[靈異] [愛情]我屋企養左隻女鬼…！

唔會純粹得個人物名一樣 內容完全唔同

咁都好啲遲啲會出埋個姓應該就唔會一樣

第六十五章：教功課(中)

我俾佢呢一句令我感到好愕然即時冇野好講收左我皮，冇諗過佢寧願賣身都想我教。

「癡…癡線，你俾我我都唔搞你啦。」

「怕左你啦，我暫且就唔收你錢，但我真係好廢架咋，你唔好指意我好勁。」

我幫我自己戴定個頭盔。

「得啦，即係你肯教我啦。」

然後chole姐就拎左部手機出黎係疊功課隔離望住開晒濾鏡自拍準備po上ig story，上面寫住「巧開心 終於搵到個人幫我免費補習 考試巧辛苦架 但今次考試一定可以輕鬆carry～要努力啲！」

Mk妹真係Mk妹，一知道我會教佢就即刻po上ig曬命扮勤力，慌死冇人知道佢努力嘅一面，然而我亦都見到佢follow左好多男仔fd，佢應該成日同啲男仔玩。

「洗唔洗咁做作啊，冇人會讚你架喎，衰左唔好賴我。」

「乜撚野做作，我用功讀書架，教你就教啦咁多嗲。」

要我教你做野都咁冇禮貌，果然有其母必有其女。

然後我望向佢啲功課，見到一張工作紙上面寫左佢個名、班別學號，仲有學校名，原來佢真係叫樂兒，佢全名叫孔樂兒，5C班，13號，學校係我附近嘅一間band 3頭中學。

「咁你修咩科啊？」

「中史、生物。」

平時佢咁惡死竟然修中史呢啲咁沉悶嘅文科？

「你真係好彩，我以前都係修中史，呢個勉強教到你少少。」

「雖然我修中史，亦熟讀中史，但我模擬試只係攞2，因為好多關鍵字都冇寫到出黎，所以我淨係齋講會好了得。」

「乜你咁廢架，你淨係識齋講都攞到2？」

佢見我冇料扮四條咁即刻串下我。

「你唔好搵我教囉。」

「咁你盡教囉，只係我中史係最差咁解。」

佢聽到我拎呢樣野做把柄佢都冇野好講死死地氣叫我教。

「但你教我英文先。」

英文？啲雞腸反而係我最差喎，我點教你？

然後佢拎左張英文作文紙出黎做，呢個時候我先發現佢原來有幾手指係搽左層肉色嘅指甲油，加上佢手好白滑 ，更突顯佢對纖纖玉手嘅靚，估唔到mk妹都咁識得扮靚。

但佢唔會俾學校抓儀容咩？定佢搽肉色指甲油就係因為見可以過到骨？

「喂，peanut點串？」

正當我陶醉緊佢啲指甲之時，突然佢問起我一個英文點串。

「penis？咪p-e-n-i-s，乜你作文要寫陰莖呢個字架咩？」

但peanut同penis嘅讀音有啲似，所以我聽錯左。

「笑死屌你唔好淨係掛住你碌鳩啦，peanut啊，即係花生。」

頂呢一刻我即刻尷到紅都面晒，我仲要好有自信咁串penis出黎，搞到佢笑到我面黃。

「得得得幫緊你，我幫你Google translate下。」

「乜你英文咁廢架，ive喎，連隻英文單字都唔撚識，都唔明你點pass到。」

然後我又俾佢串，其實我以前英文嘅模擬試只係啱啱好合格。

「我咪講左我黎緊只係個ive仔，成績唔係好好，仲要英文我最差。」

「咁你查到未呀咁多嗲。」

「查到啦，p-e-a-n-u-t。」

然後chole姐繼續做佢嘅作文，佢竟然全程都唔洗我點幫佢，係好彩嘅，可能佢都知我英文唔係點幫到佢。

「bridge呢？點串。」

過左一陣佢又問我某個英文點串，今次我好清楚聽到佢講咩啦。

「bitch？咪b-i-t-c-h，你係咪講緊你自己哈哈。」

我終於有機會串返佢，但佢作文可以寫粗口架咩？

「屌你你就bitch。」

然後chole姐一巴掌車左落我個頭，我感到一陣痛楚。

「哇好痛…」

「抵死啦話鳩我，on9仔我話你英文白癡真係唔係扮架喎，bridge啊，橋啊，翻譯下啦智障。」

頂我又柒多次俾佢串鳩我，今次仲要打鳩我，佢兩個讀音實在太似，我自己都聽錯左，點解英文啲音要咁似粗口。

「查到啦，b-r-i-d-g-e。」

說罷佢繼續寫佢篇文…

做左大約一個鐘多啲，佢就做晒，然後拎俾我過目。

「你拎去睇下我寫成點。」

我一睇之下令我嚇親，佢無論文筆、文法，就連結構組織等等都寫得好好，佢呢個程度起碼攞到3以上。

「其實你英文咁好點解仲要我過黎教你？仲好過我喎。」

「我就係想你過黎教我啊，吹咩？你黎做我嘅人肉翻譯機都好。」

咁咪即係當正佢成個娘娘咁，連翻譯都叫人幫佢，可惜我係唔會做爛口妹隻兵架。

「況且我又唔係淨係叫你黎教我英文，其他科唔洗教嘅？」

「咁你仲有咩要做啊小姐。」

「中史囉，咁啱有張工作紙要做。」

Chole姐從佢疊功課攞出幾張工作紙出黎，第一part係問答黎。

「我唔想睇書，你直接講答案我知啦。」

「乜你咁懶，揭書都覺得麻煩，明明書中自有黃金屋。」

啪！

我又俾佢從後打左我一下。

「我黃你老味，叫你講就講啦咁多嗲，叫得你黎幫我睇書黎托呀，明明你仲要吹到中史好撚勁咁。」

條mk妹真係好撚暴力，一言不合就打人，真係唔知點解我仲會有心教佢。

「好好你冷靜啲，等我睇地睇下啲題目。」

第一題係問李隆基係邊個皇帝。

「你係咪連第一題咁簡單都唔識？」

「識就唔洗問你啦，你係咪又多嗲？」

「咪係唐玄宗囉，寫啦。」

我快快趣講個答案出黎，費事佢就一巴車落黎。

「原來佢就係唐玄宗，我幾鐘意呢條友。」

又話自己唔識歷史嘅，冇啦啦又會識佢乜水？

「你鐘意佢都冇用啦，人地鐘意肥婆架，你瘦到成鵬骨咁返到去都一定俾人地流放去大西北。」

我心入面忍唔住暗爽以我嘅歷史知識串返佢。

啪！

突然我又俾佢大大力打左一下。

「屌你我鐘意邊個關你撚事，洗唔洗你管？」

的確係嘅，我又唔係你邊個，點管到你咁多，你識邊個都唔關我事…on9我諗呢啲做乜，做咩冇啦啦咁著緊佢，佢識邊個真係唔關我事。

「冷靜冷靜唔關我事，我地繼續。」

然後好快我講晒問答題啲答案佢聽，問答呢一part好快就搞掂左，跟住就去到長問題。

「跟住嗰啲點搞啊？」

「你寫左第一題先，佢問你秦滅左邊六個國，就係齊楚燕韓趙魏。」

對我呢啲鐘意歷史嘅人黎講，呢啲國名我唔洗記都識，簡單啦～

「有啲料到喎中史撚。」

「當然，繼續作戰！」

呢刻嘅我遇到中史充滿自信，題題輕鬆KO、如入無人之境。

「跟住呢題承上題，佢問你六國滅亡嘅過程同成因，8分長答題黎，睇下呢題點樣收你皮。」

第六十六章：教功課(下)

Chole姐陰陰嘴笑咁望住我，就好似覺得呢刻嘅我如臨大敵咁，覺得呢次我一定會唔識，而之前嗰啲都只係卒仔。

「睇下點，我講俾你聽你做寫啦。」

「首先秦會由韓趙魏呢啲細國入手，跟住就輪到楚燕齊，當中楚齊都係大國，佢地六國最主要成因係勾心鬥角唔信大家所以合作唔到。」

其實我覺得歷史同現實係有啲似，例如辦公室政治，大家勾心鬥角大家唔信大家唔會合作，其他人有啲咩事都只係食花生，覺得唔關自己事，

但到公司蝕錢嗰陣咪又係大家一齊攬炒齊齊減人工，嚴重嘅話有啲甚至要去到被「滅國」，即係炒魷魚。

「跟住我就會講下佢地點樣滅亡，簡單黎講佢地分左3個派別，韓魏齊係防守派；趙楚係作戰派；燕就係刺客派，而最尾防守派嘅齊係成為左最後生還者。」

「首先秦始皇有一日唔知食錯咩藥覺得好興奮就派重兵隊冧左韓；跟住去到趙呢個作戰派，本來入面有條友叫李牧好好抽但就俾秦收買左趙入面某條彈散做二五仔，佢話李牧想作反，就咁收左佢皮，趙國亡。」

「去到魏呢個防守派，佢心諗我起晒高城牆你仲點搞到我，今舖仲吹撚得我漲？點知秦用水攻一招收左佢皮，魏國亡。」

「輪到楚呢個作戰派，呢個係大國，有條友叫項燕雖然佢肯作戰，第一輪亦收左秦皮、但去到第二輪條友主動引戰但人地想休息下。」

「到條友覺得引到冇晒癮好攰諗住走嗰陣人地先出黎打鳩佢，最後又收左皮，楚國亡。」

「燕係刺客派，佢派左條友叫荊軻嘅傻仔諗住叫佢去秦做臥底偷偷地做秦始皇一鑊，點知失敗左，秦見佢竟然咁夠薑就即刻派重兵收左燕皮，燕國亡。」

「黎到齊呢個食花生國，佢有條彈散叫后勝又係二五仔，長年收人錢唔搞事，齊大佬又信條彈散話好平安，所以佢咪可以安逸到最後一個被滅嘅國，然後到大佬醒覺嗰陣已經俾秦收佢皮，最後齊都亡埋。」

我將成個過程講晒出黎，Chole姐就默默咁轉返做書面語改少少字眼咁寫返晒落去，果然孺子可教。

「點啊，夠唔夠詳盡？呢8分拎撚晒啦。」

「你老味睇唔出你又真係幾熟讀歷史，但你啱做講故佬多過考dse，乜撚野關鍵字都冇。」

冇錯，如果考試都有得咁樣用講嘅方式寫返晒出黎嘅話我一定好高分，可惜考試並唔允許我呢個講故佬嘅存在，所以到放榜嗰陣我都唔知可唔可以拎到2以上。

「我不嬲都話我熟讀歷史，只係考試唔接受我。」

「點啊，你寫好未？」

「寫好晒啦，你見我寫到成版紙都係字就知咩料啦，不過你又的確講得幾有趣嘅，我鐘意。」

受到賞識後我不自然地揚起左得戚嘅笑容，顯得我呢個講故佬好有成功感，原來我呢個講故佬都唔係完全冇用。

「唔好笑得咁撚開心住，未做完架，仲要作戰。」

當我得戚地笑緊之時Chole姐就制止住左我笑。

「黎黎黎繼續作戰！」

不過我依家士氣仲係滿滿的，繼續過五關斬六將我都冇問題。

「黎緊呢題長答問你焚書坑儒嘅成因係咩，值5分。」

焚書坑儒？咪即係好似文化大革命嗰啲咁，獨裁嘛，仲有唔講得佢壞話。

「焚書坑儒嘅主要成因咪因為條友獨裁同玻璃心，條友獨裁係因為覺得自己國家啲文化最勁，其他都係垃圾，所以其他宗教或者文化嘅書都要燒晒佢，淨係留自己國家嘅史書。」

「至於玻璃心就係啲幫佢煉丹條彈散失敗左係出面周圍唱佢講佢壞話，跟住咪抓撚晒佢地坑殺，當中嘅儒就係班術士。」

說罷Chole繼續以轉換字眼嘅方式寫落去。

「冇啦？人地5分題喎。」

過左一陣佢就寫完，佢手速都幾快。

「冇啦，你自己諗辦法寫多啲延伸啦。」

「聽完你咁講我覺得秦始皇真係好撚殘暴，人地講佢少少壞話就殺晒啲人。」

「殘咩暴，其實你咪就係秦始皇，焚書坑儒件事好似你，一樣係唔抵得我講你少少壞話就郁手郁腳打鳩我，玻璃心啊！」

我一聽到佢講秦始皇殘暴我突然又諗到個位可以入佢串返佢。

啪！

說罷當然又俾佢打左一下，依家嘅我手臂周頸已經佈滿掌印。

「屌你我依家打你唔撚起啊，我係鐘意打鳩你呀，吹咩？我冇好似佢咁隊冧你咪已經偷笑。」

「好啦喎，再打我信唔信繳你械！」

「繳乜撚野械？」

「收起你枝筆唔俾你做野啊。」

「好啊，你過黎我講個秘物你知。」

我唔知點好聽話咁哄個頭埋去佢身邊，究竟佢想講咩要咁神秘？

然後佢貼住我耳邊，嘴輕聲地講左啲野，一陣暖氣同輕聲嘅聲音係我耳孔中回盪，可能氣流觸動耳內嘅微毛，瞬間令我好敏感地打左個冷震，

但其實係舒服，眼前嘅女仔竟然咁親近我做出咁親密嘅舉動，令我心跳不自覺地加速。

「收皮啦你柒頭。」

最後佢係我耳邊講左呢6個字。

「屌你玩鳩我，我依家就繳晒你全副武裝，你筆袋呢？」

知道佢玩鳩我後，我即刻周圍搵佢筆袋係邊。

「柒頭，筆袋我一早收起左啦，仲等你慢慢偷咩哈哈。」

佢笑到gap gap聲，我頓時覺得自己好柒，又再一次俾佢冼一鑊，點解我要咁聽佢話係咁俾佢玩？

「屌你個mk妹今次算你好野。」

我冇晒佢符唯有死死氣地認輸。

啪！

一聽到mk妹佢突然神緒180度轉變又一巴掌車左落黎。

「又m乜撚k妹啊，講過幾多次我有名你叫。」

啪！

「啊好痛，唔好打…」

「聽唔撚聽到啊！」

「嗱，雖然我唔打女人，但我都唔好恰架！」

啪！

「咪撚講其他野啦，我問你聽唔聽到！？」

然後佢今次好似真係發火咁打左我好幾下。

「聽到聽到，冷靜啲唔好再打，痛。」

我身為一個男人係女人面前竟然俾一個女人打到投降，莫非出面啲老婆奴就係咁？

「咁我叫乜野名啊！？」

「孔樂兒嘛，Chole姐。」

「...你點知我全名？」

第六十七章：鬥嘴

「咪就係你啲功課度見到。」

「大膽呀你，偷睇我個全名。」

說罷Chole姐陰陰嘴對住我笑，知道個全名姐有咩咁好笑？

「你…你唔係以為我會鐘意你下話，咁啱𥄫到咋，我點會鐘意你呢type女仔，你唔啱我口味。」

我見到呢個情景即刻慌忙地解釋，紅都面晒。

「你做咩咁緊張姐，我都冇話你鐘意我。」

頂佢佢講完呢句我更加緊張，好似更加俾佢感覺我唔對路咁…冇錯，係尷尬！

「我…我都冇緊張，你諗多左。」

「唔講啦，繼續作戰啦，唔好嘥時間。」

然後我地慢慢平靜落黎，我繼續教埋佢淨低落黎嘅中史題目…

過左唔知幾耐，佢終於清晒啲功課，我今日任務亦都完成，準備返去之時，佢想我黎緊佢放學都過黎教下佢，但我話佢放學嗰陣我要返工，要放假先得，

之後再講下講下佢竟然估到我係屋企附近間惠康返工，不過諗深一層其實都唔難估嘅，係人都想搵返就近返工…

「返黎啦？佢叫你去佢度做咩？」

返到屋企後，阿盈第一時間好奇問我去佢度做咩。

「咪就係叫我去教佢功課，但佢真係好暴力，串佢幾句就係咁打我。」

「原來係功課上有求於你姐，冇你諗得咁壞呀，但你地進展得幾快啊，第一次見就打情罵俏晒。」

「乜你咁雙重標準嘅，我俾其他人蝦就好著緊即刻幫我，但俾佢蝦你就咁開心。」

阿盈冇啦啦又話我同佢有野，我以鄙視嘅眼神望住佢。

「咁係嘛，一次生兩次熟，但你地未去到第二次已經咁熟啦喎，佢打你咪即係覺得同你好相處。」

「癡線我先唔想同呢啲mk妹熟，佢每一下都大大力打落黎架，我自己都受緊苦。」

「佢仲話遲啲都想我過去教佢，遲下可能需要搵到你出動，你知你以前學霸黎架嘛。」

我都唔知點解明明今次受左咁多苦但我都仲肯應承之後得閒再黎教佢，而且內心仲有少少愉悅有啲期待下一次，

仲要佢每一次打我其實我都有少少興奮，好似覺得自己被受重視咁…仆街唔通我內裡係被虐狂黎？

「講呢啲，我唔係好勁架咋。」

「扮謙虛啦係度，係呢你以前修咩科？Chole姐佢修中史生物，我淨係識教佢中史。」

「佢修生物？咁咪開正我嗰範？我以前都修生物喎。」

咁啱？我依家先知原來阿盈佢以前係修生物。

「咁就掂！遲下佢生物有野唔識可以請你槍黎支援。」

「你唔係好唔鐘意佢咩？點解冇啦啦又咁願意幫佢？」

說罷阿盈陰陰嘴對我笑，我即刻感到無言以對。

「我…我見佢咁慘咩都唔識先好心出手幫佢咋，我當然係唔鐘意佢呢啲mk妹。」

「講笑咋得啦，有需要嗰陣先叫我過黎幫下手啦。」

癡線阿盈問埋呢啲野搞到我又紅都面晒，我自己都唔知點解咁肯幫佢。
.
.
.
又黎到星期一返工嘅日子，我又要返黎面對張生，但今次係「全新」嘅張生。

今日同平時一樣係水街度上住貨先，張生行過都冇乜點理我，就算有甩漏佢都冇再屌我，而係有耐性咁教返我點做，睇黎佢係俾阿盈嚇到冇晒膽。

當唐生遇到全新嘅張生對我嘅態度180改變，佢都問我點樣馴服左佢呢個老屎忽，我當然扮唔知，但佢硬係覺得我應該用左啲咩方法，好佩服我……

「唔該，我想問呢個優惠去到邊時？」

正當我踎低上緊貨嗰陣，隔離突然傳來一把熟識嘅女仔聲問我野，佢行到好近我嘅位置，我向隔離地下一望，見到一雙雪白嘅腳背踢住對厚底拖鞋，腳甲搽晒黑色趾甲油。

「邊個優惠…？」

正當我向上望時，前面嘅人原來係Chole姐，佢上身著住一套雪白嘅校服過黎、腰間扣住一條綠色皮帶。

「我玩鳩你咋，都冇咩優惠哈哈。」

「你點解會係度？你過黎做咩？」

我第一時間問佢黎呢啲做咩。

「我過黎咪過黎，你吹咩？呢度又唔撚係你開嘅，我過黎買野又得，過黎睇你做野又得。」

呢點又俾佢講得通，佢黎我都奈佢唔何，鬼叫我一開頭同佢講我係惠康度做，仲要估到我就係呢間度做。

「係買野就買野啦，唔好阻住我做野。」

「我係要慢慢買呀，你吹咩？執你嘅貨啦柒頭。」

「Chole姐好心你放學就返屋企溫書啦，你就黎考試架啦，咪撚阻住我做野。」

「你小心啲講野啊，客人至上，因住我port你port到你連份工都冇得做。」

佢咁講完我即刻冇野好講，呢啲就係客人同店員嘅分別，店員除左要受老屎忽氣仲要永遠受客人嘅氣。

「唉我唔理你啦，咁你慢慢買飽佢啦。」

然後我呢條街執得七七八八就去隔離條街上貨。

當我係隔離條街上左一陣貨後，佢冇啦啦又拎住兩包野行過黎。

「喂，你覺得呢兩包m巾邊一包靚啲？」

Wtf！？佢過黎叫我揀m巾？我男人老狗一條又點會識揀女人野，就正如男人都唔會叫女人買condom，呢啲野唔係不嬲你自己用開自己先知架咩？

「…」

我扮聽唔到野咁唔理佢繼續我有我上貨。

「我問緊你野啊，出聲啦。」

「喂咩，我家下冇名你叫咩，我叫方伯洋，你可以叫我阿洋。」

我特登學佢屌我咁串返佢以便轉移話題，但我變相就直接爆左自己個全名俾佢都唔知。

然後佢又大大力打左我一下。

「屌你呀學我講野？你以為自己係邊撚個咁巴閉啊？」

「你唔好郁手郁腳啊，有CCTV影住你。」

說罷佢就好似收左皮咁冇野講，我終於有一次係可以收到佢皮。

「咁我叫你聲洋兄囉，邊款m巾靚啲啊？」

佢俾我收皮後就將聲線變得溫柔咁問我野，眼前有兩包m巾；一包紫色、一包粉紅色，同樣係38cm但唔同牌子。

「關我蛋治咩！」

第六十八章：道歉

最後我以一個扮惡嘅語氣拒絕回答試圖叫佢走，因為我真係唔識揀女人野，亦唔想幫佢揀。

「嗯…明白，咁我走啦，唔阻你…」

我宏量嘅聲音此起彼落，說罷佢就表現到好失落咁垂低頭掉頭走左，我以為佢會屌返我嘅畫面竟然冇出現，

然而依家呢個畫面令我愕然，我都係第一次見，我係咪語氣重左hurt親人？我係咪唔應該咁惡咁鬧佢？始終佢已經變得好聲好氣咁問我，但我仲好強硬咁鬧返佢真係有啲衰…

呢刻嘅我仿佛感到罪孽深重不斷覺得自己好仆街咁趕走左人…

其實你問我m巾嘅野我內心係有少少暗爽架，心諗我竟然可以知道啲女神咁私密嘅野，我覺得自己好榮幸，

我估一個女仔一定係好重視好信任一個人先會將自己咁私密嘅野同佢講，但偏偏我就要同你作對，以為你會同我鬧嘴落去，點知結果係…我趕走左你。

係，我已經不自覺當左你係女神，我覺得你好珍貴…雖然你係mk妹，但其實你真係好靚，你仲會識美甲扮靚、屋企亦都打理我十分整潔而且仲好少女feel，你每一刻都有種高貴嘅氣息散發出黎，

再諗返第一日係交友app識你嗰陣，由睇到你幅相開始，去到你咁有禮貌同我傾計，你真係好有氣質，可能呢啲就係你對我嘅魅力，亦都係吸引住我嘅原因…

只係我不斷安慰自己一定係太少同太耐冇同女仔相處先係咁，我拒絕面對我內心最真實一面。

依家我咁惡咁hurt左佢，佢係咪唔會再同我做fd…？我地係咪自此變回陌路人？如果係咁嘅話佢咪唔會再打我？佢唔打我嘅日子會好唔慣…種種唔好嘅問題不停係腦海中旋轉。
.
.
.
放工後，我隨即好快咁行返屋企，佢係個app冇再理過我，唔知佢咪真係好hurt，雖然依家好夜，但我都想去佢屋企當面同佢講返聲對唔住…

沿路返去之時，經過條巷仔，嗰對鬼母子見到我冇再襲擊我，反而係好有禮貌地向我點點頭，我感到有啲反常，

而伯伯就繼續佢嘅睇電視，但我冇心機理咁多繼續快步行返去…

「阿洋你返黎啦？做咩氣來氣喘咁？」

我返到屋企後，我立刻擺低啲野準備去隔離搵Chole姐，阿盈見狀頓感疑惑。

「咪…咪個mk妹，佢今日黎惠康我好似hurt親佢趕走左佢，佢全日冇搵過我，我想去隔離搵佢道歉返…」

「死啦你，原來你hurt親人，咁你真係要好好氹返人啦。」

「不過依家咁夜人地會唔會已經瞓左？」

「我唔理啦，今日做左件錯事，我已經等唔切搵佢道歉返，我好內疚。」

說罷我好快就出左門口去到Chole姐門口，而阿盈見我咁焦急亦跟埋出黎睇下有咩可以幫到我。

叮咚！

我深呼吸一下後按響佢個門鐘。

…

鐘聲係屋內響起後並冇一絲動靜，唔通佢真係已經瞓著左？

叮咚！

我再次按響佢個門鐘，然而屋內依然一絲動靜都冇。

「可能人地真係瞓左，你唔好嘈醒人啦，我地可以聽日再黎。」

阿盈見我㩒兩次門鐘都冇人應索性叫我聽日再黎搵佢，但我當然唔服氣，因為我仲諗到個方法。

「阿盈，不如你試下入去佢度睇下佢係咪真係瞓左。」

呢個方法就係叫阿盈穿入人地屋企，雖然咁樣好似好冇私隱，但為左一探究竟呢個係最快捷嘅方法。

「咁樣真係好咩？咁樣係擅闖人地屋企喎。」

「你地大家都係女仔唔驚啦，得你可以幫到我架咋，唔該呀…」

我雙手合十咁祈求阿盈幫我。

「唉，真係冇你符，淨係呢次架咋。」

「知道啦。」

說罷阿盈就準備穿入佢間屋。

共共共～

正當阿盈要入去之時，突然走廊盡頭傳來𨋢門打開嘅聲音，亦伴隨著腳步聲有人行緊過黎，我倆停住左動作。

慢慢地遠處浮現出一個身影，佢身穿一件黑色T-shirt、下身一條超短熱褲配以一對白波鞋、腰間孭住一個鐵鏈斜孭袋，冇錯，係Chole姐。

我同阿盈都估唔到佢竟然仲未瞓，而係依家先返，其實我應該一早就要估到佢唔係屋企，畢竟佢係個mk妹，出夜街應該都好正常。

見到佢嘅出現猶如見到曙光一樣、好滾動，我再次可以見到Chole姐。

「喂柒頭，你係我屋企門口搞乜撚野？」

你盡情鬧我啦，你嘅每一句粗口橫飛我已經習慣伴隨係我身邊，而今次的確係我錯先。

「我…我過黎睇下你死左未咋，我今日咁惡鬧你…」

「喂阿洋，你做乜仲講埋呢啲野？」

阿盈聽到我講得咁難聽篤左我一下，但其實我都唔知，每次見到Chole姐我都會忍唔住串下佢，可能我係受左佢氣場影響啦。

「你唔好諗到自己咁撚偉大啦，你邊個啊？我會為你死？你照下你個閪樣先啦，同埋我唔會俾你把死人聲嚇窒囉。」

「但你今日好似好hurt咁行走左，你垂頭喪氣咁…」

「hurt你老味咩，我見你唔想答問黎都嘥氣我咪自己買完走先，我垂低頭係因為揀緊手上邊包好啲咋懵撚。」

原來係咁，一切都係我諗多左，佢並冇俾我嘅聲線嚇倒，但我仍然為我今日鬧佢感到些少內疚。

「同埋我今日咪未答你嘅，我依家可以答你，紫色好睇啲。」

「我買撚左啦等你咩，你唔好再遲啲講。」

「買左咩色？」

呢一刻我由我親口問佢買左咩色嘅m巾竟然冇晒今日嘅嗰種尷尬。

「你最鐘意嘅紫色囉，你唔撚係話關你蛋治架咩？」

「今日係我唔啱嘅，一野就落左你閘，對唔住。」

第六十九章：送上下午茶

「男人老狗唔好咁肉麻啦，我聽完都起雞皮，有啲野在心中改左佢咪算撚數囉，不過估唔到你份人係識得認錯。」

可能我突然變得咁認真佢感到有啲愕然，但竟然係有人唔鐘意聽到人道歉？

「既然你話你冇俾我hurt到，即係你之後都會繼續同我做fd唔會絕交？」

「冇啦啦絕乜撚野交，你見我份人有咁易同人絕交咩，我仲有大把功課要你教架。」

「你終於認你同我係fd啦咩？之前唔係想你同我做fd仲難過叫你食屎咩？」

「做咩姐，因…因為今日好似嚇親你我內疚先勉強當你係普通朋友咋。」

「得啦知架啦。」

佢知？知啲咩？我真係內疚先當佢普通朋友架咋。

「咁你聽日過唔過得黎教我做野？」

「可以！」

我一聽到佢想我教佢做野唔知點解我會二話不說答應左佢，然後我會有股興奮感，可能係覺得佢冇當我陌生人咁覺得開心掛，

我估我返工方面可以同唐生傾傾嘅，我呢個兼職仔應該夜啲返無所謂。

「咁聽日我放學返到黎你過黎，最好順便幫我去附近餐廳買個下午茶俾我。」

「一日食咁多餐，食撚死你。」

我忍唔住又講笑串左佢一句。

「你死我都未死啦咁多嗲，我真係肚餓，到時你幫我買就得。」

然後Chole姐又打左我一下，我扮痛咁撫摸左下被打個位，但我內心亦因為佢打我一下而暗地裡開心。

「得啦得啦，聽日我買完送到上你府上。」

「咁咪聽話，夜啦，返歸瞓教啦你，我都攰，聽日見。」

說罷阿盈就粒聲唔出開門入左去，而我同阿盈亦都返返屋企，今晚件事終於告一段落，雖然佢對我咁惡咁爛口又冇禮貌，但阿盈依然覺得佢內心係好。
.
.
.
「唐生 我今日有事要7點先返到黎」

終於到左聽日，呢日我wts唐生要遲返。

「冇問題表弟 遲下你如果都要遲返嘅同我講聲就得 你係表弟我一定通容俾你」

呢一刻我覺得身為表弟嘅我好似有特權咁，果然識人真係好過識字…

「我依家放學，記得幫我買tea咪撚遲。」

過左一個鐘左右，我收到交友app有個通知，原來係Chole姐嘅一個提醒，

我望下個鐘，差唔多4點，佢的確放學，我都真係應該要依家出去買定，然後我好快落街間茶記買tea…

叮咚～

一陣之後，我已經買好去到Chole姐門前，鐘聲響起，伴隨著輕微嘅腳步聲迫近門口。

「你條友仔又幾準時喎，我返到黎冇耐你就黎到。」

開門後，Chole姐以一身白色校服look迎接我，有一種清純嘅感覺，但佢並唔係…

「緊係啦你當我流架。」

然後我再次步入佢呢個充滿少女feel嘅屋，周圍粉紅色嘅牆身映入眼簾。

「識野喎，係厚多士，你條撚樣又知我鐘意食嘅？你查過我呀？」

入到去我放低袋下午茶，佢即刻過黎睇買左咩，原來佢鐘意食厚多士，

呢樣野啱晒你食啦，你成日叫我咪多嗲，咪就好似你對我咁‘你厚多士(好多事)、你冇丁丁’。

「我洗鬼查你咩，平時見你成日踢住對厚低拖就知你鐘意食厚多士，通常呢啲都係啲潛意識野黎架啦。」

我求其講左個原因黎串佢著厚底拖，順便可以曬下自己係識啲野。

「潛你老味咩，冇料扮四條，我由細到大都鐘意食架，又唔見你打飛機鐘意飲牛奶。」

佢又講得啱喎，我的確唔鐘意飲牛奶。

「唔撚睬你啦，老娘我食野先，餓到肚都扁撚晒。」

不消片刻佢就食完，佢冇俾返錢我，我亦冇問佢拎返，可能我大方我覺得請佢食少少野冇所謂啦，最緊要係見到佢食得滋味而我又滿足到佢嘅就乜都抵返晒，

佢真係一隻為食貓，霸道得黎都有為食一面，一有野俾佢食就乜野惡都冇晒，其實都幾可愛。

「點啊飽未？肯做野未？」

「飽啦飽啦，但你等我抖下先。」

然後佢拎左部手機出黎影相selfie碌ig。

「懶人多屎尿，明明你就想偷懶扮咩。」

「你理撚得我，你咁勁幫我做晒佢囉。」

說罷我冇聲出。

「屌你睇你個死樣都唔會識做晒啦，點會俾你搞，拎我書包過黎啦。」

佢見我俾佢講到冇聲出即刻用佢對死人眼望左我一眼叫我拎佢書包過黎，睇黎佢終於肯做野，果然冇聲勝有聲，呢招work。

我去前面張梳化拎佢個書包過黎，佢個書包竟然都係粉紅色，佢有冇咁鐘意粉紅色？

咁啱佢書包冇拉埋，見到入面嘅書擺得好整齊，書包中散發出一種屬於佢屋企嘅香味，亦都係屬於佢自己，

可能你地會覺得我變態，但屬於女神嘅味道嘅所有野都真係好香…

「嗱，拎左黎啦，係咪開始做野？」

我拎住個書包係佢隔離放低督促佢做野。

「怕左你，篤多陣機都唔撚得，做咪做囉。」

說罷佢並冇放低手機，而係開左個自拍鏡頭係度照鏡，佢係度整佢前面嗰pat陰，原來佢唔單止mk仲好自戀。

「點啊小姐，又話做野依家又繼續拎住部機拖時間。」

我無奈咁望住佢。

「屌你照埋個鏡先得唔得啊，你唔覺得我今日靚左咩？」

靚咩呀，你個look咪同平時一樣都係咁mk，簡單啲講就係千篇一律，但仍然存在嗰種靚同高貴嘅氣質，應該係得我咁傻先咁覺得。

「你日日都差唔多樣架啦，都係嗰句，你返返唐代嘅話冇人會要你。」

啪！

「哎呀！」

說罷Chole姐又打左我一下。

「屌你個死古代人，家下係現代我不知幾撚多仔溝，我都知我靚，你唔洗妒忌我嘅。」

佢真係自戀到走火入魔，明明我冇讚佢佢都可以當人地係讚緊佢。

「得啦知你多仔溝啦，可以做野未？」

第七十章：請槍

然後Chole姐終於肯放低部機死死氣地拎啲功課出黎，係要我認同佢佢先肯乖乖拎野出黎做。

「不過講起歷史，你中史又真係有啲料到，上次你教我份野竟然拎到唔錯嘅分，估唔撚到你個講故佬俾你吹中左咁多point。」

聽到我教佢嘅野拎到唔錯嘅分數後，我立刻感到沾沾自喜，原來我吹得黎都啱咁多。

「洗乜講，我話晒都係個熟讀中史嘅大師，呢啲野濕碎啦。」

「可惜你自己考嗰陣咪又成pat屎咁。」

呢個又的確係嘅，可能以前我乜鳩都寫落去但就偏偏寫唔中point，但今次靠Chole姐佢修改下啲字眼就即刻攞好高分，

再一次證明我考得差唔係我唔識歷史，而係我寫唔中佢要求嘅字眼，屌如果佢俾我講出黎嘅話我分分鐘攞5星星都似，可惜呢個遊戲就淨係考你文法…

「過左去啦，我依家教得你高分咪得。」

冇錯！靠住我地嘅雙劍合璧，呢個缺憾就可以修補，我用我嘅吹水知識教佢，佢就用佢嘅文筆修改字眼同句子，可以拎到高分都唔出奇。

「你中史係有料到，不過我做英文先，英文嘅野你唔識架啦，你可以收收皮先。」

頂佢個肺，啱先仲對我教佢嘅野讚不絕口，依家就做英文叫我收皮。

俾佢睇穿左個我點弱點後，佢竟然就拎我個弱點黎串返我。

「乜你呢個女人轉肽轉得咁快嘅，冇啦啦拎我弱點出黎撻鳩我。」

「都係嗰句，既然你都識做嘅，你叫我黎教你做乜？你自己都搞得掂啦。」

「都係嗰句啦，你理撚得我，我鐘意叫你黎教我呀。」

佢講得呢句咁霸道，其實我大可以走人唔教佢，但我又冇走嘅呢個意慾，唔知點解我鐘意留係佢屋企。

「咁你慢慢做啦，我可以邊篤機邊監督你個爛口妹做野，仲好。」

說罷Chole姐就開始動手做佢份英文。

話就話我篤緊機，但其實我經常不自覺地偷偷觀察佢尊心做功課嘅樣，呢招其實都係高招，篤住機用眼球嘅微小郁動望住佢，咁樣佢就唔會覺得我望緊佢。

估唔到佢平時咁爛口都有認真嘅一面，而佢呢個面無表情嘅認真一面真係好吸引，又多一個我第一次見嘅樣貌。

我除左觀察佢面容之如，期間仲不斷傳來佢嘅陣陣髮香，真係好香、聞得好舒服，我靠呢兩感深深俾佢吸引住、十分陶醉…

「屌，呢度點撚樣做。」

過左唔知幾耐，我回過神，見佢已經做完份英文搞緊份生物工作紙，但可以見到佢個表情變得好苦惱，我鄧佢覺得辛苦，可惜我唔係修生物幫唔到佢、愛莫能助…

啊！突然我諗到個方法可以幫到佢。

「周雪盈！」

我大叫一聲阿盈嘗試呼喚佢出黎。

「你做乜撚野叫邊個？」

然而Chole姐俾我突如其來嘅一叫嚇到彈起。

「冇…我啱先眼瞓恰著左發左個惡夢咋嘛，你唔洗理我繼續做啦。」

我求其諗左個藉口兜，好彩我啱先一直垂低頭篤機睇落真係似瞓著左。

「神神化化咁，呢度我唔撚識做啊，問你都唔撚識架啦，睇你死樣都唔係啲讀生物嘅人。」

冇錯，我的確唔識，因為我以前另一科係修經濟，所以我需要借助阿盈黎幫我carry你。

「阿洋？你叫我黎做咩？」

冇耐阿盈就應我呼喚出現係我身邊，

我用眼角斜望住佢做緊份功課，阿盈亦都明我想點地行過黎望住佢份野。

「邊個話我唔識生物，我以前生物不知幾撚勁，你邊度唔識做？等我呢個大神carry你。」

我即刻表現到十分自信，有阿盈呢個學霸係度後我仲洗憂生物幫唔到你？

「係咪架你唔好吹水喎，咁呢份野靠晒你。」

「冇問題啦，你呢啲野好濕碎，等我再一次令你拎高分。」

「不過你真係好懶囉，有書唔揭咁都要問我，你就黎考試架啦唔可以乜都靠晒我。」

「你老味我咪同你講過，睇書嘅話叫你過黎托柒咩，你嘅作用就係教我做野架啦，更何況啲書我都放撚晒係locker啦，邊撚個會攞返黎。」

一個唔小心我又俾佢有位入鳩我添，有唔識先叫我教，我就好似變左做有事鐘無豔，冇事夏迎春。

我唔夠佢拗，然後我乖乖地拎左佢張工作紙過黎睇，呢度係講呼吸作用嘅填充，我開始透過阿盈同我講嘅答案向Chole姐傳話…

「首先糖酵解就會係‘細胞質’度進行，佢係會用ATP嘅能量，‘葡萄糖’就分解成兩個‘丙糖磷酸’」

「跟住丙糖磷酸就會氧化成‘丙酮酸鹽’，過程入面就會產生‘NADH’同‘ATP’，呢個就係佢個糖酵解嘅過程。」

其實講完呢一大堆名我都唔知係乜春黎，一頭霧水，阿盈真係好鬼勁，呢一大堆奇奇怪怪嘅字眼佢竟然記得一清二楚。

「至於克雷伯氏循環就會係‘線粒體基質’度進行，佢過程係首先‘乙酰輔酶A’會同‘4C化合物’結合，跟住就合體變成一個好勁嘅‘6C化合物’。」

「然後‘6C化合物’會逐步‘氧化’再生‘4C化合物’，呢個過程就會分解出4種物質，分別係係‘NADH’、‘FADH’、‘CO2’同‘ATP’，呢個就係成個過程…」

好快我教晒佢做第一part嘅填充，跟住到第二part，都有啲填充。

「果然有啲料到喎，全撚部關鍵字寫撚到晒出黎。」

「洗乜講，我教得你嘅我就是上帝。」

「得啦繼續繼續…」

呢刻嘅Chole姐表現得好雀躍，猶如獲得節節勝利後嘅嗰種心情。

「跟住黎緊呢個講生長同發育都好簡單，首先生長就即係係‘體積’上作永遠同不可逆嘅增長，就好似你咁，高到咁上下就唔會再高。」

「屌你教你就教咪撚咁多嗲啦，我幾高關你撚事。」

然後Chole姐打左我一下。

「得得得我地繼續…」

第七十一章：抄牌

「嗱呢度就話係多細胞生物體內，啲細胞都係由合子經‘輸卵管’產生嘅，跟住細胞就會‘發育’成各種組織同器官，令生物體嘅形狀同複雜程度都改變，呢個過程叫‘植入’。」

「就好似你老母生你出黎之前都係咁整你出黎，扑野、受精、然後慢慢出現變化、最後就生左你個爛口妹出黎。」

「咪撚講廢話啦，邊個唔知你阿媽係女人，唔通你石頭爆出黎咩，繼續教你嘅野…」

大半個鐘後，佢張工作紙終於做完，張野除左填充，啲問題同圖片題先玩你最耐，不過與其我教佢不如話係我直接講答案佢聽。

「終於搞撚掂晒，你真係唔撚係扮喎，全部都記撚得晒，今次拎硬高分。」

「緊係，我個朵唔係浪得虛名。」

然後佢打左個喊露。

「不過呢，今次你講得冇咁funny、好撚悶，想瞓教。」

小姐我都係請槍傳話架咋，你仲想我點funny法。

「咁…咁生物野要專業分析架嘛，點可以好似中史咁鳩up當秘笈。」

「你吹到自己咁專業咁就得晒，我生物野可以放心交托晒俾你。」

「交托俾我？」

「其實我仲積左好撚多生物功課，你可唔可以幫我清撚晒佢？」

然後Chole姐拎左好多張工作紙出黎擺係我面前。

Wtf！？究竟佢有幾懶先淨低咁多野未做，冇我出現佢咪欠晒功課？

「同學你唔可以咁懶架喎，你依家係公然請槍，小心我同你老師報串。」

其實係我請槍先啱。

「拜托你啦大佬你咁撚勁唔係唔幫我下話，朋友喎，我呢啲功課聽日就要交架啦，我趕唔切，你見我咁慘咪當可憐幫下我。」

佢雙手合晒十咁叫我幫手、表情變到好可憐咁望住我，見佢咁可憐我都唔忍心唔幫佢，有少少心軟，但我仍然猶豫。

「喂我第一次低聲下氣求人架咋，你唔係咁唔撚俾面我下話？」

佢見我軟嗰套唔受就即刻改變語氣黎硬嗰套。

「得得得，見你咁慘我就俾面幫下你啦。」

當我應承佢後意味住今晚收工要開夜車幫佢做功課，唔洗瞓都似。

「咁咪好囉，多謝你先。」

我第一次聽佢講多謝。

「你電話幾多？我聽日morning call你收功課。」

一直以黎我都唔知點問出口攞電話，今日Chole姐佢竟然主動抄我牌？係咪代表我地更加fd了？

「你㩒門鐘咪得囉，要出動到morning call咁辛苦你。」

然而我仲係改變唔到同佢作對。

「屌你係咪咁多嗲，你又唔係唔知你屋企個門鐘幾撚閪，之前㩒你門鐘你幾鳩耐先出黎開門啊？我朝早分分鐘幾百萬上落架唔撚得閒慢慢等你。」

說罷佢又好似平時咁打左我一下，不過估唔到佢咁好記性仲記得佢第一次過黎屌我嗰次。

「冷靜啲，俾囉。」

然後我就講左我電話佢聽，佢拎手機出黎輸入號碼後入到聯絡人資料嘅頁面。

「你全名呢？對左你咁耐都未知你全名。」

佢竟然會想知我全名？審犯咩，不過既然我都知佢全名，我都俾返我全名佢知都唔過份。

「方伯洋。」

「方伯方伯、方伯條洋腸，你個名好搞笑哈哈。」

當佢mark完我名後，即刻係咁恥笑我個名，我感到無奈，但都慣架啦，中學都唔少人改過我花名。

「我呢啲叫獨特，唔會有人同我撞名。」

「緊唔會啦，邊撚個會改個同你一樣咁撚柒嘅名哈哈。」

因為一個名令佢瞬間好開心笑唔停，佢笑點有冇咁低？但我可以令佢咁開心其實都值，笑起上黎佢真係好傻氣。

「咁得啦聽日我morning call你哈哈…笑鳩死我。」

佢開始強忍住自己唔好再笑，

當佢慢慢收起笑容後，佢突然凝望住我，然後慢慢靠近我，佢做乜野？我心跳隨著佢嘅每一下接近慢慢加速，一定係我太耐冇同其他女仔相處。

「做乜野…？」

直到佢將個頭貼到埋黎同我只有10cm嘅距離我先輕聲問佢做咩，但佢並冇回答我，而佢亦都係呢個時候停低左望住我，係深情對望…

呢刻嘅我仿佛周圍空氣都俾佢壓迫住，係咁近嘅情況下，我可以聽到佢微弱嘅呼吸聲、可以清晰見到佢嘅每一個毛孔、皮膚白皙、瞳孔裡有著我嘅影像；

我臉頰紅到一個點、心如鹿撞，下一刻佢用手指慢慢掂向我額頭，直至觸摸到後，我感到一絲痛楚。

「你睇下你生左好撚大粒瘡係額頭度，我幫你唧左佢啦。」

佢挨到咁近就係為左幫我唧暗瘡？但我不嬲都係由佢自己退唔理佢，更何況依家由一個女仔幫我做埋啲咁核突嘅野？

「有…有心啦，唧暗瘡呢啲野都係交俾我自己做啦，唔洗勞煩你。」

說罷我撥開佢隻手向後退左一步。

「屌你粒瘡就爆架啦，我睇唔過眼。」

「既然我咁好心你唔領情嘅咁算鳩數囉，見你咁撚大粒你又唔理我先幫下你。」

「得啦呢啲野我識搞架啦。」

最後我都係冇俾到佢幫我唧同佢作對下，我無法感受到俾佢對纖纖玉手幫我唧暗瘡。

「唔撚理你，老娘我等陣要出去你走先啦，我要換衫。」

「都入夜仲去邊？」

我望下架鐘都6點幾鐘，我出於關心地問左佢一句。

「我去邊關你撚事咩，你走啦。」

一個女人點解可以變得咁快，上一刻仲好開心咁笑，下一刻就變到好惡咁趕我走，果然女人心海底針，不過我的確冇權理你咁多，究竟佢要去邊？睇落似有啲野收埋。

「好啦咁今日就教到呢度先，我今晚會盡力幫你做好啲功課，聽日等你morning call我。」

第七十二章：開夜車

我同Chole姐道別後我就開門慢慢步出門口，佢冇送我出去，只見佢忙住篤機打字。

然後我拎住佢俾我多嘅張工作紙同阿盈返返自己屋企。

「你咁快就答應幫佢做晒啲功課，你真係可以？你等陣仲要返工，你要凌晨先可以幫佢做，會好攰。」

照計阿盈頭先應該全程睇住我同Chole姐嘅相處，所以一返到黎即刻問我應唔應付得黎。

「我得嘅！啲功課佢聽日就要交、係好急嘅野，佢交托得俾我嘅野一定會幫佢完成到。」

「但你會好辛苦，不如你返工嗰陣我幫你搞掂佢？你仲有我，你都知我生物好勁架嘛。」

「唔洗啦妹，你抖抖啦，我唔想假手於人到呢個地步，我想親手落筆幫佢做。」

「更何況你啲字咁靚佢一睇就知唔係我做一定會質疑。」

「都係嘅，男人字同女人字係大不同，咁你今晚盡快搞掂返黎啦，我地即刻動工！」

「好！」

然後我地都好似「如臨大敵」咁為今晚堆功課作好心理準備，我食左少少野後亦換衫準備返工。
.
.
.
時間過得好快，我望下架鐘：12點半，今晚已經算放得早，我步出商場後急步行返屋企，為嘅就係要幫Chole姐做功課。

我沿路行返去，鬼母子依然見到我，但佢地冇襲擊我而係同琴晚一樣對我點點頭以示友好，伯伯依舊睇電視嘅回憶，我覺得奇怪，佢地唔係對我有敵意架咩？

搭𨋢上到我嗰層後，我望向Chole姐門口，心諗咁夜佢會唔會好似琴晚咁出左去未返？定佢已經係入面瞓緊教？對住佢門口我會有一種講唔出黎且微妙嘅親密感。

然後我開門返到屋企後我立即同阿盈講左頭先嗰件奇怪嘅事佢聽。

「你終於留意到啦？我琴晚見你咁急躁都唔記得同你講返。」

「莫非呢啲事都係你做嘅？點解佢地嘅態度會對我180度改變？」

「冇錯，就係你用交友app嗰日，你估我真係淨係行街咁簡單咩。」

「嗰日我係搵左佢地傾，同佢地講你係我嘅人、係無害，所以自此你唔傷害佢地，佢地都唔會傷害你，反而對你友好。」

「原來係咁，但佢地點解一定要聽你講？」

「因為我靈力高過佢地，佢地唔聽我講就等於同我反抗。」

「咁都得，咁你咪即係大蝦細？」

「冇計啦，你俾佢地襲擊過我就一定要做啲野令佢地服從，話過我會保護你。」

聽到呢句後，我內心再一次地感到好warm。

「阿妹多謝你。」

「唔講咁多啦，快啲動工做功課！夜啦，時間無多。」

「係喎差啲唔記得，拿拿聲啦咁要。」

「辛苦你要你陪我一齊熬夜做野，仲要你用咁多腦力。」

說罷我係櫃桶將啲生物工作紙拎上枱。

「唔辛苦，你唔記得我唔係人啦咩，我邊會耗腦力耗精力。」

「同埋係你返工嗰陣我已經睇過下啲題目講乜，唔算好難，而我心中已有答案，等陣只要你寫得快就得！」

「咁犀利？原來你一早準備好，咁等陣就要發揮我對摩打手嘅功力。」

然後我地就開始動工做起一張張嘅生物功課，阿盈負責讀我做寫、十分暢順，

當中包含各類題目，問答題、填充題、圖片題、短答題等等，就算遇到長答題要寫一大堆字亦如此，阿盈每一句都可以好快讀到出黎，有佢係度坐陣清呢一大堆功課如入無人之境…

時間過得好快，當我地做完嗰陣已經凌晨3點半，而我亦已感到倦意。

「終於搞掂晒佢咁多張紙啦，我聽日可以準時交到佢手上，佢唔會欠功課！」

當我清晒佢啲功課後，我即刻開心到彈左起身，猶如完成任務放下心頭大石，我露出十分滿足嘅笑容。

「你早啲休息啦，聽日等佢morning call你，我就返返入公仔休息下先。」

「嗯嗯，今晚真係有勞你，好彩我有個生物咁勁嘅阿妹咋！如果唔係都幫唔到佢做呢一大堆功課。」

「睇你依家開心到，仲話冇鐘意人？」

阿盈對住我奸笑。

但佢呢一講立即令我不知所措，雖然我都唔知點解會咁仆心仆命幫佢做野，但我估一定係我之前好似hurt親佢咁而我又感到內疚先想做返啲野補償返佢，

我份人就係咁，覺得自己對人唔住之後點都會想做返啲野補償返人，就算事後人地原來係冇野都好，始終都係自己內疚過嘅事，一定係咁！

更何況佢仲要求晒我叫我幫佢咁我都冇得唔應承佢啦，我點會鐘意佢呢啲mk妹。

「鐘…鐘意佢？你唔好玩啦，我覺得之前嘅事我對佢唔住我內疚先咁仆心仆命幫佢做功課補償返咋。」

「明架啦，唔洗係咁解釋，你講到紅都面晒啦。」

「你冇啦啦屈我鐘意佢我緊張先會紅晒咋。」

「鐘意人就鐘意人啦，仲扮野，講一講佢就咁緊張，我都係女人，會睇唔出你鐘意人咩？」

仆街乜緊張真係會咁易出賣自己架咩，如果係咁咪好易俾佢誤會我鐘意佢？定一早已經俾佢誤會左我鐘意佢？

但毋庸置疑我都唔知癡左邊條線乜都諗住佢，明明返緊工我都會想快啲幫佢搞掂啲功課，又會諗佢今晚會唔會都出左去，

仲會諗佢今日究竟去邊唔講得，真係唔知幾時開始個腦不斷圍住佢轉，但我一定唔會係鐘意佢，呢一啲都係幻覺黎架姐，嚇我唔到嘅。

「總之我唔會鐘意佢，我唔會鐘意佢呢啲mk妹。」

第七十三章：單獨約會

呢一晚我繼續矢口否認，但我腦內一直停留係佢今日哄到埋黎好近嘅畫面，每次一諗都會有種回味嘅感覺…

巴巴巴巴巴～

一陣響量嘅警報聲鈴聲將我從睡夢中喚醒，原來Chole姐打俾我，依家先7點幾咋喎。

「喂。」

我以一個疲倦嘅聲線接聽電話。

「醒未啊方伯，啲功課搞掂未？開門拎功課出黎俾我。」

「搞掂啦你等我一陣。」

說罷就收左線落床出去拎疊功課俾返佢，

我緩緩打開門，Chole姐就出現係我眼前，同琴日一樣著上一套雪白嘅校服、孭上佢個粉紅色書包，扎辮後嘅佢感覺清純百倍，但仍然蓄齊陰遮眉。

「功課呢？」

「嗱，功課。」

然後我將手上咁多張嘅紙俾晒佢。

「有料到喎方伯，你真係全撚部做晒，啲長答仲要答得好詳盡，我果然冇睇錯你。」

遞俾佢後，佢第一時間拎起身逐頁揭黎睇。

「當然，我生物小王子個朵唔係浪得虛名。」

俾佢讚後我立即變得好得戚地吹噓自己。

「但你個黑眼圈好鳩大喎，你琴晚熬夜幫我做晒？」

「邊…邊度係，你呢啲功課咁簡單我三兩下手腳搞掂啦，我睇波睇到咁夜咋。」

為左令到我個生物光環更加光，我繼續扮野，我要俾佢知道我生物有幾勁、有幾幫得佢手，費事俾佢睇小啦。

就好似諸葛亮咁，將自己打扮到好似神人、令到個光環十分明亮，就可以受人敬拜同看重。

「咪撚吹水喎你，呢度起碼要一日先做得晒，你同我講唔洗熬夜？」

我的確要熬夜先幫你做得晒，但唔可以俾你識穿，不過我都覺得我犀利，佢話要一日先做得晒嘅份量，我三個鐘都唔洗就將其收皮，最大功勞莫過於阿盈。

「冇錯就係咁簡單，根本好快就可以做晒，係你蠢咋嘛。」

「收皮啦柒頭，你英文又點呀，咪仲垃圾過我。」

說罷佢又用英文串返我，我冇聲出。

「屌，不過一早知你生物咁撚勁嘅話，如果早啲識你嘅我就可以掉晒俾你做唔洗煩。」

哇咁都得，如果係咁我咪做左你嘅御用請槍手，你就可以不勞而獲。

「咪係囉，你嗰陣好啲聲氣唔好一黎就屌我你咪可以一早就同我做左fd，可惜沒如果。」

然後佢又打左我一下。

「屌你係咪又翻舊帳？你嗰陣唔係屋企半夜嘈撚住晒我洗過黎屌你？」

「冷靜冷靜，依家知道我有幾撚勁咪得。」

佢變到好惡死咁對我，我嘗試緩和返佢嘅情緒。

「星期六陪唔陪我去迪士尼？」

Wtf？咁突然話去迪士尼？佢講完我一時黎唔切反應，事關我咁大個仔都未同朋友同女仔去過呢啲主題樂園，依家女神竟然主動邀請我去？咁樣算唔算‘處男下海’？

「去…去迪士尼？同你？」

「係啊同你啊，唔通同你老豆咩。」

「點解突然想同我去？」

「我想咪想囉問咁多，見你幫左我而我又冇fd陪我去我咪叫你陪我去囉。」

「咁你得唔撚得？你唔得我自己一個去。」

原來係想報答我，佢忽然對我咁好？既然佢都講到咁出面我就緊係𦧲飯應，唔通真係要佢一個女仔去咁孤單咩，我都想去玩下嘅。

「好…好啊。」

「就咁話啦，放心嗰日我會抓你條撚樣起身陪我去架啦，你唔會放到飛機。」

雖然佢爆晒粗屌我，但我唔知點解覺得佢係著緊我，有佢抓我起身，我倍感安心。

「唔講住啦，我就遲到，走先。」

就係咁，我望住Chole姐慢慢離開我視線範圍，呢一刻發現，原來佢已經當左我係真正嘅朋友，原來佢都有第一時間諗起我。

而我依家已經完成佢俾我嘅任務，倦意再次來襲，我二話不說就入返屋繼續上床瞓…

然後黎緊呢三日，Chole姐放學後都有叫我黎佢度教功課，我就繼續俾佢「虐待」、當生物功課太多做唔晒我就繼續夜晚幫佢趕工，

而呢三日佢都好鬼死為食，每次黎佢度之前都叫我買定個tea俾佢食，

仲有呢幾日唔知佢係咪財困，三日唔埋就問我借幾舊水，佢問得我且見少少地我就緊係會借，朋友黎嘛，同埋佢有困難唔通唔幫咩，

呢方面我覺得自己真係好大方，但佢就係唔肯講點解借錢。都係嘅，我又唔係同佢太熟又唔係佢邊個，我冇權知咁多，應該都係一啲私人理由…

話咁快呢三日就過左去黎到星期六，呢日我將會係同佢嘅第一次單獨出街，而呢日佢同前幾日一樣黎個奪命call叫我起身，時間大約10點左右。

佢今日著得好靚好吸晴，我亦都係第一次見佢著得咁靚，上身一件白色一字膊衫、下身一條藍色超短熱褲配一對白色平底運動鞋，佢條腿J到呢…腰間就孭住一個鐵鏈斜孭手袋，

反觀我就只係好求其著一件T-shirt同一條短褲，顯得同佢有些少少格格不入。

然後佢同我落樓下食過早餐後就搭車出發到迪士尼，我懷著一個開心嘅心情前往，以前去過幾次都係同屋企人去，且都已經好多年前…

到達迪士尼後，周圍好多人排隊入閘，多數都係大陸人多，其次就係好多‘閃光彈’，個個都一啤啤咁入去，想曬死我呢啲單身狗咩，

其中仲有不乏一啲同Chole姐一樣著得咁靚嘅靚女，果然迪士尼係好一個‘索女聖地’，入到黎就算唔玩都可以飽覽美女、享受一整日嘅眼福…

第七十四章：迪士尼一日遊(上)

最後我地排左好一陣子先迫到入去，入面嘅情境當然唔洗多估，係多人到爆。

但Chlole姐就好似冇俾呢樣野影響，佢入到黎表現到好開心、好雀躍咁周圍望周圍影相，仲戴上一個米奇老味耳仔嘅頭箍，然後佢走到城堡面前同我自拍。

「笑下啦，唔好好似死老母咁。」

說罷我就微笑左一下。

因為我太耐冇同女仔自拍過，以致我一時間好緊張唔識笑，呆呆滯滯咁，搞到我成個毒撚咁。

然後佢仲影唔夠，佢話自拍影唔晒個城堡，想搵人幫我地影，港女真係港女，影相仲多過去玩，務求影到一張靚相，

就算影100張相到最後可以都只係得一張啱佢心意，所以港男學好影相都好重要。

說時遲那時快，佢已經搵左個女仔過黎影，搵女仔影嘅原因係咪因為佢都覺得女仔影係影得特別好睇？

我地揀好位置企後，佢企我右手邊，左手撓住我手臂、頭微微向我膊頭側落黎，但冇掂到，

佢竟然會撓住我隻手？佢竟然會同我咁Close？充滿疑問之中我心跳不斷加速…

然後影出黎張相真係幾好睇，後面個城堡完整呈現出黎係我地後面、至於我地就顯得有啲細粒，因為距離有啲遠，可見緊張嘅我只有一絲微笑、完全冇任何動作。

但Chole姐係充滿笑容、笑得好靚…係發自內心笑出黎嘅笑容，佢仲要撓住我手，顯得好有愛咁…咪亂諗啦…

「黎，我地玩Antman先，我同你鬥高分，等我射爆你。」

「射乜鳩，係都我射爆你啦。」

過左一陣後，佢就拉我手去Marvel嗰邊嘅區域玩Antman，因為我太耐冇黎關係，我唔知嗰度係玩乜，

但佢又再次拉住我？點解佢會想親近我？係咪代表佢都對我有啲意思…？屌咪亂諗啦，會有咩意思，佢簡單抓住我咋嘛，mk妹成日都同男仔玩得埋架啦。

排左半個鐘隊後終於玩到第一個game，排隊期間見到有唔同嘅說明，我大概知佢玩咩，我同佢登上一部兩人坐位嘅‘車’，

然後佢慢慢開動，我倆拎起車上面嘅激光槍開始瞄準唔同嘅光點射，佢反應好鬼快，佢射到個光點盞燈熄左好快捕到下一個要射嘅光點，仲要射得好準、仲要射啲好細嘅光點，真係神槍手，

反觀我反應好遲鈍，我見邊度光點大啲就射邊度，即揀啲最容易嘅黎射，當射熄左一個光點我要搵左陣先決定射第二個光點，但佢係可以射熄下一秒唔洗諗就可以轉換光點。

隨著時間過去，我手已經射到攰，自然速度都會慢左好多，但佢好醒，佢識得換手射，仲要一時用食指一時用中指射，咁就可以俾隻手休息，表現非常熟練，呢點不得不佩服佢，可能呢啲就係玩呢隻game嘅技巧…

「哇屌，我拎到90萬分！」

又過左一陣我地終於玩完部車移到出外面，Chole姐見到個分數感到好振奮，而我就只得20幾萬分，少佢4倍有多。

「哈哈柒頭你先得20幾萬分，咁廢架你。」

佢見到呢個反差後立即拎部機出黎影低我有幾柒。

「屌你啦，我未發力咋，唔好睇小我。」

「咁我地晏啲再玩囉，但你仲點撚樣賴。」

睇黎Chole姐好勝心都幾強，咁鐘意同人挑機，但亦都可以係我唔服輸嘅心挑起左佢舖癮，我同佢嘅實力天同地之差，真係好難贏架喎師傅。

「好…好啊黎咪黎，驚你有牙呀。」

「但見你玩得咁熟手，你似係成日黎玩咁喎。」

「我買左年票就緊係成日黎啦，唔係買黎托咩，邊好似你咁on9直接俾五舊水入黎。」

我只係讚左佢一句竟然都有位俾佢入到串我。

「只係多數都係我一個人黎玩姐…」

Chole姐講呢一句嘅時候聲線明顯慢慢收細，好似有咩難言之隱咁。

「一個人？你啲fd呢？」

我感到好奇，正常黎親迪士尼唔係一啤啤情侶咁黎就一定係同幾個fd黎，但佢一個人黎玩？仲要係多數，究竟係點解？

「咪撚理啦，我地玩過山車。」

突然佢又大聲返講野且變得興奮，直接迴避左我問佢嘅野，睇得出佢係有啲唔開心嘅事係收埋左唔想提…

然後我地行出Antman館後，我地行到前方唔遠處嘅黑暗過山車，寫住‘飛越太空山’，好似好刺激咁，我多年前玩過一次，又真係幾快下。

「嗱，我次次黎都唔敢玩過山車，我見你今次係度先想try try、好似好爽咁，你唔好笑鳩我啊，我打柒你架。」

「得得得，唔笑你。」

但我講完呢句已經有啲想笑，心諗終於有樣你驚嘅野，呢個過山車雖然快，但離心力唔大且冇倒轉我冇咁驚。

「屌你話口未完你就笑鳩我。」

佢見我好似有啲想笑就打我一野先。

「冇啊，邊度有笑，你睇錯姐。」

我扮無知咁唔認帳…

接著我地又排左半個多鐘，終於排到我地，我地登上一卡過山車，佢坐入面我出面，

慢慢地部車開動進入一片漆黑嘅位置，黑嘅程度係伸手不見五指，然後就進入緩慢向上移動嘅軌道。

「屌你好撚驚啊喂，你要護住我啊，唔會跌鳩左落去架呵？」

Chole姐個驚青樣出晒黎，即時冇晒平時惡嗰種威勢，佢驚嘅樣我亦都係第一次見，睇唔出佢會咁驚坐過山車，

但佢叫我護住佢，即係佢依靠我，我即刻覺得自己好似孭起左一份使命感。

第七十五章：迪士尼一日遊(下)

「小姐，呢度啲設施好安全架，咁易跌落去嘅一早上晒新聞啦下話。」

車慢慢進入軌道開始落斜，周圍傳黎好嘈吵嘅音效，音效越大聲車速越快，快到一個點嘅時候，Chole姐突然撓住我隻手挨埋我手臂尖叫左出黎，而且仲撓得好實，睇得出佢真係好驚，

我心跳隨即亦加快，唔知係咪我嘅保護慾上身，呢個時候我另一隻手好自然地掂住佢塊臉，做出一個一個保護佢嘅姿態，直至玩完嗰下我先放返低，我第一次掂佢塊臉…

「癡線佢真係開得好撚快，嚇撚死，心血少啲都唔得。」

「證明你老啦，啱先睇住你個驚青樣笑撚死哈哈！」

「屌你老味叫你咪撚笑鳩我你係都笑，你條撚樣真係欠打。」

說罷佢大大巴咁打左我幾下，呢刻嘅佢又變返惡。

仆街唔記得玩前應承左佢話唔笑佢但依家我竟然笑到仆街，我真係抵俾佢打…

之後我地仲玩左好多機動遊戲，U型、降傘、灰熊山等等，呢啲佢都有撓住我隻手，我暗地裡個心覺得好甜；再之後我地玩多幾次Antman，但結果我都係咁輸俾佢、唔係佢對手。

靜方面我地去左迷離莊園、係森林坐左下船、仲有小小世界，呢啲佢冇覺得驚當然亦都冇撓住我，

證明佢會撓住我純粹係因為下意識覺得驚想搵野攬住有安全感先會咁樣，所以我都係唔好諗多左啦…

「呢隻豬仔好得意呀，可唔可以買俾我？」

時間唔早，已經開始入夜，就係我地臨走之時，佢帶我入左一個舖頭睇公仔，咁啱睇中左一隻粉紅色嘅豬仔想我買俾佢。

「你有冇鐘意粉紅色鐘意到咁，你屋企已經全部粉紅色野架啦喎，公仔都唔少。」

「但佢真係好得意喎，你就買一次俾我咁多啦好嘛。」

黎到迪士尼嘅佢真係少女心左好多，依家仲要用我從來未聽過嘅一把嗲嘅聲線黎墾求我，我心都溶化晒，完全冇晒平時嗰種惡，可能嗲呢一招都係女人嘅絕招。

「好啦怕左你，買啦買啦，得今次咋。」

「多謝晒，呢度話買兩隻85折，咁你就買埋隻跳跳虎俾我啦，一對襯晒～」

「哇乜你咁得一想二嘅。」

「你應承左我話一次架嘛，依家都係一次過買姐，你唔係反口下話。」

頂佢佢咁樣抓字失都得？咁佢咪買幾多都得？但眼見好難得佢咁樣嗲我法我又唔忍心唔買俾佢啦，更何況佢都係買呢兩隻公仔姐。

「咁買囉，一對係好睇啲嘅。」

「你都覺呢，同埋呢排佢出左個新款杯好靚我想要埋，唔該你！」

屌你可唔可以惡啲對返我呀，我唔想係咁對你心軟啊。

「買啦買啦，你仲想要乜。」

我已經俾佢嗲到對於買野麻木左…

最後佢買左6-7樣野，用左我四舊幾水，不過可能都正常嘅，黎得迪士尼呢啲地方都應該要預返咁上下洗費去買野，但我唔係買俾自己，而係買俾Chole姐。

見到我買完俾佢佢咁開心，我見到佢咁開心後我都開心，起碼我唔會內疚先，簡單啲講，值得。

然後我地開始散場閃人，大批人亦都朝著同一方向湧往出口離開樂園。

「點啊我買左咁多野俾你，可唔可以送隻跳跳虎俾我，我自己都鐘意架喎。」

其實跳跳虎我由細到大就好鐘意，佢係老虎，聽落應該好有威勢，但原來佢唔單止好玩得，仲識得用條尾會彈下彈下好鬼得意，

就好似眼前嘅Chole姐，表面好惡死，但其他佢都有少女心、得意同柔弱嘅一面。

「唔制喎，你要買咪自己去買囉，咪撚搶我個公仔。」

當然最後都係俾佢一下拒絕我。

「好囉，獨食難肥啊，唔怪得你瘦到成棚骨咁。」

說罷我借啲意串佢，佢又打左我一下。

「屌你你照下塊鏡啦，你條撚樣就真係成棚骨啦。」

呢一日迪士尼一日遊就咁結束，天空已經變成暗淡嘅深藍色，夜色降臨，我陪同Chole姐雙雙搭地鐵返屋企，

今日同佢玩得好開心，我見多左佢好多面，亦都接觸多左，就好似同佢close左，但我相信呢啲都係錯覺黎姐，

最真實嘅感覺存在於我內心，究竟我係咪真係一啲都唔鐘意佢？
.
.
.
兩個禮拜過去，我同佢更加熟絡，打我凶我呢啲已經係正常不過嘅事，唔知係咪我被虐嚴重左，我竟然越黎越鐘意俾佢打嘅感覺，感覺佢係著緊我先會打我、先會咁主動接觸我，我仲要係俾一個mk妹女神打我喎。

至於凶我，呢啲佢都係同我玩下姐，佢一定係覺得同我好相處先咁敢於展視佢真實一面俾我睇，而且咁樣仲可以鬥下嘴添，可以間接增加我地之間嘅‘溝通’，一切都俾我睇穿了。

雖然佢好似好惡咁，但佢都有對我好嘅一面，佢每一個對我嘅微細舉動我都覺得好窩心，就好似有一次佢細心地幫我掹左一條白頭髮，我已經心跳加速，可謂一啖砂糖一啖屎。

但我始終都覺得一定係我太耐冇同其他女仔相處過先會咁，依家仲要有個mk妹女神對我咁好，我緊會覺得窩心架！我…我一定唔係鐘意佢，相信再過耐一排我就唔會有呢啲感覺。

樓主文筆好咗唔少對比補習老師故