。同埋由於喺臨床標本入面見到蟲蛋嘅機會係大過真係見到成條蟲，所以我po嘅多數都係蟲蛋。但單憑蟲蛋嘅樣其實已經大致上分辨到病人係感染到邊隻蟲。部份嘅圖係我自己影（主要係蟲卵），如果係網絡圖片我會註明。1. 毛首鞭形線蟲（Trichuris trichiura）
毛首鞭形線蟲蟲卵
毛首鞭形線蟲成蟲（網絡圖片：https://www.cdc.gov/dpdx/trichuriasis/index.html）
呢隻嘅蟲蛋好易認因為蛋嘅兩端有好明顯嘅透明卵塞，而卵塞就係當幼蟲孵化嘅時候由卵走出外面嘅出口。診斷鞭蟲病（Trichuriasis)嘅方法就係用顯微鏡睇下病人嘅糞便有無蟲蛋。如果病人體內得少量嘅鞭蟲就可能唔會有病徵，但如果係大量嘅話就會出現腹痛同埋肚瀉嘅情況，甚至有血便。成蟲可以有大約5年嘅壽命。
蟲卵由腸道排出，呢個時候蟲卵仲未有傳染性，需要以泥土作為媒介提供溫暖潮濕嘅環境畀佢哋發育成有傳染性嘅胎蟲卵（Embryonated egg)。如果農作物俾胎蟲卵污染而我哋又冇妥善咁清潔同煮熟啲食物，就會好易病從口入
。胎蟲卵去到小腸之後就會孵化，然後鑽入小腸黏膜度發育。大約10日之後幼蟲就會走去盲腸，發育成為成蟲。成蟲喺盲腸交配之後產卵，然後卵順住糞便排出體外。2. 蛔蟲（Ascaris lumbricoides）
蛔蟲已受精嘅卵
蛔蟲已受精同未受精嘅卵比較圖（網絡圖片：https://laboratorytests.org/ascaris-lumbricoides-roundworm-egg/ ）
蛔蟲成蟲（網絡圖片：https://www.cdc.gov/dpdx/ascariasis/index.html ）
圖入面嘅係蛔蟲已受精嘅卵，無受精嘅卵個樣係有少少唔同，不過唔記得影，所以用網上圖片代替啦
。未受精嘅卵主要係大粒啲同長身啲。迴蟲通常住喺人嘅小腸入面，吸收我哋喺小腸經過嘅食物生存。所以如果感染到迴蟲嘅話尤其係小朋友好易有營養不良嘅問題。成蟲喺小腸度產卵，啲卵會隨住糞便排出體外。當帶有蟲蛋嘅糞便污染到水源或者農作物等等，就會有機會令其他人病從口入。
3. 中華肝吸蟲（Clonorchis sinensis, Chinese liver fluke）
中華肝嚟蟲蟲蛋
中華肝吸蟲成蟲（網絡圖片：https://www.cdc.gov/parasites/clonorchis/index.html ）
呢隻我諗係今日介紹咁多種寄生蟲喺香港係最常見。圖入面係喺病人嘅膽管度搵到嘅中華肝吸蟲嘅蟲卵，蟲卵嘅其中一端可以好清楚咁見到一個卵蓋，都係用嚟畀幼蟲孵化嘅時候喺嗰度走出嚟。呢種寄生蟲涉及到三種宿主，其中淡水螺係第一中間宿主（First intermediate host)，卵會喺螺嘅身體入面孵化變成尾動幼蟲（Cercariae)（留意中華肝吸蟲嘅卵只會喺淡水螺體內孵化），尾動幼蟲會排出螺類嘅體外並停留喺水度等機會接觸到魚類。當佢哋接觸到魚之後就會進入佢哋嘅皮膚或者魚肉入面，而魚就係佢哋嘅第二中間宿主(Second intermediate host)，喺魚入面尾動幼蟲會變成囊狀幼蟲（Metacercariae)，而中華肝吸蟲只會喺囊狀幼蟲階段有能力感染人類或者其他哺乳類動物，所以只有食淡水魚會感染到佢哋。
人係佢嘅嘅最終宿主（Definite host)。當人食咗有囊狀幼蟲嘅魚肉，佢哋會喺十二指腸（Duodenum)繼續發育，最後會喺膽管成為成蟲。而成蟲可以喺人體存活數十年之久。成蟲會喺膽管產卵，所以喺膽汁會發現佢哋嘅卵並診斷到病人感染到呢種蟲。而卵會順住消化道移動然跟住糞便排出體外。如果有淡水螺食咗卵嘅話佢哋就會喺螺到孵化，反之佢哋永遠唔會孵化到，亦都唔會有任何感染人嘅能力。
感染中華肝吸蟲可以冇任何症狀，但都可以有食欲不振、發燒等等嘅明顯症狀。而由於中華肝吸蟲長期塞住個膽管，可能會導致膽管梗阻、慢性黃疸病等等，甚至會發展成肝硬化或者膽管癌等等嘅嚴重疾病。
4. 鉤蟲（Hookworm）
鉤蟲蟲蛋
鉤蟲桿狀幼蟲（Rhabditiform larva)（網絡圖片：https://www.cdc.gov/dpdx/hookworm/index.html ）
鉤蟲絲狀幼蟲(filariform larva)（網絡圖片：https://www.cdc.gov/dpdx/hookworm/index.html ）
鉤蟲蟲卵大約50 μm，外壁好薄，外壁同埋內裏嘅細胞有明顯嘅間隙。視乎發育階段，可以觀察到卵入面有唔同數量嘅細胞。成蟲大約1cm。絲狀幼蟲會穿過人嘅皮膚進入血液，隨住血流去到肺嘅微絲血管，進入肺部，再沿住氣管爬到咽喉俾我哋吞落肚。幼蟲去到小腸之後會發育成成蟲同埋產卵。卵會經由糞便排出體外並喺泥土孵化成為桿狀幼蟲，然後慢慢發育成為有感染能力嘅絲狀幼蟲（桿狀幼蟲冇感染能力）。而當其他人身體接觸到呢啲受蟲卵污染嘅泥土嘅話啲絲狀幼蟲就會有機會穿過其他人嘅皮膚感染佢哋。
每個人嘅病徵可以唔同，有啲可以完全冇病徵，有啲就會因為寄生蟲依附喺腸壁導致腸道出血、腹瀉、腹痛同埋營養不良等等。
5. 糞小桿線蟲（Strongyloides stercoralis）
糞小桿線蟲桿狀幼蟲
糞小桿線蟲桿狀幼蟲頭部
糞小桿線蟲桿狀幼蟲尾部
雖然之前略略介紹過，今次詳細講吓。佢哋嘅絲狀幼蟲同Hookworm差唔多，都識得穿過人體嘅皮膚進入血液然後去到肺部，再去到咽喉俾我哋吞返落肚去到小腸。雌性嘅成蟲會鑽入小腸壁黏膜並喺入面產卵。蟲卵孵化之後嘅桿狀幼蟲會經糞便排出體外，又或者發育成為具有感染力嘅絲狀幼蟲穿過牆壁經血液走去其他器官。如果受到佢哋嘅感染，喺痰或者糞便都有機會搵到有幼蟲並作出診斷。由於成蟲係喺腸壁黏膜組織入面產卵，所以一般我哋好少會喺糞便入面見到蟲卵，只會見到成條蟲。圖入面嗰隻就係糞小桿線蟲嘅桿狀幼蟲。
感染到糞小桿線蟲會有腹痛、腹瀉、肺炎等等嘅症狀，免疫力低嘅話有機會導致全身感染甚至會死亡。
———————————————-
上面介紹呢五隻除咗中華肝吸蟲之外其他都係線蟲（Nematodes)。其實關於寄生蟲嘅知識可以係好複雜
所以我盡量講得簡單啲。如果有其他嘢想知嘅話可以留言問，又或者有嘢補充嘅都可以留言交流
同埋腸道嘅寄生蟲又點會剩係得5種，遲啲會再同大家一一介紹。有錯請指正
謝謝
係咪人人都會有 定係食過啲奇怪嘢先有
食飯時間