住公屋，屋企冇父幹，啱啱好夠開飯
最大心願係自己買樓搬出公屋，一直向住呢個目標努力緊
屋企有個廢青細佬，中學畢業之後就冇讀書／返正職
每日除咗食同訓，就係同一班廢青fd全日打機
平時最多一個星期返兩三日parttime，每日返幾個鐘賺下飯錢
屋企人不斷叫佢唔讀書就搵份正職做，冇讀書唔緊要搵d唔洗學歷嘅工
一路做一路學，慢慢儲經驗，直頭教埋佢搵工，幫佢screen埋工叫佢apply
但佢就好多藉口，一係就話份工太辛苦，一係就話份工工時長，一係就話份工閪唔想做
我一直都有同佢好聲好氣，慢慢同佢講道理，解釋返個社會現實
冇學歷冇經驗冇父幹，有邊個唔洗做，一開始係要挨下
直頭同佢解釋埋，將來父母冇野做／百年歸老，我亦都會搬出去有自己嘅生活
而佢而家日日打機唔洗返工嘅爽，係建基於有屋企人幫佢交租，水電煤，上網費等等
但係將來唔會有人養到佢老，佢始終要靠自己搵食／生存，樣樣都係錢
想將來有好嘅生活，後生有少少辛苦在所難免
佢而家做廢青其實係透支緊自己嘅生活，將來一定要還
但佢一路就好似聽完就算，左耳入右耳出，繼續我行我素
有時我都15 16，同樣嘅說話我講過好多次，講到唔想再講，好攰好似對牛彈琴咁
我完全唔明點解佢可以咁大安旨意，一d對將來生活嘅危機感都冇
其實佢聽唔聽我講，將來生活點樣，衰d講其實唔關我事，唔影響到我
但一場親人，明知佢再係咁落去，未來一定慘淡，唔繼續點醒佢幫佢又於心不忍
想問下我應該放手由佢，由佢選擇自己揀嘅路，後果佢自己承受，定係抱住少少佢仲有得救嘅希望，盡力再谷下佢
