過往曾有一位內地網紅「蛋姐」拍片畀網友了解日本「出租男友」服務，當時佢曾與一位出租男友約會，見面時卻大呻男方顏值同想像中有落差，連2個鐘都捱唔過最終要逃走！近日微博有網友就晒出日本出租男友網站截圖，掀起網民討論。
其中一個聲稱「登録數全國No1」嘅網站「恋かれ★」首頁就放上幾位出租男友嘅相片，更寫住呢啲係「店長推介」，呢幾位店長推介嘅出租男友年齡為20歲～29歲，職業各有不同，但網站上寫明佢哋嘅個人資料，顧客覺得適合嘅就可以喺網上預約。
店長推介
其中一位24歲嘅春菜志織就曾經獲內地網紅「蛋姐」預約過，佢係店內人氣第一位，網站資料指佢非常了解女性感受，而蛋姐拍嘅影片中佢一除口罩就同網站上嘅個人照有所出入，好難認出係同一個人！
春菜志織
日本出租男友服務價格 喺價錢方面，基本價格為一小時5,000～7,000円，視待男友嘅「等級」而定，最少要租兩小時，另外要畀「出差費」，男友約會期間嘅餐費、戲院等嘅費用都係由客人支付。基本上同出租男友約會2個鐘最少要$600港幣。
另一個網站「KANSAI」費用相對較平，「人氣Top 8」嘅出租男友一小時都係4,000円。人氣Top 8之一嘅比嘉龍介嘅顧客評價（用後感）則指約會時佢有「生田斗真」嘅感覺，而且講嘢好風趣，給予好評！
人氣top 8
比嘉龍介
好多網民睇完相之後就表示以呢一眾出租男友嘅外在條件而言完全唔值10,000円嘅價格！更直言估唔到做出租男友嘅門檻係咁低！翻查以上兩個出租男友網站，對於出租男友嘅外型的確並無特別要求，只需有誠信、會經常update社交網站等就可以，不過兩間店都唔接受有紋身嘅出租男友。
不過亦有人指出租男友嘅服務對象本來就係一啲被逼婚、要見家長嘅女性，所以唔需要太靚仔，平凡啲更似真男友。但有人反駁指如果顏值太低或者會被親戚問點解唔搵個好啲嘅男朋友。
咁嘅質素唔好拎出嚟啦