下排牙兩隻智慧齒都係打橫生，
一邊無掂神經線，一邊早年照唔知係CT定乜春見到掂晒神經線。
無掂個隻就搵左普通牙醫剝左，另一隻個牙醫唔肯剝，佢叫我去搵專科，甘我由佢唔剝住（因為去搵口腔頷面牙科專科，埋單都要萬萬聲）。
早幾年有個朋友分享，佢有隻打橫生嘅智慧齒惡得濟，放肆地生長，壓L斷埋前面大牙門腳，牙痛痛不欲生。要緊急搵牙醫幫佢剝牙。
最後佢剝牙+杜牙根+補返大牙等等洗左$50000-60000
佢當時（2019）勸我，依家唔痛一係快脆去剝，一係博下菲臘牙科收我做牙醫啲教學病人 。
於是，2019年某日我抽起條筋就凌晨四點出門，搭的士去左排菲臘牙科。
當時去到我排第二個😂排到七點左右，保安就開門叫我地去比錢先，$50。個日填下資料，照埋x 光定CT就叫左我走。又唔講係咪收左我
年頭
之後無左消息兩年後（2021年）我打去問係咪收左我皮啦，個姐姐又話未必係收皮，只可能疫情原因啲cases做慢左，叫我再等下。
又過左大半年（2021年七月左右），收到佢地電話叫我返去見醫生。請左半日假去比醫生睇下啲牙狀況（一樣要收費$50），玩左我一個鐘又叫我返去等電話
終於2022年3月，終於等到菲臘牙科打黎叫我剝牙+照電腦掃描做教學同研究用處，正式confirm收左我做教學病人
早兩日剝完打橫生+掂神經線個邊，上下兩隻智慧齒一齊剝，收費$50
剝之前醫生講晒啲風險，掂神經線個隻有機會手術後面癱，上排個隻智慧齒有機會剝個陣，連埋鼻竇組織一齊剝落，造成鼻竇炎
簽好晒同意書就開波。
全程有塊布遮眼，乜都睇唔到。不過醫生同護士每做一個步驟都會同我講聲嘅。
我feel到醫生係我上下牙肉拮左好多針麻醉，confirm我無晒感覺先開始。
剝下面打橫生個隻應該剝左有一粒鐘，鋸都鋸左幾次，又拉又扯甘。每次以為佢終於鋸完，點知無耐又鋸，驚到我成身震過震蛋
剝上面就相對好快，我諗15分鐘內完成。之後等埋藥再約期覆診拆線就走得。
手術過程中，無傳說中成班學生圍住睇，無cam 錄住，好正常一個醫生兩個護士，完全唔知點解。一係可能剝個個係實習醫生/專科學生，一係疫情原因唔安排學生到場
下星期覆診拆線，再約下次剝埋另外一邊最後一隻智慧齒
整體黎講都算平（計埋的士錢，三次診金，請假扣糧等等），點計都平過搵專科醫生剝。不過係等好耐好耐，好彩呢三年我剩返個三隻智慧齒都算乖
希望下個月有電話。。。