見呢排腦場咁多水魚，我決定出一個新手詳細攻略！

大鋼：
前言
常見q&a
各件選購
總結

一般講砌機價都係講主機，唔包括周邊設備，嗰啲另外自睇。
事先聲明，以下攻略唔會推薦任何牌子及型號，但會輕輕帶過唔同需求要乜類型件。
利申我自己一個幾月前都係砌機新手，由零開始，對件冇認知，為咗唔想做水魚決定做功課，如果你嫌麻煩唔去查，怕醜唔肯問朋友(唔係問sales)，或者你唔介意喺腦場做善事，你睇到呢度可以出返去，去到被人劏係應該嘅。
以下會用硬件基本名稱同術語，睇唔明自己查。

揀件唔好淨係揀一隻首選件同一間鋪，一間鋪未必有齊你心水，亦未必最抵，你冇備選，到時可能就水你，就唔算良心店唔水你，都要知邊啲件係伏。

砌機比廠機有咩好處壞處？
揀件換件彈性好多，但需要識件，保養會麻煩過廠機。

砌機要睇咩方面？
需求、兼容性、性能、功耗、價錢、安全性。
確保件之間互相兼容，同埋要平衡，例如唔可以頂級cpu配丐板，只會浪費或過高負荷。
功耗愈低通常廢熱愈少，性能穩定性同硬件耐用性會愈好。
睇完仲係唔熟件最好揀大品牌口啤好嘅店，要睇埋心水件有冇出過事。

砌機咩價好？
一般講砌機價都係講主機，唔包括周邊設備，嗰啲另外自睇。
唔建議太低價，因為可以做到嘅嘢好基本，太高價會低性價比，最緊要睇自己需求同budget。我個人覺得6000至15000係最高性價比，一分錢一分貨，十分錢八分貨，半分錢垃圾貨。

有新買新？
唔一定，要比較各方面差幾遠，有新買新係通常嘅做法，今兩代比我會揀最新。可以肯定嘅係被淘汰時間會更耐。


cpu：
宜家有intel同amd兩間廠，唔好問個邊間好，宜家係唔代表將來都係自己查。
命名方式係：牌子 級別 代 數字 字母(特殊版本)
intel有i3 i5 i7 i9，amd就r3 r5 r7 r9，通常寫Ryzen，數字愈大愈高級。
以intel i9 12900k為例，12係第12代，k代表可超頻，如果係f代表無內顯，amd例子 r9 5950x，同樣規則，但唔係第59代，熟手買嗰陣通常直接講型號唔講牌子同級別。如唔同牌子出現相同字母尾未必意思一樣。其他字母自己查。

主機板，又稱主板/底板/老母板：
體積有四種規格：E-ATX > ATX > m-ATX > itx，以中間兩者為常見，愈大塊愈多擴充槽同i/o。
命名：牌子 系列 晶片組 系列 wifi(或無) DDR4或5，唔同系列唔同用料唔同供電性能，同樣唔同字尾唔同意思，例如m尾即係mATX，唔同晶片組都一樣，留意晶片組同cpu係咪兼容，同埋兼唔兼容超頻。

顯示卡，又稱顯卡/display card/GPU：
有分獨顯同CPU內顯，留意bios要調校用邊個，校錯會冇畫面，用獨顯通常將mon直接連GPU，內顯就連主板hdmi或dp(displayport)。
命名：代理牌子 系 型號 Ti或無 版本
GT(GeForce Technology):低階顯示卡會使用嘅前綴代號
GTX(GT eXtreme):中、高階顯示卡會使用的前綴代號，高畫質遊戲。
RTX( Real-time Raytracing 實時光線追蹤):高階顯卡使用的前綴代號，NVIDIA取代GTX的新代號。
Ti=加強版
唔同版本可以代表唔同用料、風扇數等等。宜家新出嘅都係RTX。
打機、睇高規格片嚟講rtx3060建議起跳。

儲存裝置：分為HDD、SATA SSD、NVMe gen3對應PCIe3、NVMe gen4對應PCIe4。舊至新排列，NVMe同PCIe槽新舊兼容但gen4插PCIe3會限制性能。
以500GB 1TB 2TB 4TB常見，建議1至2TB，因為技術同進制差異問題，買返嚟唔會俾足咁多。
有分順序、隨機，讀、寫速度，順序讀寫會喺例如copy成個file用到，隨機讀寫會喺例如執行程式用到，以上四種再有技術細分，詳見google。一般打機我建議高階gen3夠玩，gen4幾乎冇分別。
想慳錢唔上2TB又嫌1TB唔夠想用雙storage嘅，唔建議用太差嘅HDD否則load好慢。
SSD壞咗好難救得返，記得back up。

Ram：
以8GB 16GB 32GB 64GB常見，基本文書8GB，打機16GB，4K高fps打機同需要剪片或其他大型工作就32GB起跳，土豪直上64GB。
速度常見為DDR4 2666 3200 3600MHz，唔建議2666MHz，DDR5可以上到超過4000MHz但我覺得一般用家冇咩必要，同埋貴好多。
16同32GB嘅建議用2x8GB同2x16GB行雙通道會快啲，唔建議2x4GB或4x8GB，為咗方便將來升Ram，兩條夠，64GB行4x16GB冇咩所謂。

cooler，分為風冷同水冷，水冷比較貴同係for高級硬件，價錢亦明顯唔同，會附送散熱膏。
文書建議單塔扇，普通打機建議雙塔扇，重度打機建議水冷。
唔敢講原裝散熱好唔好，個個未必同，同要睇你部電腦做啲乜。

火牛
550W至850W常見，主要視乎你cpu主板gpu級數，愈高級愈高火力。
有唔同牌級，常見為金牌、銅牌，愈高牌級用料愈好，轉換效率愈好，廢熱愈少。同功率金銅唔同型號價錢可以接近，可以差成倍。
高功率火牛可以向下兼容，如果長用for將來升級其他件可以咁買。低功率唔建議配高級件，可能會有穩定性同安全問題。
留意心水型號有冇出過事，火牛係其中一個高危硬件。

機箱
同樣分EATX、ATX、MATX、ITX四種size，大箱可裝細主板，相反唔得。
如果空間同budget充足，建議優先選擇防塵(有隔塵網)散熱兼具嘅ATX機箱，最少$300起跳，ATX係for長遠換件，如果你宜家用細板，你唔肯定將來會唔會用大板，同埋箱內氣量多啲對硬件散熱好啲。


以上係我短時間內喺網上同朋友身上學到嘅嘢，應該適合大部分新手，不過唔敢肯定一定啱你，始終要你自己睇評測同比較，仲有親身去睇，有啲店未必有喺網上宣傳，或者明明冇貨話自己有。

交多幾次學費就識㗎喇

上得連登都做水魚就抵啦
係連登貼無咩意思

呢度講嘅好粗略，最好每種硬件逐樣仔細查

都唔一定嘅，但乜都唔睇就落腦場就一定做水魚

咁又唔係咁講，聽過有人俾sales水佢用舊低階u配高階板同顯示卡，除非係盲追頂嗰啲啦

你不如講下點裝一體水冷風冷,點走綫,
點壞左維修 好嗎

你講度維修就完全唔係新手嘅嘢嚟喇喎

Intel 非12 代不買
Nvidia 非 30xx 不買

風冷唔會壞 得個風扇 水冷壞左你唔會整得翻

今代就係啫，但下半年新一代唔知點

點解冇人買amd cpu

睇你都係懶去睇評測嗰啲水魚嚟

12代太強 但amd b450配3300x 3600已經好經濟實惠

我叫刁民丁比list我算

Amd 5600x 都唔錯，又唔貴，又多平板揀。

tldr ：去法奧搞掂

同級性能就唔差好遠，頂級例外啦，功耗、價錢intel 12代屌打。隔兩代你要平要12代i3好過

隨你鍾意

砌機新手同水冷方面既新手都係新手, 不用分那麼細

啲水魚只識intel，同埋i5i7i9。有啲連第幾代都唔識分