【動畫●安老按揭】抵押$365萬粉嶺居屋 兩公婆月袋年金$8,000！
「退休後無入息，份退休金越搣個心就越寒，又唔知自己幾時香！」年輕人總是憧憬退休生活，年屆69歲的沈生雖有「磚頭」在手，但退休後缺乏每月現金流，「個心唔定」卻是最現實的退休寫照。
沈生於內地打工廿多年，太太50歲時已退休照顧家庭。膝下兩兒早已成家立室，但他多年來作為家庭經濟支柱，坦言不慣退休後「攤大手板問個仔拎錢」。
「咁多年習慣我搵錢返黎養佢，到我咁既年紀仲要成日伸手同個仔拎？唔慣！」退休後眼見儲落的老本始終有限，沈生早前便決定將其粉嶺居屋單位承造20年安老按揭，以磚頭換取流動資金。
沈生單位實用面積逾500呎，未補地價估值達365萬，以年紀較輕、現年62歲的沈太計算年金，未來20年兩老每月合共可獲「出糧」逾8,000元。計畫結束雖再無糧出，但單位不會被收回，直到兩老均已終老，屆時後人可優先向銀行贖回單位，一般有6至9個月時間完成贖樓程序；若決定不贖，則會交由銀行出售物業。
「退休金擺20年唔知會點，始終會搣曬，但依家每月有糧出，20年後先動用筆退休金，個心定好多。」沈生坦言，退休時其實沒有想過承造安老按揭，「本來諗住辛苦D去麥當勞做下替工、揸份的士」，但後來得悉有此計畫，便和兩兒商量。
「個仔話，錢係你搵、間屋係你買，你咪拎去做按揭，唔使擔心班後生。」沈生指，現時每月8,000元也足夠應付日常消費、燈油火蠟，太太閒時又可到社區中心學跳舞。「我個個月睇住8000蚊使，覺得係幾足夠，可以懶D留係屋企唔洗兼職，儲到錢又可以去旅行，唔使咁辛勞。」沈太亦禁不住透露：「9月就可以去澳洲玩，使我自己錢，返黎又有糧出。」
不過，上一代普偏傾向把物業留給子女，但何解兩老如此灑脫將物業按給銀行？「老實講，留唔留係睇個仔本唔本事，按俾銀行之後都可以贖嘛！咪睇佢兩個邊個有本事。」沈生續說：「我唔望個仔養我，佢又唔望我養佢，點養得起？依家我自己錢自己使，個仔又唔志在我留返呢一筆錢，宜家唔興架啦。」沈太亦指，子女家用始終有限，「你見到樣樣都貴，其實依家我地都減低班後生壓力，唔使佢地成日問我有無錢交電費」。
記者：陳洛嘉
http://hkm.appledaily.com/detail.php?guid=56870953&category_guid=7015342&category=instant&issue=20170625
