34歲蔡卓妍(Sa)自從同鄭中基離婚、2015年又同「的士陳」分手，阿Sa感情dry足咁耐，全程投入工作，不過今日有周刊指，阿Sa多得好友何超蓮同馬天佑撥「大葵扇」，阿Sa同「麻將館大王」太子爺石恆聰（Anthony）今年4月拍拖，個名好熟，之唔係連詩雅舊愛囉!
阿Sa透過短訊回應《蘋果》稱：「o依家好開心，多謝大家關心，其他唔講咁多了!」
據周刊指，阿Sa上周日更被影到兩度上男友位於畢架山嘅屋企過夜，阿Sa七人車直駛入大宅，之後阿Sa先落車，據周刊指，連詩雅同Anthony喺2014年撻着，上年宣佈分訊，但12月秘密翻撻，今年2月又再分手，三年間離離合合，盛傳係Anthony覺得連詩雅未玩夠先決定分開，不過連詩雅一直想復合，知道阿Sa同Anthony一齊，佢都冇放棄，但係石母比較喜歡阿Sa，覺得阿Sa有本事搵銀，而唔係貪阿仔啲錢。
周刊又指，阿Sa去過夜嗰間市值3.3億嘅大宅，係石家今年3月先買，由Anthony四兄弟姊妹持有。Anthony係城中鑽石筍盤，為「麻將大王」石鑑輝後人，石鑑輝當年係四大華探長呂樂身邊嘅紅人，除咗開麻雀館，仲有不少物業，估計市值逾百億。
http://hk.apple.nextmedia.com/enews/realtime/20170628/56885698
