▌講起曾江，少不免提起佢 美源髮采 個廣告，原來當年間公司買斷咗個播放權，所以播咗40幾年都未完，曾江喺2013年嗰陣接受《蘋果日報》訪問時曾慨嘆自己當年「無知」，謂道「當年自己嘅經理人同廣告公司談判好，決定賣斷廣告嘅播放權，電視播多幾十年，我一蚊都唔會收到。」
▌嗰年，曾江幫Salon de Pro拍起咗兩個新嘅染髮廣告，兩個都對美源髮采有諷刺意味。其中一個係朋友問曾江係咪仲用緊「嗰隻」染髮霜，曾江就擰頭話「我用緊Salon de Pro染髮霜」，另一個就更加有骨，望吓對白都知。
曾江：「（美源髮采）染到咁假，我點見人呀？」
方中信：「都幾十年啦，我以為你好滿意添」
曾江：「黑到好似戴假髮咁，我點滿意啫？」
方中信：「試吓我呢隻吖，自然好多㗎。」
曾江：「Salon de Pro？我唔受得刺激㗎」
方中信：「無味，無阿摩尼亞，『唔會激親你』。」
▌美源髮采當年買斷播放權，無再分紅畀曾江係咪唔厚道？Salon de Pro咁樣攻擊自己競爭對手又係咪恰當？呢啲留返畀大家慢慢討論，不過如果我同大家講，呢兩隻牌子今日仲係 TVB廣告商，相信好多人都會覺得再無討論空間。
附加資料：Salon de Pro代理商為先寧國際（Saving International），旗下染髮產品亦包括Cleodite、飄然利尻昆布，全部有喺TVB落廣告。
