https://hk.news.yahoo.com/%E6%98%9F%E5%85%89%E8%B7%AF%E4%B8%8A%E2%94%82%E6%88%B4%E8%80%80%E6%98%8E%E6%9B%BE%E6%9A%97%E6%88%80%E4%BD%98%E8%A9%A9%E6%9B%BC-%E5%80%9F%E9%86%89%E7%9F%AD%E8%A8%8A%E7%A4%BA%E6%84%9B%EF%BC%9A%E8%AC%9B%E5%87%BA%E5%9A%9F%E6%9C%89%E4%BA%94%E5%8D%81%E4%BA%94%E5%8D%81%E6%A9%9F%E6%9C%83-052015675.html
48歲嘅無綫綠葉王戴耀明近日亮相訪談節目《星光路上》，被主持人重提當年暗戀佘詩曼一事。據知當年二人因為拍攝劇集《金枝慾孽》而認識，喺劇中飾演小禮子嘅戴耀明曾經接受訪問時自爆：「我經常同阿佘講，我賺到錢會娶你做老婆。」，又試過借醉向佘詩曼示愛，傳短訊同佢講：「我好掛住你。」
被問及當年有否追求佘詩曼，佢喺《星光路上》坦言行動上係無，對於當年講出要娶佢一事依然印象深刻，話呢啲都係唔負責任嘅說話。不過，佢就毫不掩飾大讚佘詩曼：「阿佘係正，她係一個好正的女人，我相信好多人跟我一樣，有娶她的想法。說出來（表白）就有五十五十機會，不開聲的話永遠都是零。」，以表達佢對佘詩曼嘅欣賞同愛慕之情。
已單身兩、三年嘅戴耀明曾經接受媒體訪問講過，自己係一個好怕寂寞嘅人，平時多數陪伴媽媽，只有閒時先會同朋友去酒吧消遣，但係諗到將來總有一日會面對生離死別，得返自己一個人會好寂寞，都會渴望愛情出現。
戴耀明曾經試過用自己真相玩交友app，雖然藝人身份對識朋友有幫助，但總有人唔信係佢真人，所以都無咩收穫；至於夜店識嘅女仔，佢就話對方係享受傾偈，但未必會受溝：「好老實講，我40幾歲，依家出嚟浦20幾歲，有啲甚至乎我做得佢阿爸。」可見年齡對戴耀明嚟講係一大阻礙，希望組織家庭嘅佢就話依家有新方向，想唔用正途去結婚生仔：「想嗱嗱聲同女仔上完床有BB，然後即刻馬上結婚係最快。我又唔會話做犯法事，但盡量希望識到個女仔可以盡快結婚。無辦法，我唔係28歲，我已經係48歲啦，當個小朋友12歲我都已經60歲，我依家努力緊呢方面。」
慘豬
