歌手導師需商討選出一名淘汰者。其中林二汶同JW王灝兒各有唔同意見，討論時JW更忍唔住崩潰落淚，仲爆seed鬧林二汶？！
《聲夢傳奇2》第6集起就進行首輪團戰。每個回合每隊各自派出學員應戰，累計總票數較高嘅隊伍獲勝，將全員晉級，較少嘅一隊則需要淘汰一名學員，淘汰人選由總監及導師團商議。節目最新播到第8集，淘汰者終於曝光。
由於呢一round由紅隊勝出，所以紅隊全員晉級，相反藍隊導師就要揀出一位學員淘汰。節目中亦播出藍隊導師陳奐仁、Alan布志綸、林二汶同JW嘅商議情況。
幾位導師都認為表現相對無咁好嘅係Duncan（侯雋熙）、Christopher（金仔）、Nicole（蕭呈謙）。而Alan布志綸就指Duncan有好潛質，唔應該淘汰佢，其他導師亦一致同意Duncan有得留低。
剩返金仔同Nicole，JW就表示佢覺得喺技巧方面Nicole稍遜一籌，佢要改進嘅嘢唔係短期內可以改到，言下之意JW比較偏向淘汰Nicole。但林二汶就表示佢由此至終都好睇重「星途」，佢認為長遠嚟講睇到Nicole有潛質、有可能會有戲劇化嘅改變，唔應該喺呢個時候放棄佢。
陳奐仁就指Nicole有種特質就係咩都唔使做已經好多人中意佢，但承認Nicole現時未能唱出歌背後嘅故事。陳奐仁指二汶話Nicole做得到，佢都想相信二汶，JW就表示佢都想信，林二汶則回應：「咁你就信我啦！」
林二汶就提議不如揀另一位學員Timothy（陳昊廷），陳奐仁亦表示：「Timothy日後嘅可能性真係超低。」不過JW坦言佢foul唔到Tim，因為佢今次嘅表現實在太好，佢唔接受要淘汰佢。然後林二汶一錘定音：「（淘汰）金仔啦！」令JW大為震驚！
林二汶解釋指金仔需要更多時間歷練，而此時JW已忍唔住流淚：「咁一係你哋揀啦....Tim同金仔.....你哋揀啦....」JW表示佢都覺得金仔把聲好過Tim但Tim今次真係表現好好，然後忍唔住爆seed稱：「二汶，I'm gonna kill you if Nicole doesn't do anything good next time！I will kill you！」
喺台上宣佈淘汰者時JW仍然情緒激動爆喊，唔少網友留言指：「二汶老師這一集就看到她很偏心Nicole」、「有無攪錯, 想foul Tim, 好彩JW有point有眼光有堅持」、「理解唔到二汶咩事」
善心打破0回覆
