《製造聖經》：一個復活，各自表述

（按：因為依家係復活節，所以標題改咗一改）

引子
我哋成日話聖誕，但又有無諗過耶穌自娘胎出世之前，到底存唔存在呢？到底聖誕節係慶祝梗耶穌出現，定係耶穌一直存在，慶祝佢道化肉身呢？今集要講嘅書《製造聖經》就係想解答一系列關於新約嘅問題。顧名思義，《製造聖經》仲想搵出聖經係咪製造出嚟，而如果係製造出嚟，製造過程係點呢？

呢本書嘅作者係巴特‧葉爾曼，佢所採用嘅方法係歷史批判法，佢接受過專業嘅神學院訓練，喺導讀當中，台灣神學院副教授邱凱莉補充，所謂嘅歷史批判法係一系列嘅方法論，用嚟檢視聖經文本嘅起源，同埋同其他同時代文本嘅關係，形成一種批判性嘅閱讀聖經方式，務求盡量接近原意，人話少少講，即係睇埋聖經作者嘅語境。

我哋今集會講講：

1. 馬太福音同路加福音講耶穌出世嘅唔同

2. 馬太福音同路加福音點講耶穌之死

3. 馬可福音有天啟末日嘅背景，同約翰福音有喺神學意義上嘅唔同

我無跟足作者嘅引述，而係睇完《製造聖經》，再嘗試模仿作者思維去自己睇返聖經，希望仍然能夠呈現到一個合理論述俾你。聽完呢一集，希望你有更多嘅角度去閱讀聖經。

【牛哥講經】呢一個系列主要會介紹我認為幾有趣／值得睇嘅書，我希望我可以用簡單嘅文字去將一本本書去做個總結，唔單止可以做到簡介書籍，仲係將作者嘅背景、推論嘅前題補充，同埋將作者推論加強，然後思考當中嘅合理性。文章可能會以第一身去寫，務求令我自己更代入到作者之中。如果係歷史故事，就當然會維持第三身角度去寫。如果寫得可以，功當然在作者；寫得唔好，固然責任在我。簡單嚟講係一個逼害自己嘅計劃，希望可以堅持落去。

內容已登錄各大podcast 平台
Apple:
https://podcasts.apple.com/hk/podcast/%E7%89%9B%E5%93%A5%E8%AC%9B%E7%B6%93/id1572447901?i=1000528460751

Spotify:
https://open.spotify.com/episode/13Ce5QChdFKCQk9YnAIGHR?si=17kRsR3SREKWlthUHNdpMg&dl_branch=1

kkbox:
https://podcast.kkbox.com/episode/D-r1n155Z1lOi-VH7I

ig@cowgortalk
閱讀其他文章：cowgortalk.wordpress.com

歷史批判法
今集我就會講下呢一種歷史批判法會點理解新約嘅四福音書，至於依家公認嘅新約到底點樣構成、初期教會有啲咩唔同流派、猶太教同基督教點睇彌賽亞嘅唔同令兩個教調和唔到、三位一體係點嚟，⋯⋯呢啲等等嘅內容都要等到下一次再講製造聖經時再講，不過好可能唔係下一集，因為我覺得我要更多時間先總結得好。但我仍然相信今集會係有趣，你會喺依家基督教正典當中，睇出耶穌嘅唔同面向，同理解福音書嘅新方法。

隨着文物嘅發掘同研究，其實喺學院之中已經對聖經有好多唔同嘅重要理解，當中有唔少甚至可以話係非常創新，但係呢啲神學院嘅創新並冇落入到去我哋嘅日常之中，製造聖經呢一本書就係想為我哋去顯示到底學術界點樣去睇聖經呢一樣嘢。

所以佢同坊間嘅教會唔同，我認知上嘅教會往往會同我哋講聖經都是神所默示的，所以所有嘅說話都係合理，呢種聖經無謬論其實好難站得住腳，以我個人嘅經歷嚟講，我曾經遇過一個講道嘅人，佢係教科學，當佢講道嘅時候，佢講到呢個宇宙只有幾千年嘅歷史、地質學嘅計算錯誤、恐龍啱啱滅絕⋯⋯我當時唔明白點解佢要做呢一啲嘅解釋，去違背科學嘅主流。

但當我而家再回想起嘅時候，其實佢只係將自己虔誠嘅信仰放喺相信聖經係冇一隻字有錯誤、而聖經咁講，就要理解當中嘅道理，聖經唔會錯，聖經話神用咗六日去創造世界，咁樣，就係六日。但係呢一種思想係好危險，因為唔單止會令到講道嘅人去表面理解聖經，更加會令到講道嘅人擁有一種教條嘅思想，唔容許其他（客觀）證據嘅反駁。正如邱凱莉所講，我哋必須要問嘅問題係，點解地方教會嘅宗教教育，講道嘅人通常都唔會介紹歷史批判法？點解地方教會嘅查經同神學院嘅聖經課程出現斷裂？最重要嘅係，如果教會、查經班唔容許獨立自由思考同批判質疑嘅空間嚟塑造信仰嘅深度，咁宗教教育同洗腦教育究竟有咩唔同？唔容許別人質疑，往往有兩個原因，一係認為提出疑問嘅人無資格問問題，一係對自己所相信嘅嘢信心不足。

喺呢度引述一下推薦序嘅一段說話：

「我不擔心葉爾曼的論述會絆倒讀者，葉爾曼不是歷來唯一提出問題質疑聖經的人，世界頂尖的聖經學者也沒有因為研究和思考而變為不信。我反倒擔心缺乏或不願意思考的教牧信徒，對信仰的誤解和扭曲帶來的災難和禍害。」

我哋往往會將信仰同理性分開，但我覺得無錯理性有時處理唔到宗教最深層嘅嘢，只係唔代表要全然放棄理性，我哋可以想像一個世界係基督教所信嘅真係真，但係基督教只出現喺世界嘅一個角落，當人聽到形形色色唔同嘅基督教以外嘅宗教，如果單靠信仰，咁就好可能會信錯宗教，只有理性有機會可以令人檢視出假嘅宗教，而我亦相信，一個宗教如果經歷理性嘅洗練，先會造就人更完整嘅信仰。我會話，理性唔係宗教信仰嘅充分條件，但係係必要條件。

當我哋去留意一下教會教到我哋嘅聖經知識嘅時候，就會留意到教會教導我哋嘅知識係關於(about)(knowledge about bible)聖經嘅知識，而唔係聖經當中嘅知識（knowledge in the bible)，所謂關於聖經嘅知識係講緊聖經話俾我知上帝係乜嘢、基督係乜嘢、教會係乜嘢、我同世界嘅關係係乜嘢、應該做啲乜。

但歷史批判法（historical-critical method）唔係咁，呢種方法源自十七世紀，作者擅長嘅「經文鑑別學」（textual criticism）就係當中嘅變體，呢種方法着重於聖經嘅歷史問題，即係喺文本當中就住佢原有嘅歷史情景去思考聖經嘅意思，所以會透過對比幾千種唔同嘅抄本(我哋依家睇嘅係一代又一代修士嘅抄本)，重新檢查一啲歷史問題，例如聖經嘅真正作者係邊個？例如提摩太後書事實上係咪保羅所寫，創世紀係咪摩西寫？作者係咩情景之下寫作？作者想主張啲乜嘢？作者有無者被當時嘅文化同歷史預設影響？作者用咗咩嘅資料來源？而聖經經過咁多代人嘅抄寫，當中嘅字詞有無被修改？有修改嘅話，從幾時開始修改？

當我哋去重新審視呢啲問題嘅時候，就會發現有陣時我哋會將現代嘅諗法覆蓋咗當時嘅語境，從而扭曲左佢嘅原意。我諗歷史批判法同一般佈道嘅一大唔同係，當一般佈道係一種聽眾嘅單向吸收，即係牧師/講者講一個道理，聽眾去聽。但歷史批判法係雙向，運用歷史批判法嘅人藉由試圖批判聖經，即係要從聖經之中獲得一啲資訊，再用自己嘅知識同理解去審視資訊，若然審視之後，發現聖經所表達嘅資訊係真，咁信仰咪更加豐盛；若然審視之後，發現聖經所表達嘅資訊係假/矛盾，咁咪一齊諗下作者喺嗰個語境想表達咩意思。

所以，就算最後發現聖經喺記載上有矛盾，其實唔必然會導致人唔相信基督教，作為後人嘅我哋，只需要睇下咁樣嘅記載方式係有啲咩含義，咁仍然可以對人嘅靈性修養有幫助。我諗，雖然呢本書嘅書名好似用嚟吸引非基督徒，但其實最應該、最需要睇嘅，係基督徒自己，如果可以經歷完呢一本帶住疑問嘅書，再好好以自己嘅回應回答作者，咁我諗，呢個基督徒會係一個認真嘅基督徒。呢份，就係牛某帶俾各位基督徒/非基督徒嘅聖誕禮物。

喺開始前提提你，如果你想買呢本書嚟睇，我要警告一下你，呢本書寫得比較學術，即係寫得比較難同悶，但我希望我唔會講得悶。內容依家，正式開始。

馬太福音 第二十七章
這時候，賣耶穌的猶大看見耶穌已經定了罪，就後悔，把那三十塊錢拿回來給祭司長和長老

最好嘅復活節禮田

Gchi牛哥

牛哥復活

lm

多謝咁多位巴打支持
得閒可以幫手推下post
我p牌推唔到

正文
喺一開始嘅時候，我先問大家一個問題，相信大家都知道耶穌喺伯利恆出世，但你又記唔記得邊個喺耶穌出生時去探耶穌? 俾少少時間你去諗。










我估大部分人都會記得東方三博士，但有可能唔記得牧羊人，而如果你記得東方三博士同牧羊人，咁我問你，係東方三博士定牧羊人探啱啱出生嘅耶穌先？

各位係咪個腦hang 晒機呢？三博士？牧羊人？俾多三秒時間你。好，你腦海嘅答案係咩？三博士定牧羊人？但我知你都錯，因為根本無人知三博士先定牧羊人先。因為記錄三博士嘅，係馬太福音；記錄牧羊人嘅，係路加福音。而馬太福音無記錄牧羊人，路加福音無記錄三博士，咁我哋又點可能判斷到牧羊人定三博士先呢？

呢一個係一個小例子，去顯示新約福音書之中，記載嘅事蹟唔同，但我哋一直唔察覺，因為我哋一直聽嘅故事，往往係瀨尿牛丸版，就好似我哋好少發覺馬太福音只講三博士而無講牧羊人，我哋平日聽聞嘅故事，好可能就係耶穌出生，然後有三博士同牧羊人去探耶穌，混合咗馬太福音同路加福音嘅記載。點解我哋平時無發覺？葉爾曼認為係因為我哋平時讀聖經嘅時候，係用垂直閱讀，即係睇梗馬太福音，就睇完馬太福音先再去睇其他福音書，好少會睇睇下馬太福音講耶穌出生時去對比一下路加福音講耶穌出生，當垂直閱讀完馬太福音同路加福音，我哋就自動將馬太福音同路加福音對耶穌出生嘅記載瀨尿牛丸。而睇睇下馬太福音講耶穌出生時去對比一下路加福音講耶穌出生，就係水平閱讀，當我哋水平閱讀聖經，就會發現對同一件事，有好多記載上嘅唔同，呢個，亦係歷史批判法好重要嘅第一步。

我哋要問嘅一個問題係，如果係確實嘅事實，點解有啲福音書有記，有啲福音書無記呢？

呢個時候堅持聖經無謬嘅人就會企出嚟話，咁係因為唔同福音書作者側重點唔同，我哋就要將唔同福音書瀨尿牛丸先可以理解個full picture，用佢哋嘅術語，係調和。但有時係調和唔到。

耶穌出世
我哋一齊睇下馬太福音同路加福音點講耶穌出世。

馬太福音係講希律王想殺猶太人未來嘅王，派博士其實係想搵耶穌出嚟殺咗耶穌，點知博士出蠱惑，搵到耶穌但唔通報，希律王就想藉住殺晒地區嘅bb，所以約瑟一家就走去埃及。

「2:13他們去後、有主的使者向約瑟夢中顯現、說、起來、帶著小孩子同他母親、逃往埃及、住在那裏、等我吩咐你．因為希律必尋找小孩子要除滅他。
2:22 只因聽見亞基老接著他父親希律作了猶太王、就怕往那裏去．又在夢中被主指示、便往加利利境內去了。
2:23 到了一座城、名叫拿撒勒、就住在那裏．這是要應驗先知所說、他將稱為拿撒勒人的話了。」

所以耶穌一家人先走去埃及，再去返拿撒勒。

路加福音就無提到希律王，而提到居里扭做咗一次人口普查，所以約瑟喺馬利亞大肚嘅時候，先由拿撒勒返到自己作為大衛家族嘅故鄉，伯利恆。

「2:1 當那些日子、該撒亞古士督有旨意下來、叫天下人民都報名上冊。
2:2 這是居里扭作敘利亞巡撫的時候、頭一次行報名上冊的事。
2:3 眾人各歸各城、報名上冊。
2:4 約瑟也從加利利的拿撒勒城上猶太去、到了大衛的城、名叫伯利恆、因他本是大衛一族一家的人．
2:22 按摩西律法滿了潔淨的日子、他們帶著孩子上耶路撒冷去、要把他獻與主。
2:39 約瑟和馬利亞、照主的律法、辦完了一切的事、就回加利利、到自己的城拿撒勒去了。」

生完耶穌之後，一家人就返去拿撒勒，無提過去埃及逃難。

兩者共通之處在於兩者都承認耶穌喺伯利恆出身，最後都去咗拿撒勒，但點由伯利恆去拿撒勒，就有幾近矛盾嘅論述。作者搵晒當時嘅歷史紀錄，都睇唔到殺嬰或者人口普查嘅紀錄。試想像殺晒一個地區嘅bb，同埋叫晒成個地區嘅人返去一千年前祖先嘅居住地（大衛喺約瑟之前一千年嘅人），呢啲咁大型嘅行動點解會無歷史紀錄呢?就算殺嬰或人口普查其中一件事真係有發生但其實幾近無可能兩件事都有發生。要調和馬太福音同路加福音，就會得到一個又有三博士又有牧羊人，又有希律王殺嬰搞到要走去埃及又有人口普查而耶穌一家慢慢咁去耶路撒冷潔淨，呢粒瀨尿牛丸，好似太過彈牙。

另外，作者亦考證到居里扭做巡撫係希律王退位十年之後，試問又點可以both 呢？

[再舉兩個例子。
當耶穌死後三日，一班婦女去用膏抹耶穌，福音書都記載見到人，馬太福音話見到一個天使，馬可福音話見到一個男人，路加福音話見到兩個天使。調和派就會話記載見到一個嘅福音書無否定到第二個天使嘅存在。

約翰福音有時嘅記載有斷裂。喺2:11，當耶穌行咗水變酒嘅神蹟之後，約翰福音話：「這是耶穌所行的頭一件神蹟。」之後2:23：「當耶穌在耶路撒冷過逾越節的時候、有許多人看見他所行的神蹟、就信了他的名。」但喺醫好一個大臣嘅仔之後，4:45「這是耶穌行的第二件神蹟」(和合本有「在加利利」，話係耶穌喺加利利行嘅第二件神蹟，但葉爾曼用嘅版本/NRSV係無)。

「離別談話」
再睇耶穌嘅「離別談話」，明明門徒有問耶穌去邊，但耶穌責怪門徒唔問，呢個好可能係因為約翰福音收錄唔同版本時候嘅出錯。

13:36 西門彼得問耶穌說、主往那裏去。耶穌回答說、我所去的地方、你現在不能跟我去．後來卻要跟我去。

14:5 多馬對他說、主阿、我們不知道你往那裏去、怎麼知道那條路呢。

vs

16:5 現今我往差我來的父那裏去．你們中間並沒有人問我、你往那裏去．]

呢一啲矛盾，只要係讀過神學院嘅人其實都一定會知道，作者就有個疑問，呢啲神學院嘅老生常談，點解普羅大眾唔知道？所以佢先要寫呢一本書，但係佢寫呢本書又唔係想一啲唔信嘅人就拎住呢一本書嚟做一個唔信嘅憑據，而係想讀者有一個質疑嘅開始，開始思考。有問題嘅提出，先有可能有答案嘅解答。
「我仍然認為聖經承載着上帝對祂的子民的重要教訓，但它同時也是一本充滿人為觀點和錯誤的書籍。」

雖然葉爾曼15年後，唔信耶穌。

我哋嘅問題係，咁點解聖經有咁多唔同嘅記載?葉爾曼有一個好正面嘅答案，因為聖經作者都有唔同語境，佢哋想藉由耶穌嘅行事去講述自已所相信嘅神學，我哋一齊用耶穌之死去作為一個例子。一齊睇下馬太福音同路加福音嘅分別。

高汁post推一推

留名

好似幾得意

push

劉明跟進

多謝你作為一個基督徒嘅回覆，如果有更多基督徒擁有好似你一樣嘅開放嘅心態，我諗呢個世界對於基督徒嘅印象會好好多。

你提到：
「令佢真正放棄信仰嘅，並唔係歷史批判、唔係聖經矛盾、唔係聖經歷史真實性問題，令佢真正放棄信仰嘅，係點解神會容許呢個世界有咁多苦難」

我都好有興趣知道你會點諗，可以嘅話請分享一下你點理解神會容許呢個世界有咁多苦難

耶穌之死
馬太vs路加
喺馬太福音，我哋會見到耶穌面對十架，好似少啲講嘢，同有更多嘅情感。
只記載強盜譏笑耶穌

27:44 那和他同釘的強盜、也是這樣的譏誚他。
對耶穌嚟講，上帝係離棄自己。
27:46 約在申初、耶穌大聲喊著說、以利、以利、拉馬撒巴各大尼．就是說、我的 神、我的 神、為甚麼離棄我。

喺耶穌死後，聖殿嘅幔子裂開。象徵當耶穌死去之後，上帝同猶太人之前嘅約定正式取消，耶穌成為一個新嘅象徵，係上帝同人嘅新連繫，係一種贖罪。

27:50 耶穌又大聲喊叫、氣就斷了。
27:51 忽然殿裏的幔子、從上到下裂為兩半．地也震動．磐石也崩裂．

再睇睇路加福音
講得比較多嘢

23:28耶穌轉身對他們說、耶路撒冷的女子、不要為我哭、當為自己和自己的兒女哭。
23:34 當下耶穌說、父阿、赦免他們．因為他們所作的、他們不曉得。兵丁就拈鬮分他的衣服。
有其中一個強盜悔改信耶穌
23:40那一個就應聲責備他說、你既是一樣受刑的、還不怕 神麼。
23:41 我們是應該的、因我們所受的、與我們所作的相稱．但這個人沒有作過一件不好的事。
23:42 就說、耶穌阿、你得國降臨的時候、求你記念我。
23:43 耶穌對他說、我實在告訴你、今日你要同我在樂園裏了。
喺耶穌死前，聖殿嘅幔子裂開，好似上帝要摧毀猶太人嘅聖殿，而人人都有罪。
23:45 日頭變黑了．殿裏的幔子從當中裂為兩半。

呢個象徵如果睇埋路加嘅第二卷著作《使徒行傳》(2:36-38,3:17-19)，就會感受到耶穌唔係為人贖罪，而係赦免人嘅罪，所以有罪嘅人只能靠耶穌先可以得蒙赦免。
喺路加福音，耶穌明白自己係上帝計劃嘅一部分

23:46耶穌大聲喊著說、父阿、我將我的靈魂交在你手裏．說了這話、氣就斷了。

對比之下，馬太福音有明顯嘅「應驗舊約先知」嘅態度，1:22、2:6、2:18、2:23，{喺馬太福音之下嘅耶穌，睇落有住為咗應驗先知而受苦嘅無奈同被離棄，而路加福音一樣都無提到，耶穌明顯無一絲嘅猶豫同不憤，耶穌係充滿住自信同信心去面對一切無理嘅逼迫。}

有啲歷史批判學者解釋，路加福音係為咗嗰啲遭受到逼迫嘅基督徒所寫，但係佢對於嗰啲因為信仰而受苦嘅人所提供嘅訊息同馬太福音唔同，路加並唔強調上帝喺呢個情景嘅背後動工，而係向基督徒展示一個模型，話俾佢哋知道佢哋都可以好似耶穌咁樣去受苦，耶穌係一個完美嘅殉道者，確信自己無罪而走上死亡嘅道路，知道受苦對峙最對天堂嘅補償係必要嘅，殉道者將會得到來生嘅祝福。路加福音透過情節嘅改動，增加咗上帝計劃嘅明確。

{按：呢度想補充點解話馬太福音好想應驗先知預言，但因為太想應驗而錯解舊約。
馬太福音1:23引用以賽亞書7:14：「必有童女懷孕身子；人要稱他的名為以馬內利。」（以馬內利=神與我們同在）所以馬太福音之所以要比馬可福音多出處女所生嘅講法，就係因為舊約預言，但葉爾曼表示以賽亞書根本唔係預言緊未來嘅彌賽亞，而係一個係以賽亞時代好快會實現嘅事件。出錯原因在於馬太讀到嘅聖經，係希臘文聖經，但係原本嘅聖經係希伯來文alma，而希伯來文alma同處女係兩個字，但被譯為希臘文中嘅處女，所以馬太福音嘅作者就因為希臘文聖經而應驗咗一個錯解嘅預言。而當我哋重睇以賽亞書：

1)彌賽亞根本無出現過喺以賽亞書7章
2)仲記唔記得以賽亞話要叫呢個童女所生嘅係以馬內利？以馬內利喺聖經只出現三次，一次當然就係以賽亞書七章14節，另一次係馬太福音1:23引返以賽亞書七章14節，第三次就係以賽亞書8章8節：
必 沖 入 猶 大 ． 漲 溢 氾 濫 、 直 到 頸 項 ． 以 馬 內 利 阿 、 他 展 開 翅 膀 、 遍 滿 你 的 地 。
以馬內利唔係上帝嘅獨生子，而係上帝帶嚟洪水嘅使者


順便講埋路加福音點講耶穌係處女所生，上帝令馬利亞懷孕=上帝係耶穌父親
「聖靈要臨到你身上，至高者的能力要蔭庇你，因此所要生的聖者必稱為神的兒子。」路加福音一章35節)
路加福音唔講應驗預言，而只係講耶穌由上帝而嚟，就自然係上帝之子，我覺得，比起馬太福音反而更有說服力。}

馬可vs約翰
我哋再比較埋馬可福音同約翰福音。

馬可福音應該係第一本被寫低嘅福音書，大概成書喺公元65-70。開始講之前，我哋講講逾越節嘅背景先。逾越節係講梗當年以危列人被困喺埃及，埃及唔放走以危列人，咁上帝就降下十災，而其中一災係殺晒埃及人嘅長子同頭生嘅牲畜，以色列人就以殺一隻羊，將羊去塗喺門口，作為標記，咁死亡天使見到門口有羊血就會逾越呢個屋企，到最後埃及人終於放走以色列人，上帝叫以色列人要為咗紀念呢件事而食特別嘅筵席，咁就有咗逾越節，呢個就係逾越節嘅由來。喺耶穌嘅時代，全世界嘅猶太人都會去耶路撒冷慶祝逾越節，而逾越節嘅筵席前就要有一日去準備啲羊，作為「預備日」。而喺傳統嘅猶太傳統之中，新一日係由傍晚黃昏開始，所以安息日係星期六，但實際上由星期五晚已經開始，that’s why喺創世紀記載，係「有晚上，有早晨」，而唔係「有早晨，有晚上」。基於呢個傳統，猶太人預備隻羊同準備筵席係晏就，而過幾個鐘天黑之後，就係第日，就係逾越節嘅開始。聽完呢個背景，我哋返去睇馬可福音。

14:12 門徒問去邊準備逾越節筵席 (準備日)
14:22-25 食逾越節嘅筵席
15:25 朝早九點被釘十架
即係馬可福音記載嘅係耶穌喺逾越節當日受死。
(有人話馬可福音15:42有講耶穌喺逾越節嘅前一日死，但其實睇晒成句「到了晚上、因為這是豫備日、就是安息日的前一日」，好明顯唔係指梗逾越節嘅預備日，只係安息日嘅預備日。）

而我哋睇睇約翰福音點講耶穌幾時死。

19:14 那日是豫備逾越節的日子、約有午正。彼拉多對猶太人說、看哪、這是你們的王。

我哋試下由呢一個改動，即係將耶穌改成逾越節之前死，去睇下對耶穌之死有咩意義上嘅添加。逾越節嘅前一日會被獻祭嘅，係羔羊嘅血，而約翰福音係唯一部福音書去講耶穌係神嘅羔羊。

1:29 次日、約翰看見耶穌來到他那裏、就說、看哪、神的羔羊、除去〔或作背負〕世人罪孽的。
1:35 他見耶穌行走、就說、看哪、這是 神的羔羊。

約翰福音18:38，19:6，19:12都有提到連彼拉多都覺得耶穌係無辜(約翰福音最反猶太人)。
要明白耶穌係神嘅羔羊嘅含義，首先，我哋要明白約翰福音嘅特別。

擁有豐富神學理解嘅約翰福音
如果我哋將所有嘅福音書檢視一次，就會發現路加福音同馬太福音都係從耶穌喺伯利恆嘅一個處女所生開始，施洗約翰為耶穌施洗、耶穌到曠野受魔鬼嘅試探、耶穌從曠野返嚟開始傳道，當中行神跡/用比喻向群眾講道，去到故事給一半，耶穌會帶着彼得、雅各同埋約翰到山上面，喺佢哋面前容光煥發咁改變面貌，同天上顯然嘅摩西同以利亞講話、繼續講道、生命最後嘅一個星期到耶路撒冷，潔淨聖殿、食最後晚餐、建立聖餐禮（用麵包比喻自己身體，將酒講成自己嘅血）、十架、復活。

但詭異嘅地方係，約翰福音基本上冇將以上嘅內容囊括，既冇提及耶穌誕生係伯利恆，又冇提及母親係為處女、冇明確睇到佢嘅洗禮、冇講佢係曠野受到魔鬼試探、冇用任何嘅比喻、冇宣揚神嘅國、冇同彼得雅各約翰去山上、冇喺前往耶路撒冷嘅時候潔淨聖殿、佢冇建立聖餐禮，反而為門徒洗腳、係釘十架之前，冇喺猶太人嘅會議前受過任何正式嘅審判。

當我哋去對比四本福音書講耶穌出生嘅時候，就會發現只有馬太福音同路加福音講耶穌係處女所生，馬可福音（最早嘅福音書）一開始就係施洗約翰為耶穌施洗，而馬可福音甚至係大部分早期基督徒所擁有嘅唯一一本福音書，所以早期基督徒唔會知道耶穌嘅神奇、神聖嘅出生經歷。而作為最後成書嘅福音書就十分有趣，無提及處女所生，而係講到：

1.1 太初有道、道與 神同在、道就是 神。

呢度我想問你一個問題，到底耶穌喺為處女所生之前，到底存唔存在?如果你只睇馬可馬太路加福音(只睇最早期嘅馬可福音甚至唔會知道耶穌為處女所生)，你嘅答案好可能係好似未存在。但如果你去睇約翰福音，你就會好明確知道，原來耶穌喺為處女所生之前，耶穌就先作為神嘅道存在。可以話，約翰福音大幅提升耶穌嘅神學地位。耶穌作為神嘅道存在，非常重要。如果要明白約翰福音呢本最後嘅福音書嘅含義，就必須先用當時嘅時代背景，明白第一本福音書，去了解馬可福音嘅關懷。