背景：遺傳嘅暗瘡皮膚，塊面勁油，中學時代勁多暗瘡，印面油紙可以印足兩三張，全部半透明。咁依家都仲有少少，但都好返八九成。
心態：
皮膚嘅狀態係會不停咁改變，冇一個方法可以一勞永逸㗎，佢同要身材好一樣都要不停努力的。我以前都會諗我都食咗a酸，點解仲要生暗瘡㗎，不過就算生又點，唔好咁快氣餒，咁就再探索啲啱自己方法，以下會分享啲我覺得有效嘅方法。
方法：
食a酸：
好多人都聽講過呢個方法，我覺得係有效嘅，我大概係10年前中學畢業開始食a酸，太久遠唔記得食左幾耐，可能一年。
食之前同食嘅期間都要驗血，要驗肝酵素有冇問題，同埋懷孕或者備孕嘅人唔食得。
啱啱開頭食會爆多左瘡，都係大家好驚嘅事，但係忍耐多一排就會慢慢唔爆，塊面會一啲油都冇，就算你查啲好潤嘅嘢塊面好快都吸收晒，會諗原來乾性皮膚嘅人係咁幸福！之後就算日日食西多查油喺面都唔太爆瘡。
喺我身上嘅副作用，除咗一開頭會爆多左痘，就係嘴唇極乾，乾到一日要查好多次潤唇膏，一唔查個嘴角會出血。就算10年之後，我塊面已經出返油，個嘴都係比普通人乾，不過當然唔會好似以前咁誇張。
咁食完會唔會翻發，我係有嘅，大概係幾年之後開始會爆翻痘，但冇以前咁多，雖然都唔少，另外始終都過咗青春期，同埋我果時都冇特別用咩辦法去保養，所以生翻都唔出奇。
如果你身體冇乜特別問題，人又年輕但生嚴重暗瘡都可以問醫生了解下呢個方法。如果年紀大啲嘅人就真係要考慮清楚。
食消炎：係醫生處方俾暗瘡皮膚嗰啲，就咁食係冇乜感覺，要配合外塗A酸同抗生素嘅人就會比較有效。
外塗A醇：
呢個係我用緊嘅方法，比起A酸，我感覺上A醇冇咁刺激，查A酸會痕，但A醇就唔會。
對於油皮嘅人真係好推薦，不過都要俾啲耐性，要理解油性皮膚生暗瘡係因為啲皮膚代謝唔切，毛孔塞住好多油脂，結果發炎變成暗瘡，咁佢就係幫你皮膚代謝得快啲，所以查嘅過程會有甩皮同泛紅，有機會會爆多左瘡，大概揸多幾個月就開始唔甩皮，啲暗粒冇晒，同埋好神奇唔會令皮膚乾。壞處係a醇比較貴同要注重防曬，早上唔好塗，我每晚keep住查，用到1%嘅retinol，但慳返好多面膜同護膚品，基本上查左佢就唔駛點用其他嘢，除左防曬果啲基本嘢。
我會推薦比啲油皮多暗粒，唔想食a酸想溫和啲嘅人，想生bb有左都係唔用得，呢個方法真係要俾多啲耐性，可能如果比較多暗瘡可能三個月先睇到，同埋如果係暗瘡油皮膚想keep唔生暗瘡就不妨試吓，同查a酸都差唔多，只係a酸平啲同比較刺激。或者查其他酸類產品都可以。
戒糖：
水果蜜糖果啲天然糖唔計，不過都適量。
但係白糖係皮膚嘅敵人嚟，唔好飲汽水食朱古力餅麵包，佢哋全部都落咗好多精製糖，戒埋加工食品就最好！
偏方：
食益生菌，iHerb 有得買平平地食下無妨
用不含氟化物牙膏，如果下巴成日爆瘡，諗唔到咩原因可能就試吓轉喇
另外廢話，大家都知要做運動多飲水，每日瞓足八個鐘，不過成日做唔到
，但盡力做喇！暗瘡煩惱簡直係對人意志嘅磨練，有時都會好氣餒，明明食得好清淡，仲要俾人指責係咪偷食炸嘢，同埋成日洗好多錢喺皮膚上面
其實仲有好多嘢想講，不過太長有機會再分享，大家加油呀！
