[DSE2022] 通識5**自修分享(最後兩年)

Hello又係我，一個無聊走去自修通識考5**嘅人

通識科剩返一年多，但仲有兩屆同學要考，所以繼續同大家免費分享通識考試。

以下係分享考5以上嘅原則，做齊就5+，做唔齊就自己努力，仲有12日可以升grade。總有師兄師姐留言話無讀過就拎5。如果現屆同學可以，咁就應該將時間放係其他科，提高best 5 嘅分數，畢竟入大學先係目標，考好呢科只係充份條件，並不是必要條件。

以下係幾個舊post︰
[DSE 2021]點考通識？通識5**完全自修攻略
- 分享自 LIHKG 討論區
https://lih.kg/gbRCQS

通識5**分享 完全免費
- 分享自 LIHKG 討論區
https://lih.kg/1568338

[DSE 2019] 通識5**考試技巧 完全免費
- 分享自 LIHKG 討論區
https://lih.kg/970893

如果唔想追舊post，可以睇呢個https://padlet.com/dselsjohn/dselsjohn
都係免費野。

呢科考左10屆，溫習資料愈黎愈豐富，但坊間要求學生背嘅內容愈來愈多，變成大包圍嘅讀法，一方面有違學科原意，另一方面遠離考評要求，亦唔係一種有成效嘅讀法。要考好通識，只需要處理「內容」和「技巧」兩個部分。

內容遠比所謂嘅考試技巧重要得多，簡單黎講係要將六個單元合返埋一個黎處理，將唔同嘅知識串連起黎運用。

一、釐清課程範圍及概念
見到隻字諗起邊個單元係基本，同時亦需要分辨生活上邊d議題屬於課程之內／外。課程之內係指根據《課程文件》，學校老師通常整理好三年教學流程，但較少同同學講清楚課程範圍，結果有d想自學嘅同學反而係溫習時有疑問究竟要讀邊d。當你知道考嘅範圍，咁先可以減少浪費讀不必要的時間。

https://ls.edb.hkedcity.net/file/C_and_A_guide/201511/LS_CAGuide_c_2015.pdf

唔駛成份文件睇唒，只需要注意pdf p.23 – 50內，每個單元主題嘅「探討問題」、說明部分，就可以知道課程包攬嘅內容。

舉兩個簡單例子︰
全球化、生活素質除了係概念之外？仲同考試有乜關連？

一、 全球化考經濟全球化和文化全球化，而無政治全球化(很早年的東西)，討論主要由全球化的特徵、傳播方式、原因、影響開始，方向集中在
1. 單一 vs. 多元；
2. 發展中國家 vs. 已發展國家；
3. 發展中國家利多於弊 vs. 弊多於利等 etc.

二、 生活素質係分物質和非物質，以及政經社文環等方面外，進而可以探討︰
1. 政府政策是如何改善市民生活／受到哪些限制；
2. 政府政策有無效改善市民的生活素質；
3. 是否應提升一方面的生活素質而減少另一方面(如經濟發展vs. 文化環境保育)；是否應提升某一方而犧牲另一方(大眾vs. 小眾／某持份者vs. 某持份者) etc

全球化又點樣夾返埋一齊出？
例如︰2018年卷二3b
「全球化妨礙多於促進對大規模疾病的控制。」你是否同意這看法？解釋你的答案。（12分）

中國+能源
2021年卷一2b
參考資料B，指出及解釋中國太陽能的使用迅速增長的兩個原因。（6分）

當分辨到要讀邊d，下一步就運用單元概念串連起不同的相關議題。

只要嘗試將「課程範圍+概念+考題」組合得愈多，就會發現呢科考黎考去都係果堆嘢。唔信就自己將學校派俾你嘅past paper，順序排出黎，來來去去都係果十幾個恆常議題。

係考試時，作答的內容同概念亦幾乎係穩定的。最終只需要視乎考嘅議題，而改變例子再論證。(所以有d同學仔一開卷就可以寫，基本就唔駛諗。)

二、議題轉移
tip中題只係bonus，唔好覺得老師一定tip中，就算中議題，都唔一定中題型。假如唔中題型，唔駛轉彎嘅同學又死背堆嘢落去，反而增加離題風險。重申死背唔係呢科高分嘅必要條件。

相反，要學識轉移議題，例如傳染病X的原因、影響、挑戰、建議等論點，係可以套用去傳染病Y，再按傳染病X/Y例子說明，咁就可以用最少時間讀通最多議題。

即係第一點所講，同學可以自行組合內容同概念，並加入唔同議題及例子說明。
舉個例子︰
當傳染病X發生在香港／中國／已發展國家／發展中國家／國際組織時，
所應對的情境有無不同？例如︰可動用資源不足、市民的公共衛生水平偏低、基礎建設不足等，係可以應用係以上每個情境？
如果相同，即係你讀少個pt；
如果不同，即係你多一個向度寫。

當同學歸納整唔同嘅內容之後，就可以處理技巧。

三、技巧
坊間講嘅考試技巧大致係講題型、作答結構、分配時間等。

題型可以令你唔會答漏嘢，或者避免離題。前提係，你要有充足知識準備去答，雖則卷一可以抄，但卷二亂寫就未必能夠好高分。

Sample
上考評局睇level 5 or above嘅sample，答出黎嘅內容、論據都好豐富，亦可參考下答題篇幅。唔好再做傻仔俾錢買sample
http://www.hkeaa.edu.hk/tc/hkdse/hkdse_subj.html?A1&1&3_25

答題技巧會咁樣整理︰
第一， 所有題型的作答結構，即每一個論點／段落都要做到呢個要求︰

主題句 (用概念歸納) + 引用資料/論據 + 伸述說明回應題目


只要參考返上面考Level 5 or above的sample，就可以見到果d同學幾乎段段都好工整。(Marker俾分都易，起碼唔駛人搵，亦唔怕唔小心搵漏。)

第二，唔同題型有少許答法差異，但首先要分得清邊隻字出現就可以判斷成邊個題型。可以用題目提問字歸納以下類別。見到新字唔駛緊張，來來去去都係以下問法（* 每年都會有新嘅提問字，1-2個分題左右。）……

詮釋資料(數據/ 文字/漫畫(好少問))
提問字︰描述……模式/趨勢/關係/特徵/結果……

原因/因素
提問字︰為甚麼/原因/因素

影響
提問字︰影響/問題(負面影響)/結果

挑戰
提問字︰挑戰/困難/障礙/限制/局限

建議
提問字︰提出……方法/解決方式

價值觀（只有練習卷及2013年考過，近年改為考「矛盾」）︰
提問字︰價值取向/價值觀

持份者衝突
提問字︰衝突/矛盾/兩難

論證立場(以前出10分，依家出8分/12分)
提問字︰多大程度上同意 / 是否同意 / 應否「A>B」

評估（常見於卷二b題(12分))
提問字︰評估……影響/成效 或 妨礙多於促進

比較（常見於卷二b題(12分)，2021卷1,1c都出了8分)
提問字︰比較 /利多於弊/ 「A比B更重要」/「A是最重要的……」/「哪一個方法較能……」

同學可以拎是但一份past paper，試下係咪分到類先，當分得清楚就要知每個題型要求。抽幾個考評局不時會提嘅常犯錯誤出黎講︰

詮釋資料(數據題)
1. 要引用資料內數字，真係要引，唔好講大約；
2. 計算數字，得出變化。不外乎計下隨時間的轉變百分比、兩個項目之間差距等；
3. 整合 / 利用數據結果，得出結論，記得用個概念包返底。

原因/因素
1. 因素一定要用概念歸納再說明（如經濟因素），解釋「有」呢個因素及「無」呢個因素係如何導致或不導致有關情況（如有經濟誘因就咁咁咁、無就咁咁咁…）。
2. 原因就無以上呢個要求，相對簡單地解釋呢個原因是如何導致有關現象。

影響
1. 要展示事件/議題出現後，造成由無到有嘅影響
2. 注意有無要求正面/負面影響，無就通常一正一反

挑戰
1. 強調「為何做不到有關情況」，汪意與負面影響／原因不同
2. 常見挑戰/困難︰經濟誘因／持份者衝突／技術性細節限制／可動用資源不足

建議
1. 留意題目有無限定「持份者」，無就盡可能用不同持份者提出建議
2. 要建立一個合理嘅建議，可以用以下公式︰
不同持份者>針對甚麼情況>呢個持份者(特定角色)做到乜>具體例子>呢個例子如何可行及有成效地處理呢個問題

持份者衝突
1. 一定要一組一組黎解釋，如持份者A及持份者B在某個層面之間矛盾
常用衝突為︰利益、價值觀、期望、方式等

論證立場/評估/比較
1. 只要見到「應否」 / 「是否同意」/「多大程度上同意」，
2. 必先「表明立場」，然後再建立「三正一反」論點
3. 「反」即係常講嘅駁論，駁論分成兩個部分，提出及解釋對方觀點，然後再加以反駁。但注意︰不要為求容易反駁而亂舉一個對方論點。

評估 / 比較題 同論證立場嘅分別係，一定要有「準則/平台/標準」，例如︰可行性/成效/可動用資源/即時性等
如果建立唔同適當準則，12分入面就會最高只有「4 – 6分」，咁就好難係卷二拎到14/20以上了……

2021年的文憑試卷無好多特別的地方，畢竟通識科都即將終結，考試都唔會有好多新嘅意念。考試要求大致同早幾屆一樣，只有一個地方值得提一提，
***2021年卷一3b***
參考所提供的資料及就你所知，指出及解釋香港發展電子競技產業的一項優勢及一項困難。（8分）
呢題雖然只係一題普通的論證資料題目，亦類似以往的「利用所提供的資料，說明一個支持及一個反對這項聲稱的論據。」
但考評局提左一個新方向，證明去年好多人錯。就係唔好建立「優勢」同「困難」同矛盾的兩個論點。
「如優勢係有XＸ，而困難就係XＸ要改善。」咁樣同樣犯左自相矛盾的問題。

四、作答方式
係人都知寫得多有著數，因為呢科係加分制。
但時間有限，點樣係有限時間，寫到最直接得分嘅位先係最實際。消化完上面堆內容，要如何有系統地以文字表達自己心中所想？

好多同學仔讀左三年都唔知學左乜，但呢科係想大家「學識用文字邏輯地演繹／說明」，比如話點解要學詮釋數據，其實係想同學識整理資料，雖然大家好公式地睇「縱向」、「橫向」、整體描述，引用數字、計算變化、比較兩項轉變差異等，以至到點解要做IES，其實上到大學d social sciences 學research methods都係有同樣要求。

講返考試
卷一 有8個分題，係abc、abc、ab，如2021年448、468、58咁。
用120分鐘計算，每份卷一大約總分係45至48分。即大約2分半鐘要拎1分。咁1個4分題，就大約用10分鐘，如此類推。

係時間分配黎講，當卷一其中一題超過50分鐘，就一定要開下一題黎做。因為係 part c寫多兩句，唔會高分過開個part a求其寫兩句高分。（* part a一定係最易最快拎分。）

用level 4 52%+、level 5 61%+、level 5** 70%計算，
假如你卷一因為時間不足而放棄一個分題，基本上係極容易跌grade。所以在實際考試時，掌握時間先係一切。上面講過嘅技巧做唔到就算

五、past paper有乜用
唔計練習卷，通識科分別有30題卷一、30題卷二俾大家練習，亦教識大家點揀卷二。

雖則考來考去係恆常議題，但又真的好難估中佢出邊件事件。相對而言，題型就不斷地重複。

題型重複出現，對勤力嘅考生係一大獎勵。
例如︰2018年卷二3b就考到「……妨礙而非促進……」，當年係一個新嘅提問字，要求考生就該議題建立準則來判斷妨礙多定係促進多，唔少考生無建立準則，就嚴重失分了。上面講過，無俾準則只會得返「4-6分」

到2019年卷二3b就再一次考「……妨礙而非促進……」，假如你係2019年考生，溫過2018年的考評要求，係答呢題嘅時候就更得心應手。


睇返考評報告分析，呢題無論選答比例／分數，都比另外兩題高。

當然題目議題都會影響同學選題，但更重要係，你要學識唔好揀中最難果題。落筆之前草擬下係咪夠pts之外，仲可以睇下︰

1. 題型
近年卷二都係8+12組合，8分通常係因素、影響、挑戰果類、12分係論證立場、評估、比較
講明題型係通常，如果一有例外，如「可如何……方式」，就要注意了。

例如︰「全球化……可如何……方式」問過2次，屬於翻炒類，同學按情境，換下例子照背就幾高分。

2. 議題
考5**，唔代表識唒所有議題。盡量揀返d貼近自己生活(每個同學都唔一樣)，咁你邊答邊寫例子就好容易了。

以2020年卷二為例
三題的選答百分比相對接近，為30%、32%和38%，而平均分亦無之前咁極端。咁係因為2020年卷二三題題目的題型接近，三題難度相約。

因此，當題型分唔到差異時，就按以上嘅第二條件揀題目，即係「議題」，揀題自己最熟的去做好了。


六、日常溫習
上面講完讀嘅原則，以下就動手讀啦。
當你真係睇返課程範圍之後，其實係可以慢慢做本屬於自己嘅筆記，實際過你去補習社買堆notes。

平日老師播《鏗鏘集》、《星期x檔案》、《經緯線》、《視點31》等等時事專輯(好似無唒)，其實係幫你地累積基礎知識。咁點做先？係揀定屬於課程範圍嘅影片、剪報之後，同學不妨將睇到嘅內容，分成以下類別︰

議題名稱及所屬單元︰
事件發生日期︰
議題背景︰(試下寫d數據)
起因︰
影響︰(正面/負面)各1
不同持份者有何爭議︰
解決方法︰

通常影片/報章入面總有d專家出黎講下有咩解決方法，你寫低完佢之後，不妨再諗下……是否同意「該方法」

當你習慣定期咁樣整理日常遇到嘅知識，你嘅筆記仲豐富過補習買返黎嘅嘢。同時，由於係你自己整理出黎，通常好快好易讀入腦。而以上所整理嘅流程，就正正係試卷出題嘅模式啦

最後呢十日，得閒就自己反覆咁溫啦。當你不斷列出唔同議題，就會知自己讀漏邊度，邊個位唔夠例子，然後再自行補充。

祝大家考試成功，唔好再見。

可惜下年通識收皮

垃圾科

反正香港都走哂樣，通識科仲保持到原貌先奇怪

下年先得閑去考，最後一屆

評估比較題
「要定立準則」即係咩意思
係咪講完立埸之後寫即時性/有效性 而言xxxxxx
呢啲去答

推呀 好有心

係呀 即係你用咗邊方面作對比

Thanks

如果早兩年睇到呢個post就好

過左就向前看

2023Dser留名

今年自修lm
乜都未開始溫

傻閪通識準備收皮啦
10年5**都救唔到你失業啊

Ｔｈａｎｋｓ
轉左行

依家好多通識老師變咗去教國安

係人都知呢類題目要俾立場，而要建立準則，係基於以下情況︰

例子1︰一般論證立場
「A導致B。」你是否同意這看法？解釋你的答案。

例子2︰比較題
「A1比A2更容易導致B。」你是否同意這看法？解釋你的答案。
「A是導致B的最主要因素。」你是否同意這看法？解釋你的答案。

假如你無建立「準則/標準」，無論你點答都答唔到例子2的題目

舉個實例︰
1. 「收回棕地有效增加房屋供應。」
or
2.「收回棕地是最有效增加房屋供應的方法。」

在2.，如無提出準則，以及其他方法的話，點寫都只係答緊1。
準則︰
可行性、影響範圍(成效by case改變)、可動用資源 etc.
其他方法︰
改變原有發展土地用途、填海 etc

評估題理解一樣
評估A對B造成的影響。<--要求證明正面還是負面多
評估A對B的成效。<--要求證明成效大還是成效小
如沒有準則，就無法證明了

2022dser
學校mock predict 4，但都想問下一個level4嘅考生比strong3考生嘅優勝之處，level4贏在邊到？係咪主要都係時間管理？因為52%嘅話只要唔離題都好易攞到題目一半分數，係咪代表大部分stronglv3考生比lv4遜色嘅主因係time management？其實兩邊嘅內容差唔多，但跌落lv3嘅主因係做得唔夠快，導致損失咗半題至一題嘅分數？

有趣的問題。其實，每個grade都係差幾分。


一般同學問，我都會答係時間問題，可以參考下圖︰


Case 1兩個學生基本所有分題分數一樣，但只要Miss 最後果題就立即跌grade。由於我唔會真係幫你改卷，所以，一般係網上教，我都會強調真係唔好做少任何一題。

Case 2 會係另一類情況，Predict 4 的考生叫做拎51~52%+
係通識考卷的情況叫做到「論點、論據、基本說明」，但只做到一半。
例1︰Predict 4的可能知份卷要做乜，例如見到題題目要比較，同第一題會做得完整少少；
例2︰叫你寫兩個論點，但你第2個論點是重複第1個；
例3︰你想寫兩個，但你真的寫唔出，但你有可能搏到2個，結果你果下爬升了；
例4︰你上唔到level 5 ，基於你數據題拎唔齊4分，3個分題就無左3分= 不會高於29分。

一般黎講，Predict 3,4的同學能力係有限制，無可能叫你模仿到5**的Sample。如唔係向上求，就係要防止向下流，即係拎個4幫你砌夠分入U。除左時間管理，最直接就係唔好重複論點，同小心引用資料，再是但說明就好了。