古巨基今日（6月22日）推出《I Really Love To Sing》合唱專輯第一炮，請來呂爵安（Edan）合作打頭陣，合唱《飄流教室》。MV女主角則邀來柏安妮的17歲女兒許恩怡（Natalie）擔任。
基仔於2003年奪得「叱咤樂壇我最喜愛的歌曲大獎」後，他在頒獎台上留下一句經典金句「我真係好鍾意唱歌……」。基仔表示已有幾年沒有推出唱片，這個project以「我真係好鍾意唱歌」為題是因為他覺得音樂市場即使比以前辛苦，但仍然有很多很努力的歌手和音樂人繼續唱、繼續為夢想而努力，「而我自己亦係其中之一，所以呢個project就咁樣命名。今次邀請咗唔同曲風嘅新晉歌手一齊去完成呢個project，係一個全合唱嘅專案。」
至於邀請Edan合作的原因，基仔說：「《飄流教室》當年冇被成為主打，所以喺今次project度，我好想搵一個心儀嘅人去同我一齊唱呢隻歌。今次嘅新編曲係好classy，配古典鋼琴咁。上次睇MIRROR個show，Edan solo嗰part鋼琴自彈自唱令我好深刻，所以我就覺得係非Edan莫屬。」
Edan受寵若驚地表示：「從來冇諗過，當初花姐同我講：『喂！古生話想搵你合唱喎，你肯唔肯呀？』嘩！梗係好啦！因為未試過同一個大前輩合作，同埋我細個都有聽古sir嘅歌，所以我覺得呢件事係好神奇。」他更表示錄音期間「學到好多嘢」：「古sir每次都會嚟監製我嘅錄音，俾咗好多指導我，舒文監製都係，所以令到我對唱歌多咗好多諗法。同埋古sir真係好貼心，我問佢啲乜佢都好樂意去教我、幫我，所以好多謝佢。」
基仔亦對Edan讚不絕口，「我記得佢話知道自己唱歌未必係最好，所以只要有其他唔同嘅機會，佢一定會好願意同埋俾心機去試！係一個好謙虛、好勤力嘅藝人。喺錄音過程裡面，我發現Edan喺假音上係好好，擁有一把好靚好滑溜嘅假音。」
至於MV其中一幕，是講述Edan跟心儀的許恩怡（Natalie）去基仔於CD舖所舉行的新碟簽名會，Edan笑說：「今次感受到『前夫』嘅感覺，即係陪個女仔嚟見自己嘅偶像。」而基仔則演回本尊，當他一踏進CD舖，回憶立即番晒嚟，「見到啲海報、自己啲碟，就諗起好耐冇做簽名會！好懷念。」
為咗痴mirror可以去到幾盡
