【「八中四」測風網絡十五年
讓數據說話,再次探討近年八號波到底「手緊定手鬆」?】
每逢打風,總有人會質疑天文台處理手法。雖則呢啲已經屬「年經」,打親風都會比拎返出黎講一次。但畢竟「我嗰度好大風點解唔掛八?」;「我嗰度都無風扯乜嘢八號?」屬於不科學嘅體感判斷,倒不如讓數據說話。適逢廿一世紀首個十號波十周年暨史上最弱八號波五周年,我哋同大家再次探討下呢個問題。
天文台過往主要參考維多利亞港風力,以判斷是否需要發出三/ 八號信號。2006年派比安事件後,天文台將參考測網絡擴展至全港,並將8個自動氣象站定為參考測風站。八站網絡至今運作15年,咁到底近年嘅八號風球「屬鬆屬緊?」
我哋將本年初旋暹芭,以及11至21年風季嘅八號風球作出統計,將現時「八中四」視為達標嘅準則降為「八中二」。結果顯示,前台長岑智明任內所發出過八號或以上熱帶氣旋警告信號嘅十七個案例之中,只有五個案例曾經達到「八中四」標準,當中三個案例更加係令到本港發出十號信號(韋森特、天鴿、山竹);而熱帶氣旋蓮花以及洛克更加係烈風「八中零」。即使將標準減半為「八中二」,亦只係多五個案例,合共十個案例「達標」。
而鄭楚明由2020年就任至今,一共發出過5次8號信號,但若以「八中四」為標準,其達標率則為零。改以「八中二」作標準嘅話,則只有帶嚟九號信號嘅海高斯,以及帶嚟「突如其來的八號波」嘅獅子山「達標」。
由2011年起至今廿二個八號波當中,只有約兩成達「八中四」標準,加入八中二/三亦只有約五成。
如果單純以「八中四」為標準,咁觀乎近十年案例,到底天文台發八係鬆定緊手,相信不言而喻。系統至今運作十五年,除曾於2013年以流浮山取代濕地公園外迄今並無其他大改動,而參考站的參考價值亦隨著城市規劃及發展而下降,
有個別參考站甚至由系統於2007年成立至今亦未曾錄得烈風。固然八站系統性質上非常「事後孔明」,天文台預報員相信亦絕對不會只以考慮「吹唔吹到四個站」作扯波標準。但到底八站系統係咪可以基於提高參考價值,降低「事後孔明」程度嘅前提下作出改革,相信係值得探討嘅方向。
#八中四
#韋森特 #洛克
#METWARN #天氣預警