我嚟咗英國都差唔多一年，因為其他家人嘅BNO visa 遲過我批，所以遲幾個月先到。
其中一個家庭成員，講吓少少背景：
男人，40頭，唔飲酒
喺香港有個女朋友
學歷唔高，英文程度好低，基本上只係識26個英文字母同少量生字，喺英國90%溝唔到女
到步到依家都有半年，頭一個月都還好，好喇，一個月之後就開始時不時話好悶呀、好撚悶呀、英國真係痴撚線、住呢度啲人都係等死⋯⋯之類，平時揸車、喺客廳同我咁講都算，試過我喺間房執緊嘢無端端開房門申個頭入嚟同我講：好～撚～悶～呀～
我唔係冇試過幫助佢解決問題，有同佢講不如試吓搵工，但佢又成日用溝通唔到做藉口，我知佢唔係唔想返工，而係喺一個陌生環境變咗做一隻淆底獸。
搵唔到工的話唔緊要，我又有同佢講：不如搵吓自己嘅興趣啦，睇吓啲YouTube 片學吓新嘢，煮嘢食/整吓音樂/學英文乜都好啦，佢都好似意見接受態度照舊咁
佢話自己英文唔好，OKAY! 咁咪學囉，學外語首先就緊係學粗口罵吓人先㗎啦，我借咗本以前買落嘅吵架英語俾佢，有廣英對照，本書都好鬼多例子又易明，我諗佢可能揭咗幾頁就冇睇，但仲未還返俾我。其他家人都有教佢英文補習吓咁，佢又嫌冇乜用好似冇咗下文⋯⋯
今個月已經好咗少少，早排見過一次工，好似等緊開工，同埋好彩有拎埋部PS4過嚟，買咗幾隻game俾佢，都玩咗一段時間，但依然會無端端開房門申個頭入嚟同我講：好～撚～悶～呀～
好～撚～悶～呀～ 都算，佢有同我講過嚟到英國之後好唔開心，好似唔係為咗乜嚟英國咁
話當初講到有幾擔心共產黨、香港已經唔再係香港，但嚟咗呢度都係好辛苦，但依家又洗濕咗個頭，呢邊要重新開始，返香港又係要重新開始。當初選擇過嚟係覺得避開共產黨嚟英國，有犧牲係值得，但到咗呢邊，同香港差太遠，就開始懷疑係咪真係值得，仲要冇得屌閪。佢話終於知道點解咁多人移民會有抑鬱
（佢甚至想香港快啲折墮，令佢個心好過啲，大家勿屌）
其實間唔中都會同家人出去行下，或者揸車去另一個城市玩，但都係改變唔到佢嘅諗法。想帶佢出去飲返杯但佢又唔飲酒。其他家人包括我都冇話好悶，我又唔想佢一直咁落去，唉
