分享下痔瘡之路

有咗痔瘡好多年，一直都冇理佢。得過且過，諗住冇嘢既，又唔痛又少流血，一直冇處理，又怕尷尬冇睇醫生，點知越拖得耐情況越嚴重，有人勸過我去處理下，我都冇聽佢哋意見。

另外我自己生活又唔檢點，成日去廁所去好耐，冇屎屙都照入去廁所坐等屎屙，又夜瞓，又飲酒，係街急屎都要急到返屋企先屙，食嘢又冇多菜少肉，以上種種同痔瘡發作有關既行為，我全部做曬。

終於，情況越黎越嚴重，搞到我生活好唔方便，於是喺舊年開始的起心肝想解決佢，期間試過唔同方法。開呢個post係想警惕下生活唔檢點既人，希望你哋睇完之後，會有所領悟，正視問題，及早揀有效既方法治療。

利申，一直做開cd rom, 專登開account分享，出得慢打錯字唔好屌我

痔瘡水解冇撚用

舊年十一月到，天氣轉凍，有日朝早起身無啦啦屎眼好撚痛，行路都痛，用手一摸，有粒嘢凸出嚟。

一路都知自己有內痔，一路以為相安無事，點知今次凸咗出嚟。行行企企都唔方便。於是乎就上網睇下有咩解決方法。

Google咗痔瘡一陣，見到有各種唔同方法去處理，見到好多人都分享處理完嗰種痛苦，即刻驚撚咗。所以最後揀咗個聲稱無痛既痔瘡水溶解術。原理就係搵啲電流電死啲痔瘡佢，求其上網搵下就會搵到，仲有新聞聲稱上晝做，下晝就可以去打波。咁我見撚到就梗係揀哩個方法啦。

於是，我就搵咗新聞入面個醫生，book咗時間上去睇下。

上到去，醫生睇完話有2至3期既痔瘡，就建議做啲保守治療先，一係橡筋紮咗佢，一係就水溶解。咁我都同意既，醫生冇話特別sell你，但係佢講既嘢就係建議我做水溶解，話橡筋紮就50%復發，水溶解就20%度。既然我都上網睇過，所以都信咗佢做水溶解。

同意咗就即時可以做，過程大概20分鐘到，係清醒狀態之下做。過程中就好似有啲蟻係咁咬你屎眼入面，而且好撚急尿。我唯有死忍，終於忍到完咗，就走得，埋單1萬5000蚊。之後冇藥俾我食既，又冇同我講有咩要注意，淨係叫我一個月後返去覆診。想約覆診嗰陣，姑娘仲話冇嘢唔洗覆都得啦，叫我到時先約。可能佢趕收工啦，我都以為好快會好返，所以就走咗。

做完嗰幾日，屎眼係幾唔舒服既，唔係真係完全無痛，去屙屎仲要成日出血，但係我未做之前係冇血架喎，過咗一星期都係咁，打去問姑娘，佢都係hea答:一句係咁架啦，啲屎要lum 啲囉。

如是又過咗幾個禮拜，啲痔瘡全部都仲係度，去到覆診，問醫生點解仲係度，佢就話佢哋已經謝謝哋架啦，冇問題架啦，過多段時間就會冇咗，於是我又信咗佢。

之後雖然啲痔瘡全部仲係度，但係冇再啦啦成粒彈出嚟，我都以為應該慢慢就會好返，點知原來係完全冇用，好快又發作過

上次講到水溶解之後，我以後痔瘡會慢慢冇咗，點知原來唔係既。

我一路係度等佢好返，等到今年過年到啦，發現屎眼又好似無啦啦有嘢走出黎。不過嗰陣第五波，work from home，諗住睇下佢會唔會自己好算，因為我當時仲信個醫生，啲痔瘡最後係會謝咗既。

點知有一日落街行下，行咗一個鐘左右，屎眼就開始痛，原來行行下粒痔瘡又走咗出黎。之後都係咁，行行下痔瘡就走出黎，仲衰過以前。咁樣生活真係好唔方便，因為出街行唔得耐。痔瘡出咗黎就算塞返入去，返屋企之後都係會痛幾個鐘。

冇辦法之下就返去問下個醫生，佢睇完都唔解釋，直接話上次水溶解唔work, 今次叫我做痔瘡槍水術，包好返咁話。收費38k到啦。我見佢之前嗰啲都唔撚得既，今次就梗係唔信佢啦，決定返屋企上網睇下有冇其他方法。

返屋企google下，都見到有人話水溶解係呃人，冇撚用既，好後悔自己點解咁急求醫，又唔做多啲research。所以係呢度想勸下大家，千奇咪撚信水溶解，冇撚用架，除非你肯定你痔瘡好輕微，否則唔好浪費金錢同時間。我之後睇過幾個專科，都係同我講水溶解冇撚用。起碼係我呢種情況真係證實咗冇用先。大家決定用呢個方法之前真係要三思。

之前水溶解冇撚用，個醫生話冇用就冇用，建議做痔瘡槍。今次我醒啦，做多咗research, 見babykingdom有人分享痔瘡槍後遺症，大家有興趣可google下，見到咁大手尾就驚啦，所以就去睇第二個醫生拎second opinion。

另一個醫生就大力反對痔瘡槍呢種方法，原因係復發率高，會留咗啲釘係屎眼入面，同埋有機會發生嚴重併發症，所以佢就推介用傳統痔瘡手術。

傳統痔瘡手術既好處就係復發率低，不過術後會痛好耐，見有巴打都分享過，上網google下都會見到好多人話術後會痛到懷疑人生，持續一個星期以上。

見到手術咁撚煩，我自己都驚驚哋，所以開始睇下有冇其他方法去解決呢個問題，不過我好後悔做咗呢個決定，因為啲偏方秘方醫我唔好之餘，仲搞到越黎越嚴重。係呢度勸各位想試其他方法既時候，一定要考慮清楚

為咗唔想做手術，開始上網睇下有咩其他方法，有巴打分享用中醫搞掂咗，咁我就睇下有冇中醫療法啦。上網見到個聲稱有獨門發酵中藥，用啲藥查喺個屎眼到就會好返，仲要99%一次成功。個中醫係喺銅鑼灣既。上網google中醫痔瘡就會見到。

其實佢吹到咁大，我都有啲懷疑，不過係babykingdom有好多女人話俾佢醫好咗，當然都有人話唔work不過我心急求醫，覺得我應該唔會係嗰個唔work既人掛，本住一試無妨既心態去搵佢睇吓。

上到去，個環境都幾up dup吓，不過我冇咩睇中醫經驗，以為中醫診所都係咁上下。個中醫師就話，好嚴重，要即刻做，仲話已經係4期痔瘡，收我12k就可以馬上做。我本身都想諗下先，因為隔離forum 啲女人都係話幾千蚊就搞掂。不過佢當時就即刻拎咗一疊單出黎，話之前邊個邊個都係收12k, 又拎一啲相出黎話成功咗會點，又拍心口話做完一定得。於是心急求醫既我又信咗人，心諗中藥姐，唔得都應該冇事既，不過哩種諗法係大錯特錯。

咁個所謂醫師就查咗啲藥係我屎眼到啦啱查完都冇乜嘢既，個醫師話做完嗰日千奇唔去屙屎，廢事影響療效。我平時成日都忍屎，心諗應該應付到。

不過係返屋企途中，已經急屎到仆街。返到屋企，嗰種急屎既感覺真係好撚癲，搞到我係床上典黎典去，人生從來未試過嗰種感覺。坐立不安已經唔足以形容。好似無時無刻都有啲千年大屎要係係屎眼湧出嚟咁。死忍咗幾個鐘，先慢慢好少少，不過嗰種感覺都係持續係度。一開始仲屙唔出尿添，好彩最後都屙到。

成晚都係咁過，完全冇瞓過咁制，好撚辛苦。到咗等二朝，終於可以去廁所。屙屎果陣發現，有一邊既痔瘡真係冇走出黎喎，但另一邊仲有走出黎，而且好大粒。即日去覆診啦，所謂覆診都係去俾佢望下，同埋用太陽燈照下個屎眼。

醫師話仲有凸出來嗰邊慢慢都會縮既，我見另一邊好神奇咁冇咗，所以當時都信佢既。

之後嗰一兩個星期，屎眼都仲係有腫脹感，有幾日仲發起燒上黎，我諗可能屎眼入面發梗炎啦。之後凸出來果邊都仍然係度，冇好轉到，咁就打去問佢啦，個醫師就叫我上去再俾佢睇。

今次上到去，佢叫我去屙篤屎先，話咁樣睇得清楚啲。屙完佢又睇下屎眼，今次竟然話有外痔。都冇醫生話過我有外痔，不過佢又好似醫好咗我另一邊既痔瘡，我就信佢啦，以為係中西醫定義唔同姐，同埋佢拍心口話包好，同埋唔洗再俾錢，就由佢搞啦。

今次佢先用針篤我個痔瘡，等佢放啲瘀血出黎先，再查佢啲藥。篤落去嗰下痛到仆街。查完藥冇上次嗰種強烈便意感覺，以為今次會好快好返啦，點知今次之後先係惡夢既開始。

第一日好似都冇事，不過原來俾佢搞完，粒痔瘡腫撚咗，仲要長期外露。慢慢粒嘢變得越黎越大，又硬，又滲血，仲要痛到仆街。

返去俾個中醫睇下，佢話出咗黎就冇計啦，唯有等佢自己好返，叫我多啲返去佢診所俾佢用太陽燈照下，返屋企就用熱水浸下。又叫我去買啲藥膏搽下。

從來都未試過咁嚴重既痔瘡，成粒乒乓波咁大係個屎眼到，仲要不停滲血。用佢方法除咗舒緩下之外，都好似冇乜用，上網google下，應該係俾佢搞到出咗血栓性外痔。啲人都係話除咗浸熱水都冇咩辦法，除非去開刀割咗去。

我抱住信埋個醫師多一次既決心，用浸熱水加藥膏方法持續咗兩個星期，粒係慢慢細粒返，不過都仲係卡住喺出面，同埋不停滲血。

之後再上去叫佢睇下，佢竟然話，冇辦法架啦，唯有等佢慢慢縮，有啲人成世都唔縮架，你再唔縮又覺得影響你嘅，咪睇西醫叫佢哋割咗佢囉，人人體質唔一樣，我都唔知係你身上唔work 架。

屌佢老母，如果淨係唔work我都可能冇所謂，但我係俾佢搞到仲嚴重咗好多。原來啲中醫一句每個人體質唔一樣就玩撚曬，唔洗負責任。係呢度勸大家千奇唔好信中醫幫到你，特別係嗰啲聲稱有獨門秘方嗰啲，9成9呃錢。

返到屋企，自己上網做research 自救，見到個大陸網知乎有人話持之以恆浸熱水會浸到粒血栓外痔消曬。於是我就自救，開始咗漫長浸屎眼之路，堅持咗兩個幾月，最後粒嘢真係慢慢細咗。不過，之前話俾個中醫醫返果邊又開始成日走出黎，即係俾撚咗12k佢乜都冇醫好過，仲要浪費咗我幾個月時間同埋受咗好多無謂既苦。好撚後悔去搵過哩個中醫

做完痔瘡槍幾年，養和住左兩晚，埋單5皮
冇手尾跟

經過幾個月漫長既自救之路，粒血栓外痔總算變返之前既狀態，不過就啲痔瘡問題係完全冇解決到。之後的起心肝要搵外科醫生搞掂佢，其實哩啲係我一開始就應該做既事黎，可惜為咗唔做手術，行咗好多冤枉路。

睇咗幾個醫生，都有唔同既suggestions, 最後揀咗用一種叫THD既手術，係用超聲波技術將血管結紮，再用針線將凸出來既痔瘡拉返入去。好處係冇咁痛同埋冇痔瘡槍嗰啲併發症，壞處係相對傳統手術復發率高啲。

上個星期做咗呢個手術，連埋照腸，瞓咗一晚醫院，埋單要十萬。

依家仲康復梗，痛就真係唔多痛既，不過啱做完手術係有假便意，持續困擾你。不過前一兩日都係冇屎屙既。雖然唔痛，但長期有便意，其實都好辛苦

之後嗰幾日就有屎屙既，不過一日要屙三四次，到依家就黎一個星期啦，之後就覆咗診再update

巴打做咗幾耐？依家五萬應該做唔到
可唔可以分享下有冇改變生活習慣？

外痔有好多人都唔理，因為處理方法就係得傳統手術開刀，如果有保險，快啲搵個醫生confirm下，如果中咗招，要改變生活習慣先唔會惡化

前後加埋成150k

一開波去做手術咪得 仲要去睇中醫

好彩有保險

我都知自己傻，所以要哩個post 警世

樓主使左好多冤枉錢

係呀，好彩保險cover咗大部分

有冇醫生介紹

唔敢介紹住，因為未知康復成點，如果效果好好可以介紹俾你

留名 有第二期內痔 大便好麻煩
醫生建議我保守治療 但我想做痔瘡槍
聽完樓主講就有啲卻步

好多醫生都唔做痔瘡槍了，佢哋話英國直頭係禁止呢種手術，所以你要考慮清楚

利申，冇fact check

on9
手術都驚
一早直接了當啦