喺今年1月初爆出「洪門宴」事件，被影到在宴會中唱K嘅香港菁英會前主席曾鳳珠（Ellen)事隔兩個多月，尋日（19日）終於喺Facebook(Fb)「露面」喇！
話說Ellen喺過去一段時間，都只係喺Fb貼文，大多數都係有關家居檢疫同第5輪防疫基金會申請資助計劃等資訊，但係就冇近照，唔知最近佢忙啲乜嘢？直至尋日，佢上載派發物資活動嘅相同影片，就發現佢帶上口罩同護眼罩嘅自拍照，其他相就係一啲中西藥同消毒藥水，又貼文話呢排嘅周末都係去派抗疫物資。
東網致電佢查詢近況，佢話近排都好忙，依家一有時間就去做義工，將物資收集分類好，就點對點將物資送到確診者家中。由於疫情嚴峻，佢日日都會做快速檢測，做完嘢入屋前都會成身消毒，入屋後就第一時間去沖涼，將啲衫用消毒藥水浸吓先再洗，仲話沖涼都要沖成個鐘，先覺得乾淨，佢話始終同屋企人住，安全啲大家都安心。
