自從14年「蘭桂坊洋腸」David Campbell(前名David Bond)短片瘋傳中外後,港女就被標籤為崇外愛西餐。不過噚日就有港產絲打po文指港女係「被逼」戀上外國人:「你以為香港女仔唔喜歡港男麼?其實香港好多女仔都被逼揀外國人」,仲大彈香港男仔要求多多嫌三嫌四:「一嫌肥,你要明白有d(啲)女仔天生肥底好難減;二嫌矮,香港女仔其實可以有幾高?三嫌熱情,直接少少又話人發姣。」
樓主就係因為以上種種因素為港女抱不平:「好多人都『被逼』揀外國人......好多港女唔係特愛洋腸,反而係俾(被)港男逼成的,唔通搵唔到真愛去第2度搵都有罪?香港男人就唔好番(返)大陸搵老婆啦。」絲打可能以為網民會有共鳴,點知大部份留言都係指佢「港女思維」、「對港男態度完全不同」。依家又唔係拎把刀逼你拍拖,一句到尾都係自己選擇啫。